Vamyangana 2 15:1-38
15 Azaliya*+ mwanaAmajiya+ mwangana wavaYuta aputukile kuyula vaYuta mumwaka wakusokesa 27 wachiyulo chaYelovowame* mwangana wavaIsalele.+
2 Azaliya aputukile kuyula omu apwile namyaka yakusemuka 16, kaha ayulile myaka 52 muYelusalema. Lijina lyanaye apwile ikiye Yekoliya wamuYelusalema.
3 Azaliya alingilenga vyuma vyakwoloka kumeso aYehova nge muze alingilenga ise Amajiya.+
4 Oloze kafumishile vihela vyakulundukako,+ kaha vatu vachipwile lika nakuhana vimuna vakuvatula havihela kana mangana vakakumuke wishi.+
5 Jino Yehova avetele mwangana Azaliya namusongo wambumba,+ kaha apwile lika nambumba palanga nakulikumbi afwile. Azaliya atwaminenga muzuvo yauka wenyi,+ kaha mwanenyi Yotame+ ikiye apwile mwata wazuvo* yamwangana, kaha ayulilenga vatu vamulifuchi lize.+
6 Mujimbu wosena waAzaliya+ wavyuma alingile vausoneka mumukanda wamijimbu yavamyangana javaYuta.
7 Jino Azaliya atokele ngana mwavakakuluka jenyi,+ kaha vamufunjile navakakuluka jenyi hamwe muNganda yaNdavichi. Kaha mwanenyi Yotame aswanyine hawangana.
8 Zekaliya+ mwanaYelovowame aputukile kuyula vaIsalele muSamaliya mumwaka wakusokesa 38 wachiyulo chaAzaliya+ mwangana wavaYuta, kaha ayulile tukweji 6.
9 Zekaliya alingilenga vyuma vyavipi kumeso aYehova nge muze valingilenga vakakuluka jenyi. Kambilile jishili jaYelovowame mwanaNevate uze ahungumwishile navaIsalele valinge jishili kanako.+
10 Jino Shalume mwanaYaveshe afumbukilile Zekaliya, kaha amujihilile+ kuIviliyame,+ kufumaho amushishile hawangana.
11 Mujimbu wosena waZekaliya wavyuma alingile vausoneka mumukanda wamijimbu yavamyangana javaIsalele.
12 Chuma kana chateselemo mazu aYehova ahanjikile kuhichila muli Yehu ngwenyi: “Vana vove vamuvisemunwino+ viwana navakatwamanga halitanda lyawangana muIsalele.”+ Omu mukiko chapwile.
13 Shalume mwanaYaveshe aputukile kuyula vaIsalele muSamaliya mumwaka wakusokesa 39 wachiyulo chaUjiya+ mwangana wavaYuta, kaha ayulile kakweji umwe.
14 Jino Menaheme mwanaNgachi afumine kuChiliza+ nakuya nakujiha Shalume+ mwanaYaveshe kuSamaliya. Kufumaho amushishile hawangana.
15 Mujimbu wosena waShalume wavyuma alingile, nomu afumbukilile mwangana vausoneka mumukanda wamijimbu yavamyangana javaIsalele.
16 Jino Menaheme afumine kuChiliza, ayile nakulukuka nganda yaChifwisa navatu vaze vapwilemo nangalila yayo yosena, mwomwo vaka-Chifwisa vakanyine kumusokolwela vikolo vyanganda. Ngocho alukukile nganda kana nakupulapula tufumbakaji hamajimo avo.
17 Menaheme mwanaNgachi aputukile kuyula vaIsalele mumwaka wakusokesa 39 wachiyulo chaAzaliya mwangana wavaYuta, kaha ayulile muSamaliya myaka 10.
18 Menaheme alingilenga vyuma vyavipi kumeso aYehova. Kambilile jishili jaYelovowame mwanaNevate uze ahungumwishile navaIsalele valinge jishili kanako.+
19 Jino Pule mwangana+ waAsulya ejile muIsalele, kaha Menaheme ahanyine Pule jitalende* japalata 1,000 mangana amukafwe kuzamisa wangana wenyi.+
20 Ngocho Menaheme akungulwile jimbongo kana japalata kufuma kuli vaIsalele, ajitambwile kuli vatu vavalemu vaka-luheto.+ Atambwile jishekele* japalata 50 kumutu himutu nakujihana kuli mwangana waAsulya. Ngocho mwangana waAsulya katwamine muze mulifuchiko, akindulukile.
21 Mujimbu wosena waMenaheme+ wavyuma alingile vausoneka mumukanda wamijimbu yavamyangana javaIsalele.
22 Menaheme atokele ngana mwavakakuluka jenyi, kaha mwanenyi Pekahiya aswanyine hawangana.
23 Pekahiya mwanaMenaheme aputukile kuyula vaIsalele muSamaliya mumwaka wakusokesa 50 wachiyulo chaAzaliya mwangana wavaYuta, kaha ayulile myaka yivali.
24 Pekahiya alingilenga vyuma vyavipi kumeso aYehova. Kambilile jishili jaYelovowame mwanaNevate uze ahungumwishile navaIsalele valinge jishili kanako.+
25 Jino kapitau kenyi Peka+ mwanaLemaliya amufumbukilile nakumujiha muSamaliya kukaposhi kakuzuvo* yamwangana, hohamwe naAlangove naAliye. Peka apwile hamwe namalunga 50 vakuNgileyate, kahomu alingile hanamujihi lyehi amushishile hawangana.
26 Mujimbu wosena waPekahiya wavyuma alingile vausoneka mumukanda wamijimbu yavamyangana javaIsalele.
27 Peka+ mwanaLemaliya aputukile kuyula vaIsalele muSamaliya mumwaka wakusokesa 52 wachiyulo chaAzaliya mwangana wavaYuta, kaha ayulile myaka 20.
28 Peka alingilenga vyuma vyavipi kumeso aYehova. Kambilile jishili jaYelovowame mwanaNevate uze ahungumwishile navaIsalele valinge jishili kanako.+
29 Hamakumbi aPeka mwangana wavaIsalele, Chingilate-pilese+ mwangana waAsulya atambwile nganda yalyone, naAvele-mbete-maka,+ naYanowa, naKeteshe,+ naHazole naNgileyate,+ nangalila yaNgalileya, ngalila yavaNafwatale yosena.+ Kaha vatu vaze vatwaminengamo avatwalile muufunge kuAsulya.+
30 Jino Hosheya+ mwanaEla afumbukilile Peka mwanaLemaliya nakumujiha. Kufumaho amushishile hawangana mumwaka wakusokesa 20 wachiyulo chaYotame+ mwanaUjiya.
31 Mujimbu wosena waPeka wavyuma alingile vausoneka mumukanda wamijimbu yavamyangana javaIsalele.
32 Yotame+ mwanaUjiya+ mwangana wavaYuta aputukile kuyula vaYuta mumwaka wamuchivali wachiyulo chaPeka mwanaLemaliya.
33 Yotame aputukile kuyula omu apwile namyaka yakusemuka 25, kaha ayulile myaka 16 muYelusalema. Lijina lyanaye apwile ikiye Yelusha mwanaZatoke.+
34 Yotame alingilenga vyuma vyakwoloka kumeso aYehova ngana muze alingilenga ise Ujiya.+
35 Oloze kafumishile vihela vyakulundukako, kaha vatu vachipwile lika nakuhana vimuna vakuvatula havihela kana+ mangana vakakumuke wishi. Yotame ikiye atungile chikolo chahelu chazuvo yaYehova.+
36 Mujimbu wosena waYotame wavyuma alingile vausoneka mumukanda wamijimbu yavamyangana javaYuta.
37 Hamakumbi aze, Yehova atuminenga Lejine mwangana waSulya naPeka+ mwanaLemaliya vafumbukile vaYuta.+
38 Yotame atokele ngana mwavakakuluka jenyi, kaha vamufunjile navakakuluka jenyi hamwe muNganda yakakuluka yenyi Ndavichi. Kaha mwanenyi Ahaze aswanyine hawangana.
Kwinyikila Chamwishi
^ Ulumbunwiso, “Yehova Nakafwe.” Vamuvuluka ngwavo Ujiya hali 2My 15:13; 2Mi 26:1-23; Isa 6:1; naZek 14:5.
^ Kulumbununa, Yelovowame II.
^ Chipwe “wanganda.”
^ Talende yimwe yapwile jikilongalamu 34.2. Tala Chihande B14.
^ Shekele yimwe yapwile jingalamu 11.4. Tala Chihande B14.
^ Chipwe “kakunganda.”
