Vamyangana 2 18:1-37
18 Hezekiya+ mwanaAhaze+ mwangana wavaYuta aputukile kuyula muYelusalema mumwaka wamuchitatu wachiyulo chaHosheya+ mwanaEla mwangana wavaIsalele.
2 Hezekiya aputukile kuyula omu apwile namyaka yakusemuka 25, kaha ayulile myaka 29 muYelusalema. Lijina lyanaye apwile ikiye Avi* mwanaZekaliya.+
3 Hezekiya alingilenga vyuma vyakwoloka kumeso aYehova+ nge muze alingilenga kakuluka yenyi Ndavichi.+
4 Ikiye afumishile vihela vyakulunduka,+ nakupuzula jipanda jajila jamalolwa, nakuteta panda yajila yamutondo.*+ Achikile nawa linoka waunengu uze atengele Mose,+ mwomwo kufuma halikumbi lize amutengele, vaIsalele vamulumbililenga vimuna mangana vakakumuke wishi. Uze linoka vamuvulukilenga ngwavo likombelo lyalinoka waunengu.*
5 Hezekiya afwelelele Yehova+ Kalunga kaIsalele. Kaha kunyima chipwe kulutwe kakwapwile mwangana wavaYuta weka wakufwana nge ikiyeko.
6 Hezekiya akakachililenga kuli Yehova,+ kaha kalitwaminyine kumukavangizako, oloze alaminenga jishimbi jize Yehova ahanyine Mose.
7 Yehova apwilenga naikiye, kaha alingilenga mwamwaza kweshokwo ayilenga. Hezekiya alikangile kuli mwangana waAsulya nakukana kumuzachila.+
8 Afungulwile nawa vaFwilishite+ swi nakuNgaza najingalila jayo, kufuma kukaposhi kakutalila swi nakunganda yakujingulwisa kembwe.*
9 Jino Shalamanese mwangana waAsulya anyemukilile Samaliya nakuyihaka muchingombela mumwaka wamuchiwana wachiyulo chaMwangana Hezekiya, ukiko mwaka wakusokesa 7 wachiyulo chaHosheya+ mwanaEla mwangana wavaIsalele.+
10 Vatambwile Samaliya+ mumwaka wamuchitatu kufuma haze vayihakile muchingombela. Vayitambwile mumwaka wakusokesa 6 wachiyulo chaHezekiya, ukiko mwaka wakusokesa 9 wachiyulo chaHosheya mwangana wavaIsalele.
11 Mwangana waAsulya atwalile vaIsalele muufunge+ muAsulya, kaha vatwaminenga muHalahe namuHavole kukalwiji Ngozane, namujinganda javaMete.+
12 Vyuma kanevi vyasolokele mwomwo vaIsalele kavevwililile mulizu lyaYehova Kalunga kavoko. Vahonene kulama lushiko lwenyi, vyuma vyosena vize vavalwezele kuli Mose ngamba yaYehova.+ Kavamwivwililile chipwe kumwononokako.
13 Senakelive mwangana waAsulya+ alukukile jinganda jakukingiwa josena jamuYuta nakujitambula+ mumwaka wakusokesa 14 wachiyulo chaMwangana Hezekiya.
14 Jino Hezekiya mwangana wavaYuta atumine mazu kuli mwangana waAsulya kuLakishe ngwenyi: “Ami yami ngunapihisa. Shikaho kinduluka, kanda naungunyemukilako, nangukuhana vyeshovyo mungutomena.” Mwangana waAsulya atomenene Hezekiya mwangana wavaYuta jitalende* japalata 300, najitalende jaulu 30.
15 Kaha Hezekiya amuhanyine palata yosena yize yapwile muzuvo yaYehova, namuze valaminyinenga vikumba muzuvo* yamwangana.+
16 Halwola luze, Hezekiya mwangana wavaYuta afumishile* mapito akutembele+ yaYehova, navipamba vize ashilile ulu,+ kaha ahanyine ulu kana kuli mwangana waAsulya.
17 Jino mwangana waAsulya atumine Talatane,* naLavesalise,* naLavashake* kufuma kuLakishe+ mangana vayenga kuYelusalema kuli Mwangana Hezekiya. Vayile kuYelusalema+ naliyongomena lyamaswalale, kaha vakemanyine kukapila wameya uze afumine hachijiva chahamulundu uze wapwile kujila, kuchipapa chamuka-kutomesa mahina.+
18 Omu vasanyikile mwangana alovoke, kwalovokele Elyakime+ mwanaHilikiya uze apwile muka-kutala zuvo* yamwangana, naShevene+ muka-kusoneka, naYowa mwanaAsafwe uze apwile muka-kulama mijimbu yawangana.
19 Jino Lavashake ambile kuli vakiko ngwenyi: “Kamulwezenu Hezekiya ngwenu, ‘Mwangana wamunene, mwangana waAsulya nambe ngwenyi: “Uno haka unajiki muchima wove?+
20 Unambe ngwove, ‘Nguli nangolo najijila jakuzungilamo jita,’ oloze ijiva ngwove mazu ove anapu amokomoko. Iya unafwelela numba ulikange kuli ami?+
21 Unafwelela Ejipitu, lihongo lyakufunyuka,+ lize nalihasa kutuva mulivoko lyamutu uze mwalijikililaho namavoko enyi. Omu mukiko mwanapu Fwalo mwangana waEjipitu kuli vosena vaze navamufwelela.
22 Kachi nge mungulweza ngwove, ‘Tunafwelela Yehova Kalunga ketu,’+ uno ou Kalunga kenu keshi ikiye mwenyavihela vyakulunduka namajiko akulumbila vize unafumisako nyi?+ Kaha unambe kuli vatu vamuYuta namuYelusalema ngwove, ‘Lifukwilenu kulijiko lyakulumbila eli lili muYelusalema.’”’+
23 Ngocho lipechenu namwata wami mwangana waAsulya, kaha ami nangukuhana tuvalu 2,000 tumone nge nauwana vaka-kuvatambukisa.+
24 Numba nge mwangana waEjipitu mwakuhana matemba ajita navaka-kutambukila hatuvalu, kaweshi kuhasa kufungulula numba kapitau umwe ali mwishi yavangamba jamwata wamiko.
25 Kangwejile nakunongesa nganda yino chakuzeneka lisesa lyakufuma kuli Yehovako. Yehova ikiye angulwezanga ngwenyi, ‘Yako ukanyemukile lifuchi kana nakulinongesa.’”
26 Ngocho Elyakime mwanaHilikiya, naShevene,+ naYowa vambile kuli Lavashake+ ngwavo: “Hanjika kuli etu vangamba jove mulilimi lyaAlamayiki,*+ mwomwo natwivwako. Kanda nauhanjika kuli etu mulilimi lyavaYuleya lize navevwa navatu vaze vali hakembweko.”+
27 Oloze Lavashake ambile kuli vakiko ngwenyi: “Uno mwata wami nangutumu nguhanjike kaha kuli enu nakuli mwata wenu numba? Vanangutumu nguhanjike nakuli vatu ava vanatwame hakembwe, ava navakalya tuji twavo nakunwa masu avo hamwe nayenu.”
28 Jino Lavashake emanyine nakutambakana mulilimi lyavaYuleya ngwenyi: “Ivwenu mazu amwangana wamunene, mwangana waAsulya.+
29 Mwangana nambe ngwenyi, ‘Kanda namwitavila Hezekiya amyongeko, mwomwo keshi kuhasa kumiyovola mulivoko lyamiko.+
30 Hezekiya kanda amilingisa mufwelele Yehova hakwamba ngwenyi: “Yehova mwatuyovola, kaha yino nganda nawa kaveshi kuyihana mumavoko amwangana waAsulyako.”+
31 Kanda namwivwilila Hezekiyako, mwomwo mwangana waAsulya nambe ngwenyi: “Sumenu kupoko mangana mupwenga mukuunda nayami. Kaha mutu himutu mwalyanga kumuvinyo wenyi, nakumukuyu wenyi, mwanwanga nawa meya amulishima lyenyi,
32 palanga nomu nangukeza nakumitwala mulifuchi lyakufwana nge lifuchi lyenu,+ lifuchi lyamanona, navinyo vyavihya, najimbolo, namande amivinyo, namilive, nauchi. Namukayoyanga lika, kamweshi kukafwako. Kanda namwivwilila Hezekiya uze ali nakwamba ngwenyi, ‘Yehova mwatuyovola,’ mwomwo mwamihungumwisa.
33 Uno tulunga vamumafuchi eka vahashile kulwila mafuchi avo kuli mwangana waAsulya nyi?
34 Uno tulunga vakuHamate+ nakuAlapate vali kulihi? Nyi tulunga vakuSefwalavaime,+ nakuHena, nakuIva vali kulihi? Kutala vahashile kulwila Samaliya kulivoko lyami numba?+
35 Hatulunga vosena vamumafuchi, kalunga muka alwilile lifuchi lyenyi kulivoko lyami numba Yehova alwile Yelusalema kulivoko lyami?”’”+
36 Oloze vaholele kulu, kavamukumbulwile lizu numba limweko, mwomwo mwangana avalwezele ngwenyi: “Kanda namukamukumbululako.”+
37 Jino Elyakime mwanaHilikiya uze apwile muka-kutala zuvo* yamwangana, naShevene muka-kusoneka, naYowa mwanaAsafwe uze apwile muka-kulama mijimbu yawangana vapihililile nakupula uvwalo wavo, kaha vayile kuli Hezekiya nakumulweza mazu osena ahanjikile Lavashake.
Kwinyikila Chamwishi
^ Lijina lyaAviya mukavatu.
^ Tala Mukana waMazu.
^ Chipwe “vamuvulukilenga ngwavo Nehushutane.”
^ Kulumbununa, kuvihela vyosena vize vyapwile navatu vavandende navize vyapwile navatu vavavulu.
^ Talende yimwe yapwile jikilongalamu 34.2. Tala Chihande B14.
^ Chipwe “munganda.”
^ Hepe., “atetele.”
^ Chipwe “mukulwane wamaswalale.”
^ Chipwe “namukulwane wavilolo jamwangana.”
^ Chipwe “namukulwane wavaka-kuhana lupasa.”
^ Chipwe “nganda.”
^ Chipwe “lyavaSulya.”
^ Chipwe “nganda.”
