Vamyangana 2 22:1-20
22 Yoshiya+ aputukile kuyula omu apwile namyaka yakusemuka 8, kaha ayulile myaka 31 muYelusalema.+ Lijina lyanaye apwile ikiye Yechita mwanaAtaya wakuMbozokate.+
2 Yoshiya alingilenga vyuma vyakwoloka kumeso aYehova, akavilenga jijila josena jakakuluka yenyi Ndavichi,+ kaha kahandukilile kuchilyo chipwe kuchimosweko.
3 Mumwaka wakusokesa 18 wachiyulo chaMwangana Yoshiya, Yoshiya atumine muka-kusoneka Shafwane mwanaAzaliya, Azaliya mwanaMeshulame ayenga kuzuvo yaYehova.+ Amulwezele ngwenyi:
4 “Yako kuli kapilishitu wakulitulaho Hilikiya,+ umulweze akungulule jimbongo jize vananehe kuzuvo yaYehova+ jize vaka-kulama kuvikolo vanatambula kuvatu.+
5 Jimbongo kana vajihane kuli vaze vatongola kutala mulimo wakuzuvo yaYehova, kaha vakiko vajihane nawa kuli vaka-kuzata mulimo wakuwahisa haze hanalyenyeka* kuzuvo yaYehova,+
6 vajihane kuli vitotombwe, nakuli vaka-kutunga, nakuli vaka-kwola malolwa. Kaha vajilande nawa maliva namalolwa akuwahishisa zuvo.+
7 Oloze kanda kuvahulisa vambulule muvanazachishila jimbongo vanavahaneko, mwomwo malunga kana vanapu vakashishi.”+
8 Jino kapilishitu wakulitulaho Hilikiya alwezele Shafwane muka-kusoneka+ ngwenyi: “Ngunawane mukanda waJishimbi+ muzuvo yaYehova.” Ngocho Hilikiya ahanyine Shafwane uze mukanda, kaha autangile.+
9 Kaha Shafwane muka-kusoneka ayile kuli mwangana, amulwezele ngwenyi: “Etu vangamba jove tunambate jimbongo jize japwanga muzuvo yaKalunga, kaha tunajihane kuli vaze vatongola kutala mulimo wakuzuvo yaYehova.”+
10 Shafwane muka-kusoneka alwezele nawa mwangana ngwenyi: “Kapilishitu Hilikiya nanguhane mukanda.”+ Kaha Shafwane atangile uze mukanda kumeso amwangana.
11 Omu mwangana evwile mazu amumukanda waJishimbi, apihililile nakupula uvwalo wenyi.+
12 Kaha alwezele kapilishitu Hilikiya, naAhikame mwanaShafwane, naAkavole+ mwanaMikaya, naShafwane muka-kusoneka, naAsaya ngamba yamwangana ngwenyi:
13 “Yenunga mukangwihwile kuli Yehova, nakwihwilako nawa vatu ava, navaYuta vosena hamazu amumukanda ou vanawane. Yehova natukwachila matoto amanene chikuma+ mwomwo vakakuluka jetu kavononokele mazu amumukanda ou nakulinga vyuma vyosena vasoneka vize vatulwezele kulingako.”
14 Ngocho kapilishitu Hilikiya, naAhikame, naAkavole, naShafwane, naAsaya vayile kuli kapolofweto+ Huluta. Huluta apwile pwevo lyaShalume mwanaChikiva, Chikiva mwanaHalahase uze apwile muka-kulama kapete kakutulikila uvwalo. Huluta atwaminenga Mundandanda Yayihya muYelusalema, kaha vahanjikile nenyi kuze.+
15 Huluta ambile kuli vakiko ngwenyi: “Yehova Kalunga kaIsalele nambe ngwenyi, ‘Lwezenu mutu ou namitumu kuli ami ngwenu:
16 “Yehova nambe ngwenyi, ‘Nanguneha lupi hanganda yino nahali vatu vatwamamo, nge omu munayi mazu osena vasoneka mumukanda ou natange mwangana wavaYuta.+
17 Hakuwana nge vananguseze nakulumbila tulunga veka+ vimuna vakuvatula mangana vangwivwise kupihya navilinga vyavo,+ shikaho utenu wami nawiza hanganda yino, kaha kaweshi kukumako.’”+
18 Oloze lwezenu mwangana wavaYuta uze namitumu mumwihwile kuli Yehova ngwenu, “Yehova Kalunga kaIsalele nambe kuli ove kutalisa kumazu awa unevu ngwenyi:
19 ‘Hakuwana nge unavwovuwisa muchima wove nakulinyisa+ kumeso ayami Yehova hakwivwa omu ngunahanjika hanganda yino nahali vatu vatwamamo ngwami navakakomwesa vakwavo, navakapwa vakwangula, kahove nawa unapihilila nakupula uvwalo wove+ nakulila kumeso ami, shikaho ngunakwivu. Omu mukiko ngunambe ami Yehova.
20 Shikaho nangukwecha utoke ngana mwavakakuluka jove,* kaha navakakufunda mukuunda muchimbumbe chove. Kaweshi kukamona lupi elu ngunajinyi kuneha hanganda yinoko.’”’” Ngocho vakindulukile nakulweza mwangana mazu osena awa.
