Vamyangana 2 20:1-21
20 Hamakumbi aze, Hezekiya avijile chikuma, kaha hasalile hahandende nakufwa.+ Jino kapolofweto Isaya mwanaAmoze ejile kuli ikiye nakumulweza ngwenyi, “Yehova nambe ngwenyi: ‘Shika vaze vakuzuvo yove, mwomwo naufwa, kaweshi kuyoyako.’”+
2 Ngocho Hezekiya alumukile nakutala kumbango, kaha alombele kuli Yehova ngwenyi:
3 “Ngunakulembelela ove Yehova, achanuke omu ngunakuzachilanga nakashishi namuchima wami wosena. Ngunalinginga vyuma vyamwaza kumeso ove.”+ Kaha Hezekiya alilile chikuma.
4 Shimbu apwile Isaya kanda ahete muchipango chamukachi chakuzuvo yamwangana, Yehova ahanjikile kuli ikiye ngwenyi:+
5 “Kinduluka kuli twamina yavatu jami Hezekiya umulweze ngwove, ‘Yehova Kalunga kakakuluka yove Ndavichi nambe ngwenyi: “Kulomba chove ngunachivu, masoji ove nawa ngunawamono.+ Shikaho nangukuhindula.+ Kaha halikumbi lyamuchitatu nauya kuzuvo yaYehova.+
6 Kukuyoya chove nanguhakilako myaka 15, kaha nangukuyovola mumavoko amwangana waAsulya+ nakulwila nganda yino. Nangukinga nganda yino mwomwo yalijina lyami nangamba yami Ndavichi nawa.”’”+
7 Isaya ambile ngwenyi: “Nehenu chindanda chajikuyu jaumu.” Kaha vanehele chize chindanda, vachishilile halihute lize apwile nalyo. Ngocho Hezekiya ahindukile chikoki chikoki.+
8 Hezekiya ahulishile Isaya ngwenyi: “Chinjikizo muka+ naunguhana chakwijivilaho nge Yehova mwanguhindula, kaha halikumbi lyamuchitatu nanguya kuzuvo yaYehova?”
9 Isaya amukumbulwile ngwenyi: “Echi chikiko chinjikizo chakufuma kuli Yehova chakwijivilaho nge Yehova mwatesamo mazu nahanjika: Nausaka muvwimbimbi uli hajindondelo* uyenga kulutwe vimango 10 tahi, nyi uhiluke vimango 10 kunyima?”+
10 Jino Hezekiya ambile ngwenyi: “Chachashi muvwimbimbi kuya kulutwe vimango 10, oloze chachikalu muvwimbimbi kuhiluka vimango 10 kunyima.”
11 Ngocho kapolofweto Isaya alombele kuli Yehova, kaha alingishile uze muvwimbimbi wapwile hajindondelo jaAhaze uhiluke vimango 10 kunyima omu walingile hiunashikumuka lyehi hajindondelo.+
12 Jino mwangana waMbavilone Mbelotake-mbalatane mwanaMbalatane atumine mikanda nawana kuli Hezekiya mwomwo evwile ngwavo Hezekiya ali nakuviza.+
13 Hezekiya atambwile* vaze vanehele mikanda, kaha avalwekesele vyuma vyosena vyamuze alaminyinenga vikumba.+ Avalwekesele palata, naulu, namaji ambalasamu, namaji eka andando yayinene, nazuvo yenyi yakulamina vyuma vyajita, navyuma vyosena vize vyapwile muze alaminyinenga vikumba vyenyi. Kakwapwile chuma numba chimwe azenekele Hezekiya kuvalwekesa muzuvo* yenyi chipwe muwangana wenyiko.
14 Kapolofweto Isaya ejile kuli Mwangana Hezekiya, kaha amwihwile ngwenyi: “Vaze malunga vafumanga kulihi, kaha vakulwezanga ika?” Hezekiya amukumbulwile ngwenyi: “Vafumanga kulifuchi lyakwakusuku, kuMbavilone.”+
15 Amwihwile cheka ngwenyi: “Vyuma muka vamonanga muzuvo* yove?” Hezekiya amukumbulwile ngwenyi: “Vamonanga vyuma vyamuzuvo* yami vyosena. Kakweshi chuma numba chimwe ngwazenekanga kuvalwekesa muze ngweji kulaminanga vikumbako.”
16 Jino Isaya ambile kuli Hezekiya ngwenyi: “Yehova nambe ngwenyi,+
17 ‘Tala! Makumbi ali nakwiza omu vyuma vyamuzuvo* yove vyosena navize vakungulwile vakakuluka jove navakavimbata nakuvitwala kuMbavilone.+ Kakweshi chuma numba chimwe nachikasalahoko.’ Omu mukiko mwanambe Yehova.
18 ‘Kaha vana vove vamwe naukasema navakavambata,+ kaha navakapwanga vilolo kuzuvo yamwangana waMbavilone.’”+
19 Ngocho Hezekiya ambile kuli Isaya ngwenyi: “Mazu nahanjika Yehova anawahe.”+ Kaha ambile cheka ngwenyi: “Nachiwaha nge vatu navatwamanga mukuunda nakupwa vakukingiwa hamakumbi akuyoya chami.”+
20 Mujimbu wosena waHezekiya wakuvuluka ngolo jenyi navyuma alingile, nomu afulile chijiva+ nakapila uze anehelenga meya munganda+ vausoneka mumukanda wamijimbu yavamyangana javaYuta.
21 Hezekiya atokele ngana mwavakakuluka+ jenyi. Kaha mwanenyi Manase+ aswanyine hawangana.+
Kwinyikila Chamwishi
^ Pamo eji jindondelo vajizachishilenga hakulava lwola, nge omu navazachisa kalikina kakulava lwola.
^ Chipwe “munganda.”
^ Chipwe “evwililile.”
^ Chipwe “munganda.”
^ Chipwe “vyamunganda.”
^ Chipwe “vyamunganda.”