Vamyangana 2 16:1-20
16 Ahaze+ mwanaMwangana Yotame aputukile kuyula vaYuta mumwaka wakusokesa 17 wachiyulo chaPeka mwanaLemaliya.
2 Ahaze aputukile kuyula omu apwile namyaka yakusemuka 20, kaha ayulile myaka 16 muYelusalema. Kalingilenga vyuma vyakwoloka kumeso aYehova Kalunga kenyi ngana muze alingilenga kakuluka yenyi Ndavichiko.+
3 Oloze Ahaze akavilenga jijila javamyangana javaIsalele.+ Alumbile namwanenyi mukakahya+ hakukavangiza vilinga vyaunyengwe vyavaka-mafuchi+ aze Yehova ahangile kumeso avaIsalele.
4 Alumbilenga nawa vimuna vakuvatula havihela vyakulunduka,+ nahajipili, namwishi yamitondo yakujika mafwo+ yosena mangana vakakumuke wishi.
5 Jino Lejine mwangana waSulya naPeka mwanaLemaliya mwangana wavaIsalele vayile mangana vakalukuke Yelusalema.+ Vahakile nganda yaAhaze muchingombela, oloze kavahashile kuyitambulako.
6 Halwola luze, Lejine mwangana waSulya atambwile nganda yaElate+ nakuyikindulwisa kuli vaEtome. Kaha ahangile vaYuleya* vaze vapwile muze munganda. Ngocho vaEtome vengilile munganda yaElate, kaha vanatwamengamo palanga nakulelo.
7 Jino Ahaze atumine tunganda kuli Chingilate-pilese+ mwangana waAsulya, ngwenyi: “Ami ngunapu ngungamba yove, ngumwanove. Twaya ungulwile mumavoko amwangana waSulya namwangana wavaIsalele vaze vali nakunguzungisa.”
8 Ngocho Ahaze ambachile palata naulu muzuvo yaYehova, namuze valaminyinenga vikumba muzuvo* yamwangana, avitumine kuli mwangana waAsulya kupwa maswekeza.+
9 Mwangana waAsulya etavilile kukafwa Ahaze, ngocho ayile nakulukuka Ndamashiku nakuyitambula. Ajihile+ mwangana Lejine, kaha vatu vamunganda kana avatwalile muufunge kuKile.+
10 Mwangana Ahaze ayile kuNdamashiku nakuliwana naChingilate-pilese mwangana waAsulya. Omu amwene lijiko lyakulumbila muNdamashiku, Mwangana Ahaze atuminyine kapilishitu Uliya chifwanyisa chalize lijiko lyakulumbila, nomu valitungile.+
11 Kapilishitu Uliya+ atungile lize lijiko lyakulumbila+ kweseka najindongi vamutuminyine kuli Mwangana Ahaze kufuma kuNdamashiku. Akumishile kulitunga shimbu kanda Mwangana Ahaze akinduluke kufuma kuNdamashiku.
12 Omu mwangana afumine kuNdamashiku, amwene lize lijiko lyakulumbila vatungile, kaha apandamineko nakulumbilaho mawana.+
13 Alumbilileho mawana akulumba, namawana amanona mangana akakumuke wishi. Ahingunwinyineho nawa wana wavinyo nakusapwilaho manyinga avimuna vamawana akusolola kuunda.
14 Kaha lijiko lyakulumbila lyaunengu+ lize lyapwile kumeso aYehova alifumishile kulutwe lwazuvo, mukachi kalijiko lyenyi nazuvo yaYehova, kaha alihakile kuluhachi lwalize lijiko lyenyi lyakulumbila kunote.
15 Kaha alwezele kapilishitu Uliya+ ngwenyi: “Halijiko eli lyalinene+ ulumbilangaho mawana akulumba achimene mangana akakumukenga wishi, namawana amanona achingoloshi,+ namawana amwangana akulumba, namawana enyi amanona, namawana akulumba avatu vosena, namawana avo amanona, namawana avo avinyo. Usapwilangaho nawa manyinga avimuna amawana akulumba, namanyinga avimuna amawana eka. Oloze eli lijiko lyakulumbila lyaunengu nanguwana mwakulilingila.”
16 Kapilishitu Uliya alingile mwosena muze amulwezele Mwangana Ahaze.+
17 Mwangana Ahaze azokwele vihanda vyamatemba+ vyakujihachi nakuviteta muvihanda vihanda, afumishile nawa jimbashiya jize japwile helu.+ Kaha limbashiya lize vatumbikile hajinyima javangombe vaunengu+ alifumishileho nakulihaka hamalolwa akwala.+
18 Kaha kazuvo vazachishilenga haSambata kaze vatungile muchipango chatembele, nawingililo wamwangana avifumishile kuzuvo yaYehova nakuvinungulwila heka. Alingile ngocho mwomwo yamwangana waAsulya.
19 Mujimbu wosena waAhaze wavyuma alingile vausoneka mumukanda wamijimbu yavamyangana javaYuta.+
20 Ahaze atokele ngana mwavakakuluka jenyi, kaha vamufunjile navakakuluka jenyi hamwe muNganda yaNdavichi. Kaha mwanenyi Hezekiya*+ aswanyine hawangana.
Kwinyikila Chamwishi
^ Chipwe “vaYuta.”
^ Chipwe “munganda.”
^ Ulumbunwiso, “Yehova Eji Kujikijisanga.”
