Vamyangana 2 11:1-21
11 Omu Ataliya+ amwene ngwenyi mwanenyi Ahajiya nafu,+ anongesele vatu vosena vakutanga yawangana.*+
2 Oloze Yehosheva mwanamwangana Yeholame uze apwile ndumbwaAhajiya, ambachile Yehowashe+ mwanaAhajiya hali vana vamwangana vaze vambile kujiha, kaha amuswekele mukapete kakusavala, nandeji yenyi hamwe. Vamuswekele kuchina Ataliya mwamujiha.
3 Atwaminenga nandeji yenyi muzuvo yaYehova myaka 6 halwola luze Ataliya apwile nakuyula mulifuchi.
4 Jino mumwaka wakusokesa 7, Yehoyata asanyikile tupitau twamakulukaji avaka-kulama vavaKale navaka-kulama*+ kuzuvo yamwangana, kaha vejile kuli ikiye muzuvo yaYehova. Yehoyata alikashile navo chivwasano,* kaha avashingishile hachivwasano kana muzuvo yaYehova, kufumaho avasolwelele uze mwanamwangana.+
5 Avalwezele ngwenyi: “Lingenu ngana: Lihandununenu mumazavu atatu. Lizavu limwe lizatenga haSambata nakulama zuvo* yamwangana.+
6 Lizavu likwavo lipwenga kuchikolo vavuluka ngwavo Chikolo ChakuChihela, kaha lizavu likwavo lipwenga kuchikolo, munyima yavaka-kulama kuzuvo yamwangana. Namupwanga nakulishisashisa hakulama zuvo.
7 Mazavu enu avali aze kaweshi kukazata halikumbi lyaSambatako akalame zuvo yaYehova mangana akakinge mwangana.
8 Mukajingilika mwangana che ndo, kaha mutu himutu akakwate vitwa vyenyi mumavoko. Weshowo mwakengila halizavu lyenu mukamujihe. Mukalama mwangana kweshokwo mwakayanga.”*
9 Ngocho vaze tupitau twamakulukaji+ valingile nge muze avalwezele kapilishitu Yehoyata. Kapitau hikapitau ambachile lizavu lyavatu jenyi vaze vapwile nakuzata halikumbi lyaSambata, navaze kavapwile nakuzata halikumbi lyaSambatako, kaha vayile kuli kapilishitu Yehoyata.+
10 Jino kapilishitu Yehoyata ahanyine vaze tupitau twamakulukaji makunga najikepwe jamujingulule vize vyapwilenga vyaMwangana Ndavichi, vize vyapwile muzuvo yaYehova.
11 Vaze vaka-kulama kuzuvo yamwangana+ vemanyine mutu himutu navitwa vyenyi mumavoko, kufumisa kuluhachi lwazuvo kuchilyo swi nakuluhachi lwazuvo kuchimoswe, kwakamwihi nalijiko lyakulumbila,+ kwakamwihi nazuvo. Vajingilikile mwangana che ndo.
12 Jino Yehoyata alowele mwanamwangana,+ kaha amuvwikile muchama* nakumuhana mukanda waUnjiho.*+ Vamuswanyishile hawangana nakumuwavisa, kaha vatu vaputukile kusakwilila jikushi nakwamba ngwavo: “Ove mwangana, yoyanga lika!”+
13 Omu Ataliya evwile jishindo javatu vaze vapwile nakulaha, hahaze vene ayile kuzuvo yaYehova+ kuze kwapwile vatu.
14 Hakuheta kuze, amwene mwangana nemana kwakamwihi napanda kweseka namuze valingilenga.+ Kaha vaze tupitau navaka-kwimba jineta vapwile namwangana.+ Vatu vosena vawahililile nakwimba jineta. Ngocho Ataliya apihililile nakupula uvwalo wenyi, kaha atambakanyine ngwenyi: “Vanangufumbukila! Vanangufumbukila!”
15 Oloze kapilishitu Yehoyata alwezele tupitau twamakulukaji+ vaze vatongwele vapwenga vakulwane jamaswalale, ngwenyi: “Mufumisenu halizavu lyenu, kaha weshowo mwamukava mumujihe napoko yamukwale.” Mwomwo kapilishitu ambile ngwenyi: “Kanda namumujihila muzuvo yaYehovako.”
16 Ngocho vamukwachile, kaha omu vahetele nenyi kuChikolo chaTuvalu chakuzuvo* yamwangana,+ vamujihile.
17 Jino Yehoyata alingishile mwangana navatu valishike lushiko naYehova+ mangana vapwenganga vatu jaYehova. Kaha alingishile nawa mwangana alikase lushiko navatu.+
18 Omu vyakumine vyumevi, vatu vosena vejile kuzuvo* yaMbale, kaha vapuzwile majiko enyi akulumbila,+ namakombelo enyi akusonga.+ Vajihilile nawa Matane uze apwile kapilishitu kaMbale+ kulutwe lwamajiko aze akulumbila.
Jino kapilishitu Yehoyata atongwele tulama valamenga zuvo yaYehova.+
19 Kaha alwezele vaze tupitau twamakulukaji,+ navaka-kulama vakulipwila, navaka-kulama kuzuvo yamwangana,+ navatu vosena vashinjikize mwangana kufuma kuzuvo yaYehova nakumutwala kuzuvo* yamwangana. Kaha vahichile jila yakuchikolo chavaka-kulama kuzuvo yamwangana. Ngocho mwangana atwamine halitanda lyavamyangana.+
20 Shikaho vatu vosena vawahililile. Kaha munganda mwosena mwaunjile mwomwo vajihile Ataliya napoko yamukwale kuzuvo yamwangana.
21 Yehowashe+ aputukile kuyula omu apwile namyaka yakusemuka 7.+
Kwinyikila Chamwishi
^ Hepe., “vakumbuto yawangana.”
^ Hepe., “navaka-kulaha.”
^ Chipwe “lushiko.”
^ Chipwe “nganda.”
^ Hepe., “omu mwakalovokanga nomu mwakengilanga.”
^ Pamo wapwile mukanda wakuvunga waJishimbi jaKalunga.
^ Chipwe “chilongo.”
^ Chipwe “chakunganda.”
^ Chipwe “kutembele.”
^ Chipwe “kunganda.”
