Vamyangana 2 23:1-37
23 Jino mwangana atumine mazu vasanyike vakulwane vosena vamuYuta namuYelusalema, kaha vakungulukile.+
2 Mwangana ayile kuzuvo yaYehova navatu vamuYuta, navatu vamuYelusalema, navapilishitu, navapolofweto, vatu vosena vavalemu navava vamokomoko. Avatangilile mazu amumukanda+ walushiko+ uze vawanyine muzuvo yaYehova.+
3 Jino mwangana emanyine kwakamwihi nayize panda yajila, kaha alishikile lushiko* kumeso aYehova+ ngwenyi mwatambukanga mujijila jaYehova, nakulamanga jishimbi jenyi, namazu enyi akwanukisa, najindongi jenyi. Mwalinganga ngocho namuchima wenyi wosena, namwono* wenyi wosena, nakukava mazu alushiko vasoneka mumukanda kana. Ngocho vatu vosena vetavilile lushiko luze.+
4 Jino mwangana alwezele kapilishitu wakulitulaho Hilikiya,+ navapilishitu vakwavo, navaka-kulama kuvikolo valovole vyuma vyosena vize vazachishilenga hakulemesa Mbale, napanda yajila yamutondo,*+ namayongomena amwilu osena. Kaha avyochelele kuweluka waYelusalema kumingulunga yaKichilone, kaha atwalile uto wavyo kuMbetele.+
5 Kaha vapilishitu vaze vazachililenga tulunga veka, avafumishile hamilimo. Vapilishitu kana vavatongwelenga kuli vamyangana javaYuta mangana valumbenga mawana havihela vyakulunduka vyamuYuta namuYelusalema mwosena mangana akakumukenga wishi. Afumishile nawa vapilishitu vaze valumbilenga mawana kuli Mbale, nakulikumbi, nakukakweji, nakuvatanganyika, nakumayongomena amwilu osena.+
6 Alowele nawa panda yajila yamutondo*+ muzuvo yaYehova nakuyitwala kuweluka waYelusalema, kuChinema chaKichilone, kaha ayochele.+ Kufumaho atwile panda yize ochele, kaha asukumwinyine unga wayo havimbumbe vyavatu vamokomoko.+
7 Apuzwile nawa jizuvo jamalunga vaka-ujila*+ jize japwile kuzuvo yaYehova kuze vatongelelenga mapwevo jimbalaka jakulemesela panda yajila yamutondo.*
8 Alowele vapilishitu vosena mujinganda jaYuta, kaha vihela vyakulunduka vize vapilishitu valumbililenga vimuna vakuvatula avipihishile vyosena, kufuma kuNgeva+ swi nakuMbele-sheva.+ Apuzwile nawa vihela vyakulunduka vize vyapwile kuchikolo chaYoshuwa, mukulwane wanganda, chize chapwililile kuchimoswe omu mutu engililenga munganda.
9 Vaze vapilishitu vakuvihela vyakulunduka kavazachilenga kulijiko lyakulumbila lyaYehova muYelusalemako,+ oloze valilenga jimbolo jakuzeneka chimbalwila navandumbwavo hamwe.
10 Apihishile nawa chihela vavulukilenga ngwavo Tofwete+ chize chapwile muChinema chaVana vaHinome*+ mangana vatu valitwamine kulumbanga vana vavo vamalunga chipwe vamapwevo kuli Moleke.+
11 Tuvalu vaze vahanyinenga vamyangana javaYuta kulikumbi, avakanyishile kwingila muzuvo yaYehova kuzachisa chikolo chakukapete kakulila kachilolo Natane-meleke, kaze kapwililile kusenge yatembele. Kaha ochele nawa matemba alikumbi.+
12 Mwangana Yoshiya apuzwile nawa majiko akulumbila aze vamyangana javaYuta vatungile hamulungu+ wazuvo yaAhaze, namajiko akulumbila aze Manase atungile muvipango vivali vyakuzuvo yaYehova.+ Awachikile nakusukumwina mavu awo muChinema chaKichilone.
13 Mwangana apihishile nawa vihela vyakulunduka vize vyapwile kulutwe lwaYelusalema, kusulo* yaPili yaKunonga,* vize Solomone mwangana wavaIsalele atungilile Ashatolete kalunga wapwevo wavaka-Shitone, naKemoshe kalunga wavaMowave, naMilikome+ kalunga wavaAmone.+
14 Achikile jipanda jajila jamalolwa, nakuteta jipanda jajila jamitondo.*+ Kaha havihela haze japwile ambilileho vifuwa vyavatu.
15 Apuzwile nawa lijiko lyakulumbila muMbetele, nachihela chakulunduka chize atungile Yelovowame mwanaNevate nakuhungumwisa vaIsalele valinge shili.+ Omu alingile hanapuzula lyehi lize lijiko lyakulumbila nachihela chakulunduka, ochele chize chihela chakulemesela nakupwa uto. Kaha ochele nawa yize panda yajila yamutondo.*+
16 Omu Yoshiya amwene vimbumbe hapili, afumishile vifuwa muze muvimbumbe, kaha avilumbile haze halijiko lyakulumbila nakulipihisa. Echi chateselemo mazu aYehova aze vahanjikile kuli mutu waKalunga wamuchano ngwenyi vyuma kanevi navikasoloka.+
17 Jino Yoshiya ambile ngwenyi: “Nyi chize chimbumbe vanafwiki lilolwa kuze cheya?” Kaha malunga vamunganda vamukumbulwile ngwavo: “Chimbumbe chamutu waKalunga wamuchano wakuYuta+ uze ahanjikile vyuma kanevi unalingi kulijiko eli lyamuMbetele.”
18 Yoshiya ambile ngwenyi: “Mwechenu anoke. Kanda namwitavisa mutu ambate vifuwa vyenyiko.” Ngocho vasezele vifuwa vyenyi navifuwa vyakapolofweto uze afumine kuSamaliya.+
19 Yoshiya apuzwile nawa jizuvo jakulemesela josena jize japwile havihela vyakulunduka vyamujinganda jaSamaliya+ jize vatungile vamyangana javaIsalele mangana vamwivwise Kalunga kupihya. Ajilingile nge muze alingile jize jakuMbetele.+
20 Kaha haze hamajiko akulumbila, alumbilileho vapilishitu vosena vakuvihela vyakulunduka nakwochelaho nawa vifuwa vyavatu.+ Kufumaho akindulukile kuYelusalema.
21 Jino Mwangana Yoshiya alwezele vatu ngwenyi: “Mulingilenu Yehova Kalunga kenu Paseka+ nge muze vasoneka mumukanda uno walushiko.”+
22 Kufuma kumakumbi aze vaka-kuyula vayulile vaIsalele, chipwe hamakumbi avamyangana javaIsalele navamyangana javaYuta,+ kavalingile Paseka yeka nge yizeko.
23 Paseka kana vamulingilileyo Yehova muYelusalema mumwaka wakusokesa 18 wachiyulo chaMwangana Yoshiya.
24 Yoshiya anongesele vaka-kutahisa vashipilitu, navaka-kulweza vyuma vyakulutwe,+ navatelafwime,*+ namakombelo aunyengwe,* navyuma vyaunyengwe vyosena vize vyapwile muYuta namuYelusalema mangana atesemo mazu amuJishimbi+ vasonekele mumukanda uze awanyine kapilishitu Hilikiya muzuvo yaYehova.+
25 Kunyima kakwapwile mwangana weka wakufwana nge ikiyeko, mwomwo akindulukile kuli Yehova namuchima wenyi wosena, namwono*+ wenyi wosena, nangolo jenyi josena nge kutesa nomu mwayile Jishimbi jaMose josena. Kaha kulutwe nawa kakwapwilenga mwangana weka wakufwana nge ikiyeko.
26 Oloze Yehova katulishile matoto enyi aze akwachilile vaYuta mwomwo yavyuma vyavipi vize alingilenga Manase vyakumwivwisa kupihyako.+
27 Yehova ambile ngwenyi: “Nangufumisa vaYuta kumeso+ ami nge muze ngwalingile kuli vaIsalele.+ Nangukana Yelusalema nganda eyi ngunasakula nazuvo eyi ngwambile ngwami, ‘Navayivulukilanga lijina lyami.’”+
28 Mujimbu wosena waYoshiya wavyuma alingile vausoneka mumukanda wamijimbu yavamyangana javaYuta.
29 Hamakumbi enyi, Fwalo Neko mwangana waEjipitu ayile mangana akaliwane namwangana waAsulya kuKalwiji Yufwalate. Kaha Mwangana Yoshiya ayile akazunge nenyi. Oloze omu Fwalo Neko amwene Yoshiya, amujihilile kuMengito.+
30 Ngocho vangamba jenyi vambachile mujimba wenyi mulitemba kufuma kuMengito nakuutwala kuYelusalema, kaha vamufunjile muchimbumbe chenyi. Jino vatu vamulifuchi lize vawavishile Yehowahaze mwanaYoshiya nakumuswanyisa halitanda lyaise.+
31 Yehowahaze+ aputukile kuyula omu apwile namyaka yakusemuka 23, kaha ayulile tukweji vatatu muYelusalema. Lijina lyanaye apwile ikiye Hamutale+ mwanaYelemiya wakuLivina.
32 Yehowahaze alingilenga vyuma vyavipi kumeso aYehova, nge muze valingilenga vakakuluka jenyi.+
33 Fwalo Neko+ ahakile Yehowahaze mukamenga kuLivila+ mungalila yaHamate mangana ahonenga kuyula muYelusalema. Kaha lifuchi alifwetesele jitalende* japalata 100, natalende yaulu yimwe.+
34 Fwalo Neko atongwele nawa Elyakime mwanaYoshiya kupwa mwangana, kaha amuswanyishile hali ise nakumuluka lijina lyeka ngwenyi ikiye Yehoyakime. Jino Fwalo atwalile Yehowahaze kuEjipitu,+ kaha akafwililile vene kuze.+
35 Yehoyakime atelesele vatu vamulifuchi mitelo mangana ahane mwangana Fwalo palata naulu yize atomene. Palata naulu yize ahanyine kuli Fwalo Neko, ayitelesele kuvatu vamulifuchi kweseka nomu atomenene mutu himutu.
36 Yehoyakime+ aputukile kuyula omu apwile namyaka yakusemuka 25, kaha ayulile myaka 11 muYelusalema.+ Lijina lyanaye apwile ikiye Zevita mwanaPetaya wakuLuma.
37 Yehoyakime alingilenga vyuma vyavipi kumeso aYehova,+ nge muze valingilenga vakakuluka jenyi.+
Kwinyikila Chamwishi
^ Chipwe “alishikile cheka lushiko.”
^ Tala Mukana waMazu.
^ Tala Mukana waMazu.
^ Tala Mukana waMazu.
^ Tala Mukana waMazu.
^ Chipwe “jamalunga vaka-ujila vakutembele.”
^ Tala Mukana waMazu, “Ngehena.”
^ Hepe., “kuchilyo.” Kulumbununa kusulo, nge mutu natale kumututuko.
^ Ikiko Pili yaMilive, chikumanyi kusongosongo, kumutamba wakusulo vavuluka nawa ngwavo kuPili yaMulonga.
^ Tala Mukana waMazu.
^ Tala Mukana waMazu.
^ Lizu lyachiHepeleu vazachisa hano linahase kutalisa “kutuji,” kaha valizachisa kuvyuma vyakwivwisa unyengwe.
^ Chipwe “natulunga vamutanga; tuponya.”
^ Tala Mukana waMazu.
^ Talende yimwe yapwile jikilongalamu 34.2. Tala Chihande B14.
