Vamyangana 2 17:1-41
17 Hosheya+ mwanaEla aputukile kuyula vaIsalele muSamaliya mumwaka wakusokesa 12 wachiyulo chaAhaze mwangana wavaYuta, kaha ayulile myaka 9.
2 Hosheya alingilenga vyuma vyavipi kumeso aYehova, oloze keshi nge muze valingilenga vamyangana javaIsalele vaze vapwilengako shimbu kanda ikiyeko.
3 Shalamanese mwangana waAsulya anyemukilile Hosheya,+ ngocho amutengele kupwa ngamba yenyi. Kaha Hosheya aputukile kulambwilanga mwangana waAsulya milambu.+
4 Jino mwangana waAsulya atachikijile ngwenyi Hosheya ali nakusaka kumufumbukila, mwomwo atumine tunganda kuli So mwangana waEjipitu.+ Kaha alitwaminyine kumulambwilanga nawa milambu nge muze alingilenga hakavanga. Ngocho mwangana waAsulya akwachile Hosheya nakumuhaka muzuvo yaufunge.
5 Kutwala muze, mwangana waAsulya anyemukilile lifuchi lyosena, ayile nakuSamaliya, kaha ayihakile muchingombela hamyaka yitatu.
6 Mwangana waAsulya atambwile Samaliya+ mumwaka wakusokesa 9 wachiyulo chaHosheya. Atwalile vaIsalele muufunge+ muAsulya, kaha vatwaminenga muHalahe namuHavole kukalwiji Ngozane,+ namujinganda javaMete.+
7 Chuma kana chasolokele mwomwo vaIsalele valingile shili kuli Kalunga kavo Yehova uze avalowele mulifuchi lyaEjipitu mumavoko aFwalo mwangana wavaEjipitu.+ VaIsalele valemeselenga* tulunga veka,+
8 valondezezelenga vyuma valingilenga vaka-mafuchi vaze ahangile Yehova kumeso avo navize valingilenga vamyangana javaIsalele.
9 VaIsalele valingilenga vyuma vize kavyolokele kumeso aYehova Kalunga kavoko. Vatungilenga vihela vyakulunduka mujinganda javo josena,+ kufuma kukaposhi kakutalila swi nakunganda yakujingulwisa kembwe.*
10 Vajikilenga jipanda jajila jamalolwa, najipanda jajila jamitondo*+ hajipili josena, namwishi yamitondo yakujika mafwo+ yosena.
11 Valumbililenga vimuna vakuvatula havihela vyakulunduka vyosena mangana vakakumuke wishi, nge muze valingilenga vaka-mafuchi vaze ahangile Yehova kumeso avo.+ Valingilenga vyuma vyavipi mangana vamwivwise Yehova kupihya.
12 VaIsalele valemeselenga makombelo aunyengwe*+ aze Yehova avalwezele ngwenyi: “Kanda namukalinga chuma kanako.”+
13 Yehova ahuhumwinenga vaIsalele navaYuta kuhichila muli vapolofweto jenyi, navaze vamwenenga vyakumwenesa+ ngwenyi: “Sezenu jijila jenu jajipi.+ Lamenunga jishimbi jami, najindongi jami nge kutesa najishimbi josena jize ngwalwezele vakakuluka jenu, jize nawa ngwamituminyine kuhichila muli vangamba jami vapolofweto.”
14 Oloze vaIsalele kavamwivwililileko, vakakamishile michima yavo nge muze valingile* vakakuluka javo vaze kavafwelelele Yehova Kalunga kavoko.+
15 Vakanyinenga jishimbi jenyi, namazu akwanukisa aze avahuhumwinenga, kaha vahokwele lushiko+ lwenyi luze alishikile navakakuluka javo.+ Valemeselenga makombelo amokomoko,+ ngocho navakiko vapwile hivatu vamokomoko.+ Kaha valondezezele vaka-mafuchi vaze Yehova avalwezele ngwenyi kanda navavalondezezako.+
16 Vasezele jishimbi josena jaYehova Kalunga kavo, kaha vatengele vana vavangombe vavali+ vakuzuzulula, napanda yajila yamutondo.*+ Kaha valifukwilenga nawa kumayongomena amwilu osena+ nakuzachilanga Mbale.+
17 Vahichishilenga vana vavo vamalunga navava vamapwevo mukakahya,+ vatahilenga jingombo,+ vatahishilenga vitaho, vakakachililenga kukulinga vyuma vyavipi kumeso aYehova mangana vamwivwise kupihya.
18 Yehova akwachilile vaIsalele matoto, ngocho avafumishile kumeso enyi.+ Kasezeleho mutu numba umweko, shina muyachi waYuta kaha.
19 Kaha vaYuta nawa kavalaminenga jishimbi jaYehova Kalunga kavoko,+ valondezezele vyuma vize valingilenga vaIsalele.+
20 Kalunga akanyine vana vaIsalele vosena, kaha avenyishilenga nakuvahananga mumavoko avaka-kupupa palanga nomu avafumishile kumeso enyi.
21 Ahandwile vaIsalele kuzuvo yaNdavichi, ngocho vatongwele Yelovowame mwanaNevate kupwa mwangana wavo.+ Oloze ahungumwishile vaIsalele vaseze Yehova, avahungumwishile nawa valinge shili yayinene.
22 VaIsalele valingilenga jishili jize alingilenga Yelovowame.+ Valingilenga jishili kana
23 palanga nomu Yehova avafumishile kumeso enyi nge muze ahanjikile kuhichila muli vangamba jenyi vapolofweto.+ Ngocho vaIsalele vavafumishile mulifuchi lyavo nakuvatwala muundungo muAsulya,+ kaha vanatwamengamo palanga nakulikumbi lyalelo.
24 Jino mwangana waAsulya anehele vatu vakuMbavilone, nakuKuta, nakuAva, nakuHamate, nakuSefwalavaime+ mangana vatwame mujinganda jamuSamaliya muchishishisa chakutwamamo vaIsalele. Ngocho vahetele Samaliya nakutwamanga mujinganda jayo.
25 Omu vaputukile kutwama muze mujinganda, kavevwilenga woma* Yehovako. Ngocho Yehova atuminenga vandumba+ kaha vajihilenga vatu.
26 Jino mwangana waAsulya vamulwezele ngwavo: “Vaka-mafuchi vaze unanehe mujinganda jaSamaliya kavatachikiza mwakulemesela Kalunga wamulifuchi kanako. Shikaho ali nakuvatumina vandumba mangana vajihe vatu, mwomwo kavatachikiza mwakulemesela Kalunga wamulifuchi kanako.”
27 Ngocho mwangana waAsulya ambile ngwenyi: “Kasanyikenu kapilishitu umwe havatu vaze mwatwalile muufunge ezenga nakutwama navatu mangana avanangule mwakulemesela Kalunga wamulifuchi kana.”
28 Ngocho kapilishitu umwe havatu vaze vafumishile muSamaliya, akindulukile nakutwama muMbetele,+ kaha aputukile kunangula vatu mwakwivwila woma* Yehova.+
29 Oloze vaka-mafuchi vatengelenga tulunga twavo, kaha vavahakilenga mujizuvo jakulemesela jize japwile havihela vyakulunduka vize vatungile vatu vamuSamaliya. Vaka-mafuchi valitengelele tulunga twavo mujinganda muze vatwaminenga.
30 Vatu vakuMbavilone vatengele kalunga kavo Sukote-mbenote, vatu vakuKuta vatengele kalunga kavo Nelengale, vatu vakuHamate+ vatengele kalunga kavo Ashima,
31 vatu vakuAva vatengele kalunga kavo Nyivaze naTalatake. Kaha vatu vakuSefwalavaime+ valumbilenga vana vavo vamalunga mukakahya kuli kalunga kavo Atalameleke naAnameleke.
32 Numba tuhu vatu vamwivwilenga Yehova woma, oloze vatongwelenga vapilishitu kufuma havatu vamuchivulu mangana vavatwilenga vimuna mujizuvo jakulemesela jize japwilenga havihela vyakulunduka.+
33 Vatu vevwilenga Yehova woma, oloze vapwile nakulemesa tulunga twavo kweseka nakwitava* chakumafuchi avo vafumine.+
34 Vatu kana vanakavangizanga kwitava* chavo chamwaka palanga nakulelo. Kakweshi mutu umwe nalemesanga* Yehova chipwe kukavangiza jindongi jenyi, namazu enyi akuyula, naJishimbi jenyi jize Yehova ahanyine vana vaYakova ukwechi lijina lyenyi valumwine ngwavo Isaleleko.+
35 Omu Yehova alishikile navo lushiko,+ avalwezele ngwenyi: “Kanda namukevwa tulunga veka womako, chipwe kulifukula kuvakiko, chipwe kuvazachila, chipwe kuvavatwila vimuna vakuvatulako.+
36 Oloze ivwenunga Yehova woma+ Ou amilowele mulifuchi lyaEjipitu nalivoko lyenyi lyaundume,+ lyangolo. Lifukulenunga kuli ikiye, kaha muvatwilenunga vimuna vakuvatula.
37 Lamenunga jindongi jenyi, namazu enyi akuyula, naJishimbi jenyi vize amisonekelele.+ Kanda namukevwa tulunga veka womako.
38 Kanda namukavulyama lushiko luze ngwalishikile nayenuko.+ Kaha kanda namukevwa tulunga veka womako.
39 Oloze mwivwenunga Yehova Kalunga kenu woma mwomwo ikiye mwamilwilanga mumavoko avaka-kole jenu vosena.”
40 Oloze vaka-mafuchi kavamwononokeleko, vakavilenga kwitava* chavo chamwaka.+
41 Numba tuhu vevwilenga Yehova woma,+ oloze valifukwilenga kumakombelo avo akusonga. Vana vavo navazukulu javo vanalinginga nge muze valingilenga vakakuluka javo palanga nakulelo.
Kwinyikila Chamwishi
^ Hepe., “vevwilenga woma.”
^ Kulumbununa, kuvihela vyosena vize vyapwile navatu vavandende navize vyapwile navatu vavavulu.
^ Tala Mukana waMazu.
^ Lizu lyachiHepeleu vazachisa hano linahase kutalisa “kutuji,” kaha valizachisa kuvyuma vyakwivwisa unyengwe.
^ Hepe., “vakakamishile jishingo javo nge jishingo.”
^ Tala Mukana waMazu.
^ Chipwe “kavalemeselenga.”
^ Chipwe “mwakulemesela.”
^ Chipwe “kweseka navilika vyamukwitava.”
^ Hepe., “nevunga woma.”
^ Chipwe “vilika vyamukwitava.”
^ Chipwe “vilika vyamukwitava.”
