Vamyangana 2 13:1-25
13 Yehowahaze mwanaYehu+ aputukile kuyula vaIsalele muSamaliya mumwaka wakusokesa 23 wachiyulo chaYehowashe+ mwanaAhajiya+ mwangana wavaYuta, kaha ayulile myaka 17.
2 Yehowahaze alingilenga vyuma vyavipi kumeso aYehova, alingilenga jishili jaYelovowame mwanaNevate uze ahungumwishile navaIsalele valinge jishili kana.+ Yehowahaze kambilile jishili kanako.
3 Ngocho Yehova akwachilile vaIsalele+ utenu,+ kaha avahanyine mumavoko aHazayele+ mwangana waSulya, namumavoko aMbene-hatate+ mwanaHazayele hamakumbi avo osena.
4 Kutwala muze Yehowahaze alembelelele Yehova, kaha Yehova amwivwililile mwomwo amwene omu mwangana waSulya ayanjishilenga vaIsalele.+
5 Ngocho Yehova ahanyine vaIsalele mulwilo+ avapululule mumavoko avaSulya. VaIsalele vatwaminenga jino mukuunda nge muze vapwilenga hakavanga.
6 (Oloze kavasezele shili yaYelovowame yize alingishile navaIsalele vayilingeko.+ VaIsalele valingilenga shili kana.* Kaha panda yajila yamutondo*+ muyapwilenga lika muSamaliya.)
7 Yehowahaze asalile kaha namaswalale 50 vaka-kutambukila hatuvalu, namatemba ajita 10, namaswalale vakutambuka hamavu 10,000, mwomwo mwangana waSulya anongesele vavavulu,+ avalyatangilile kwijiva nge muzungu wakuchizungwilo.+
8 Mujimbu wosena waYehowahaze wakuvuluka ngolo jenyi navyuma vyosena alingile vausoneka mumukanda wamijimbu yavamyangana javaIsalele.
9 Yehowahaze atokele ngana mwavakakuluka jenyi, kaha vamufunjile muSamaliya.+ Kaha mwanenyi Yehowashe aswanyine hawangana.
10 Yehowashe mwanaYehowahaze aputukile kuyula vaIsalele muSamaliya mumwaka wakusokesa 37 wachiyulo chaYehowashe+ mwangana wavaYuta, kaha ayulile myaka 16.
11 Yehowashe alingilenga vyuma vyavipi kumeso aYehova, kambilile jishili jaYelovowame mwanaNevate uze ahungumwishile navaIsalele valinge jishili kanako.+ Yehowashe alingilenga jishili* kana eji.
12 Mujimbu wosena waYehowashe wakuvuluka ngolo jenyi navyuma vyosena alingile, nomu azungile naAmajiya mwangana wavaYuta+ vausoneka mumukanda wamijimbu yavamyangana javaIsalele.
13 Yehowashe atokele ngana mwavakakuluka jenyi, kaha mwanenyi Yelovowame*+ amushishile halitanda lyenyi lyawangana. Yehowashe vamufunjile muSamaliya navamyangana javaIsalele hamwe.+
14 Omu Elisha+ avijile musongo uze wamutwalile nakukufwa, Yehowashe mwangana wavaIsalele ejile nakumumenekela, kaha alilile nakwamba ngwenyi: “Ove mwata, ove mwata! Tala litemba lyaIsalele navatu jenyi vaka-kutambukila hatuvalu!”+
15 Jino Elisha ambile kuli mwangana wavaIsalele ngwenyi: “Mbata uta wamanana namivwi.” Ngocho ambachile uta wamanana namivwi.
16 Kaha ambile kuli ikiye ngwenyi: “Nana uta.” Ngocho ananyile uze uta, kaha Elisha anangikile mavoko enyi hamavoko amwangana.
17 Jino Elisha ambile ngwenyi: “Sokolola njanena yakutala kumututuko.” Kaha ayisokolwele. Elisha ambile kuli ikiye ngwenyi: “Asa!” Ngocho ashile. Jino Elisha ambile ngwenyi: “Ou unapu himwivwi waYehova wakufungulula,* himwivwi wakufungulula vaSulya. Naukajiha vaSulya kuAfweke+ palanga nomu naukavalalisa vosena.”
18 Elisha ambile cheka kuli mwangana wavaIsalele ngwenyi: “Mbata mivwi.” Kaha ambachile yize mivwi. Elisha ambile kuli ikiye ngwenyi: “Asa hamavu.” Mwangana ashile hamavu mapapa katatu kaha alitwaminyine.
19 Uze mutu waKalunga wamuchano apihililile nakwamba ngwenyi: “Watelanga kwasa hamavu mapapa 5 chipwe mapapa 6. Kachi nge walinganga ngocho, kachi naufungulula vaSulya nakuvalalisa vosena, oloze jino nauvafungulula kaha mapapa katatu.”+
20 Kutwala muze Elisha afwile, kaha vamufunjile. Jino kukuputuka chamwaka himwaka* muIsalele mwejilenga mazavu avaka-kunyemukila+ avaMowave.
21 Likumbi limwe omu vatu vapwile nakufunda mufu, vamwene lizavu lyavaka-kunyemukila. Ngocho vambilile uze mufu muchimbumbe chaElisha nakuchina. Uze mufu akukile kuvifuwa vyaElisha, kaha ayoyele cheka,+ akatukile nakwimana.
22 Hazayele mwangana+ waSulya ayanjishilenga vaIsalele+ hamakumbi osena ayulilenga Yehowahaze.
23 Oloze Yehova avevwililile keke, avatetelelele+ nakuvazakama mwomwo yalushiko lwenyi luze alishikile naApalahama,+ naIsaka,+ naYakova.+ Kasakile kuvanongesako, kaha kavambilileko palanga nakulelo.
24 Hazayele mwangana waSulya afwile, kaha mwanenyi Mbene-hatate aswanyine hawangana.
25 Jino Yehowashe mwanaYehowahaze atambwile jinganda jize Mbene-hatate mwanaHazayele atambwile hakulwa jita naYehowahaze. Yehowashe afungulwile Mbene-hatate mapapa katatu,+ kaha atambwile jize jinganda javaIsalele vavatambwile.
Kwinyikila Chamwishi
^ Tala Mukana waMazu.
^ Hepe., “vatambukilengamo.”
^ Hepe., “atambukilenga mujishili.”
^ Kulumbununa, Yelovowame II.
^ Chipwe “waulwilo.”
^ Hepe., “hakwiza chamwaka himwaka,” pamo kuchivatuko chavula.
