Vamyangana 2 21:1-26
21 Manase+ aputukile kuyula omu apwile namyaka yakusemuka 12, kaha ayulile myaka 55 muYelusalema.+ Lijina lyanaye apwile ikiye Hefwejiva.
2 Manase alingilenga vyuma vyavipi kumeso aYehova. Alingilenga vyuma vyaunyengwe vize valingilenga vaka-mafuchi+ vaze ahangile Yehova kumeso avaIsalele.+
3 Atungulwile vihela vyakulunduka vize apuzwile+ ise Hezekiya. Atungilile Mbale majiko akulumbila, atungile napanda yajila yamutondo*+ nge muze alingile Ahave+ mwangana wavaIsalele. Alifukwilenga kumayongomena amwilu osena nakuwazachilanga.+
4 Atungile nawa majiko akulumbila muzuvo yaYehova+ yize ahanjikile Yehova ngwenyi: “MuYelusalema mukiko navavulukilanga lijina lyami.”+
5 Atungilile mayongomena amwilu+ majiko akulumbila muvipango vivali vyakuzuvo yaYehova.+
6 Manase alumbile mwanenyi mukakahya, alingilenga visava, atahishilenga vitaho,+ atongwelenga vaka-kutahisa vashipilitu, navaka-kulweza vyuma vyakulutwe.+ Alingilenga vyuma vyavipi vyavivulu kumeso aYehova mangana amwivwise kupihya.
7 Kaha likombelo lyakusonga lyapanda yajila yamutondo*+ lize atengele alihakile muzuvo yize ahanjikile Yehova kuli Ndavichi nakuli mwanenyi Solomone ngwenyi: “Muzuvo yino, naYelusalema eyi ngunasakula mumiyachi yavaIsalele yosena, navavulukilangamo lijina lyami haya myaka yosena.+
8 Kachi nge vaIsalele navalama vyuma vyosena ngwavalwezele,+ nge navalama Jishimbi josena jize avahanyine ngamba yami Mose, kaha kangweshi kukavakimbisa cheka mulifuchi lize ngwahanyine kuli vakakuluka javoko.”+
9 Oloze vaIsalele kavononokeleko, kaha Manase avahungumwishile nakuvalingisa valinge vyuma vyavipi chikuma kuhambakana vize valingilenga vaka-mafuchi vaze anongesele Yehova kumeso avo.+
10 Yehova ahanjikilenga kuhichila muli vangamba jenyi vapolofweto+ ngwenyi:
11 “Manase mwangana wavaYuta nalinginga vyuma vyosenevi vyaunyengwe. Nalinginga vyuma vyavipi chikuma kuhambakana vize valingilenga vaAmole.+ Kaha ahungumwishile+ vaYuta valinge shili hakulemesa makombelo enyi aunyengwe.*
12 Shikaho Yehova Kalunga kaIsalele nambe ngwenyi: ‘Nangukaneha lupi haYelusalema+ naYuta, kaha weshowo mwakevwa lupi kana mwakalikomokela.*+
13 Nangukapima Yelusalema namukole wakupimisa+ uze ngwapimishile Samaliya,+ nakuzachisa chinoma chakusalamisa* chize ngwazachishile kuzuvo yaAhave.+ Nangukatomesa Yelusalema nge omu mutu mwatomesa chiloso chenyi nakuchifulumika.+
14 Nangukasuvilila vatu jami vaze vanasaleho+ nakuvahana mumavoko avaka-kole javo, kaha navakavapupa nakuvatwala muufunge kuli vaka-kole javo,+
15 mwomwo vanalinginga vyuma vyavipi kumeso ami, kaha nawa vanangwivwisanga kupihya kufuma halikumbi lize valovokele vakakuluka javo mulifuchi lyaEjipitu palanga nakulikumbi lyalelo.’”+
16 Manase amwangilenga nawa manyinga amavulu avatu vakuzeneka mulonga, palanga nomu azalishile Yelusalema namanyinga kufuma kusongo yimwe swi nakusongo yikwavo.+ Awezelele kushili yenyi yize ahungumwishile vaYuta valinge vyuma vyavipi kumeso aYehova.
17 Mujimbu wosena wavyuma alingile Manase najishili jenyi vausoneka mumukanda wamijimbu yavamyangana javaYuta.
18 Manase atokele ngana mwavakakuluka jenyi, kaha vamufunjile mumilemba yakuzuvo yenyi, mumilemba yaUza.+ Kaha mwanenyi Amone aswanyine hawangana.
19 Amone+ aputukile kuyula omu apwile namyaka yakusemuka 22, kaha ayulile myaka yivali muYelusalema.+ Lijina lyanaye apwile ikiye Meshulemete mwanaHaluze wakuYotova.
20 Amone alingilenga vyuma vyavipi kumeso aYehova nge muze alingilenga ise Manase.+
21 Amone akavilenga jijila jaise josena, kaha alemeselenga makombelo aunyengwe aze alemeselenga ise.+
22 Asezele Yehova Kalunga kavakakuluka jenyi, katambukilenga mujijila jaYehovako.+
23 Kutwala muze vangamba jenyi vamufumbukilile nakumujihila muzuvo yenyi.
24 Oloze vatu vamulifuchi lize vajihile vangamba vaze vafumbukilile mwangana Amone. Kaha vaswanyishile mwanenyi Yoshiya hawangana waise.+
25 Mujimbu wosena wavyuma alingile Amone vausoneka mumukanda wamijimbu yavamyangana javaYuta.
26 Amone vamufunjile muchimbumbe chenyi mumilemba yaUza.+ Kaha mwanenyi Yoshiya+ aswanyine hawangana.
Kwinyikila Chamwishi
^ Tala Mukana waMazu.
^ Tala Mukana waMazu.
^ Lizu lyachiHepeleu vazachisa hano linahase kutalisa “kutuji,” kaha valizachisa kuvyuma vyakwivwisa unyengwe.
^ Hepe., “matwitwi enyi nawakawemuna.”
^ Chipwe “lungoji lwakupimisa lwakuzezalala.”
