Vamyangana 2 2:1-25
2 Omu Yehova apwile kwakamwihi nakuzundula Elija+ napeho yanyamanganda+ mangana amutwale mwilu,* Elija naElisha+ vayile ungeji wavo kufuma kuNgilingale.+
2 Jino Elija ambile kuli Elisha ngwenyi: “Achitwame hano, mwomwo ami vanangutumu kuli Yehova nguyenga kuMbetele.” Oloze Elisha ambile ngwenyi: “Omu ayoya Yehova tu, nomu wayoya yove,* kuvanga nanguya nove.” Ngocho vayile hamwe kuMbetele.+
3 Jino vana vavapolofweto* vaze vapwile kuMbetele, vejile kuli Elisha nakwamba ngwavo: “Uno unatachikiza ngwove lelo Yehova mwakutambula mwata wove ou ali nakukutwaminyina nyi?”+ Elisha ambile ngwenyi: “Ngunatachikiza vene ngocho. Enu holenu kulu.”
4 Jino Elija ambile kuli Elisha ngwenyi: “Achisale hano, mwomwo ami vanangutumu kuli Yehova nguyenga kuYeliko.”+ Oloze Elisha ambile ngwenyi: “Omu ayoya Yehova tu, nomu wayoya yove,* kuvanga nanguya nove.” Ngocho vayile hamwe kuYeliko.
5 Jino vana vavapolofweto vaze vapwile kuYeliko, vapandamine kuli Elisha nakwamba ngwavo: “Uno unatachikiza ngwove lelo Yehova mwakutambula mwata wove ou ali nakukutwaminyina nyi?” Elisha ambile ngwenyi: “Ngunatachikiza vene ngocho. Enu holenu kulu.”
6 Elija ambile cheka kuli Elisha ngwenyi: “Achisale hano, mwomwo ami vanangutumu kuli Yehova nguyenga kuYotau.” Oloze Elisha ambile ngwenyi: “Omu ayoya Yehova tu, nomu wayoya yove,* kuvanga nanguya nove.” Ngocho vosena vayile hamwe kuYotau.
7 Kaha vana vavapolofweto vakuheta ku 50 navakiko vayile kuYotau, vakemanyine hahasuku nakutala vaElija naElisha vaze vemanyine kungenge yaYotau.
8 Jino Elija ambachile chikuto chenyi,+ achihosele nakuchiveta hameya, kaha meya akingamine, awa kuchimoswe awa kuchilyo. Ngocho vosena vazaukile hamavu aumu.+
9 Omu vahetele musali, Elija ambile kuli Elisha ngwenyi: “Ngulombe vyeshovyo nausaka ngukulingile shimbu kanda Kalunga anguhandule kuli ove.” Elisha ambile ngwenyi: “Nguhaneko shipilitu* yize akuhana Kalunga.”+
10 Elija ambile kuli ikiye ngwenyi: “Unangulombo chuma chachikalu. Kachi nge naungumona omu navanguhandula kuli ove, kaha shipilitu nayiza hali ove, oloze nge kaweshi kungumonako, kaha shipilitu kayeshi kwiza hali oveko.”
11 Omu vapwile nakutambuka oku vali nakushimutwila, vamwene litemba natuvalu vize vyasolokele nge kakahya.+ Lize litemba natuvalu vyavahandunwine, kaha Elija vamumbachile napeho yanyamanganda nakuya mwilu.*+
12 Omu Elisha amwene chuma kana atambakanyine ngwenyi: “Ove mwata, ove mwata! Tala litemba lyaIsalele natuvalu twenyi!”+ Omu alingile Elija hanajimbangana lyehi, Elisha azulile chikuto chenyi nakuchipula hakachi.+
13 Kufumaho ambachile chikuto+ chaElija chize chaholokele hamavu, kaha ayile nakwimana kungenge yaYotau.
14 Elisha akwachile chize chikuto chaElija, achivetele hameya nakwamba ngwenyi: “Uno Yehova Kalunga kaElija ali kulihi?” Omu avetele chize chikuto hameya, meya akingamine, awa kuchimoswe awa kuchilyo. Ngocho Elisha azaukile hamavu aumu.+
15 Omu vana vavapolofweto vakuYeliko vamumwene ali nakwiza, vambile ngwavo: “Shipilitu yaElija yili hali Elisha.”+ Ngocho vamusesele, kaha vafukamine hamavu kumeso enyi.
16 Vaze vapolofweto vambile kuli ikiye ngwavo: “Etu vangamba jove tuli navingazule vamalunga 50. Twitavise tuvatume vakatondetonde mwata wove Elija. Pamo shipilitu* yaYehova yinamuzundula nakumumbila kupili yimwe chipwe kuchinema chimwe.”+ Oloze Elisha avalwezele ngwenyi: “Kanda namuvatumako.”
17 Vakiko vamushinjilile lika, kaha evwile chipekete nakwamba ngwenyi: “Vatumenu.” Ngocho vatumine vaze malunga 50, vatondele Elija hamakumbi atatu, oloze kavamuwanyineko.
18 Omu vakindulukile kuli ikiye kuYeliko+ kuze atwaminenga, ambile kuli vakiko ngwenyi: “Ngwetu ngwamilwezanga ngwami kanda namuyako.”
19 Omu mwahichile makumbi, malunga vamunganda vambile kuli Elisha ngwavo: “Ove mwata wetu, nayove unamono vene ngwove nganda yetu yatwamina hachihela chamwaza,+ oloze meya amapi, kahechi chinalingisa mapwevo vamungalila yetu kupwa vomba.”*
20 Elisha ambile ngwenyi: “Ngunehelenu chiloso chachihya, muhakemo namungwa.” Kaha vamunehelelecho.
21 Elisha ayile kukasulu kameya, ambililemo mungwa+ nakwamba ngwenyi: “Yehova nambe ngwenyi, ‘Meya awa ngunawatomesa lyehi. Kaweshi kukaneha kufwa chekako, chipwe kuneha umbako.’”*
22 Meya kana apwa atoma nakulikumbi lyalelo nge muze ahanjikile Elisha.
23 Elisha afumine kuze nakuya kuMbetele. Kahomu apwile nakuya mujila, vanyike vamwe vamunganda yize vaputukile kumusekeleka+ ngwavo: “Ove lunga walwanja yakonga! Ove lunga walwanja yakonga!”
24 Ngocho Elisha anyingulukile nakuvatala, kaha avangwile halijina lyaYehova. Jino mumusenge mwafumine vaulusu+ vavihwevo vavali, vatanyine vanyike 42.+
25 Kaha Elisha ayile kuPili yaKalamele,+ kufumaho akindulukile kuSamaliya.
Kwinyikila Chamwishi
^ Chipwe “amutwale muutangatanga.”
^ Chipwe “mwono wove.”
^ Mazu akwamba ngwavo, “vana vavapolofweto” pamo atalikisa kushikola yakulinangula jindongi javapolofweto chipwe kulizavu lyavapolofweto.
^ Chipwe “mwono wove.”
^ Chipwe “mwono wove.”
^ Chipwe “Nguhaneko vyazano vivali vyashipilitu.”
^ Chipwe “nakuya muutangatanga.”
^ Chipwe “peho.”
^ Chipwe pamo, “kupihisa majimo.”
^ Chipwe pamo, “kupihisa majimo.”
