Vamyangana 2 12:1-21
12 Yehowashe+ aputukile kuyula mumwaka wakusokesa 7 wachiyulo chaYehu,+ kaha ayulile myaka 40 muYelusalema. Lijina lyanaye apwile ikiye Jiviya wakuMbele-sheva.+
2 Yehowashe alingilenga vyuma vyakwoloka kumeso aYehova hamakumbi osena vamunangwilenga kuli kapilishitu Yehoyata.
3 Oloze kafumishile vihela vyakulundukako,+ kaha vatu vachipwile lika nakuhana vimuna vakuvatula havihela kana mangana vakakumuke wishi.
4 Jino Yehowashe ambile kuli vapilishitu ngwenyi: “Tambulenu jimbongo jize navaneha vatu kupwa wana wajila+ kuzuvo yaYehova, najimbongo jamitelo,+ najimbongo vanatomena mutu* kuhana, najimbongo najinyi mutu mumuchima wenyi kuhana kuzuvo yaYehova.+
5 Mujitambule kumavoko avaze navajihana mangana mujizachise kumilimo yakuwahisa heshoho hanalyenyeka* kuzuvo.”+
6 Mumwaka wakusokesa 23 wachiyulo chaMwangana Yehowashe, vapilishitu vapwile kanda vachiwahise haze halyenyekele kuze kuzuvo.+
7 Jino Mwangana Yehowashe asanyikile kapilishitu Yehoyata+ navapilishitu vakwavo, ambile kuli vakiko ngwenyi: “Mwomwo ika munahonena kuwahisa eyi zuvo? Shikaho kanda namutambula jimbongo kuvatuko, kuvanga kaha nge namujizachisa kumulimo wakuwahisa zuvo.”+
8 Ngocho vapilishitu valikashile ngwavo kaveshi kutambula jimbongo kuvatuko, kaha nawa ngwavo kaveshi kuwahisa zuvoko.
9 Jino kapilishitu Yehoyata ambachile chikasha+ nakutokola wina hachifwiko chacho, kaha achihakile kwakamwihi nalijiko lyakulumbila kulivoko lyachilyo kuze vengilililenga vatu muzuvo yaYehova. Vapilishitu vaze valaminenga kuchikolo vahakilenga jimbongo josena vanehelenga vatu kuzuvo yaYehova muze muchikasha.+
10 Omu vamwenenga ngwavo jimbongo jinavulu muchikasha, muka-kusoneka wamwangana nakapilishitu wakulitulaho vambachilenga* jize jimbongo vanehelenga kuzuvo yaYehova+ nakujilava.
11 Jimbongo jize valavilenga vajihanyinenga kuli vaze vatongwele kutala mulimo wakuwahisa zuvo yaYehova. Kaha vakiko vajifwetelenga vaka-kusonga maliva, navaka-kutunga vaze vazachilenga mulimo wakuwahisa zuvo yaYehova,+
12 navaka-kwola malolwa, navaka-kusonga malolwa. Valanjilenga nawa maliva, namalolwa akusonga mangana vawahise haze halyenyekele kuze kuzuvo yaYehova. Jize jimbongo vajizachishilenga nakumilimo yeka yakuwahishisa yize zuvo.
13 Jimbongo jize vanehelenga kuzuvo yaYehova kavajizachishilenga kumilimo yakutunga jimbashiya japalata, natuzola, naviloso, najineta,+ chipwe kuvyuma vyeka vyaulu chipwe vyapalata vyakuzuvo yaYehovako.+
14 Jimbongo kana vajihanyinenga kaha kuli vaka-kuzata milimo, ngocho vawahishile yize zuvo yaYehova.
15 Uze muka-kusoneka nakapilishitu wakulitulaho kavahulishilenga vaze vaka-kutala milimo mangana vambulule muvazachishililenga jimbongo jize vavahanyinenga jakuhana vaka-kuzata milimoko, mwomwo vaze vaka-kutala milimo vapwile malunga vakashishi.+
16 Oloze jimbongo jawana wahamulonga+ najeji jawana wahashili kavajinehelenga kuzuvo yaYehovako, mwomwo jimbongo kana japwilenga javapilishitu.+
17 Hazayele+ mwangana waSulya ayile nakulukuka nganda yaNgata,+ kaha ayitambwile. Kufumaho asakile kuya nakulukuka* nganda yaYelusalema.+
18 Jino Yehowashe mwangana wavaYuta ambachile mawana ajila osena aze vajilikile vakakuluka jenyi vaYehoshafwate, naYeholame, naAhajiya vaze vapwile vamyangana javaYuta, ambachile nawa namawana enyi ajila, naulu wosena wapwile muze mwakulamina vikumba muzuvo yaYehova, namuzuvo* yamwangana, kaha avitumine kuli Hazayele mwangana waSulya.+ Ngocho kayile nakulukuka Yelusalemako.
19 Mujimbu wosena waYehowashe wavyuma alingile vausoneka mumukanda wamijimbu yavamyangana javaYuta.
20 Oloze vangamba jenyi vamutwamine punga,+ kaha vamujihililile kuzuvo yaMulundu,*+ mujila yakuya kuShila.
21 Ngamba yenyi Yozakale mwanaShimeyate, naYehozavate mwanaShomele vakiko vamuvetele nakumujiha.+ Yehowashe vamufunjile navakakuluka jenyi hamwe muNganda yaNdavichi. Kaha mwanenyi Amajiya aswanyine hawangana.+
Kwinyikila Chamwishi
^ Chipwe “mwono.”
^ Chipwe “heshoho hali myaji.”
^ Chipwe “vahakilenga mujingonga.” Hepe., “vakashilenga.”
^ Hepe., “Hazayele atalishile meso enyi nakuya nakulukuka.”
^ Chipwe “namunganda.”
^ Chipwe “kuMbete-milo.”
