Vamyangana 2 24:1-20
24 Hamakumbi aYehoyakime, Nevukataneza+ mwangana waMbavilone anyemukilile Yehoyakime, kaha amutengele kupwa ngamba yenyi hamyaka yitatu. Kutwala muze alikangile kuli ikiye.
2 Jino Yehova atuminyinenga Yehoyakime mazavu avaka-kunyemukila+ avaKalateya, navaSulya, navaMowave, navaAmone. Yehova avatuminenga mangana vanongese vaYuta nge kutesa namazu enyi+ aze ahanjikile kuhichila muli vangamba jenyi vapolofweto.
3 Yehova ikiye ambile ngwenyi vyuma kana visoloke kuli vaYuta mangana avafumise kumeso enyi+ mwomwo yajishili jize alingilenga Manase,+
4 namanyinga amwangilenga avatu vakuzeneka mulonga.+ Mwomwo Manase azalishile Yelusalema namanyinga amwangilenga avatu vakuzeneka mulonga, ngocho Yehova kasakile kuvakonekelako.+
5 Mujimbu wosena waYehoyakime wavyuma alingile vausoneka mumukanda wamijimbu yavamyangana javaYuta.+
6 Yehoyakime atokele ngana mwavakakuluka jenyi,+ kaha mwanenyi Yehoyakine aswanyine hawangana.
7 Mwangana waEjipitu kafumine cheka mulifuchi lyenyi nakuya nakuzungako, mwomwo mwangana waMbavilone atambwile lifuchi lyamwangana waEjipitu lyosena,+ kufuma kuMwanakalwiji* wakuEjipitu+ swi nakuKalwiji Yufwalate.+
8 Yehoyakine+ aputukile kuyula omu apwile namyaka yakusemuka 18, kaha ayulile tukweji vatatu muYelusalema.+ Lijina lyanaye apwile ikiye Nehushuta mwanaElenatane wamuYelusalema.
9 Yehoyakine alingilenga vyuma vyavipi kumeso aYehova, nge muze alingilenga ise.
10 Jino vangamba jaNevukataneza mwangana waMbavilone vejile mangana valukuke nganda yaYelusalema, kaha vayihakile muchingombela.+
11 Nevukataneza mwangana waMbavilone ayile kunganda yaYelusalema omu vangamba jenyi vayihakile muchingombela.
12 Jino Yehoyakine mwangana wavaYuta alovokele nanaye, navangamba jenyi, navamyata jenyi, navilolo jenyi+ nakuya kuli mwangana waMbavilone.+ Kaha mwangana waMbavilone akwachile Yehoyakine ufunge mumwaka wakusokesa 8 wachiyulo chenyi.+
13 Kaha ambachile vikumba vyosena vize vyapwile muzuvo yaYehova, namuzuvo* yamwangana.+ Atetele vyuma vyaulu vyosena vize Solomone mwangana wavaIsalele atengele mutembele yaYehova,+ nge omu ahanjikile lyehi Yehova.
14 Ambachile vatu vamuYelusalema vosena, navamyata vosena,+ navaka-jita vangolo vosena, navitotombwe vosena, navafuli*+ vosena, vatu vakuheta ku 10,000, kaha avatwalile muufunge. Kakwapwile mutu asalile mulifuchiko, kuvanga kaha vaze vahutwile chikuma.+
15 Atwalile Yehoyakine+ muufunge kuMbavilone,+ hohamwe nanaye yamwangana, namapwevo jamwangana, navilolo jenyi, navatu vavalemu vamulifuchi. Vosena avambachile kuYelusalema nakuvatwala muufunge kuMbavilone.
16 Mwangana waMbavilone atwalile vaka-jita vangolo 7,000, navitotombwe navafuli* 1,000 muufunge kuMbavilone. Vosena ava vapwile malunga vangolo, vaze vanangula lyehi kulwa jita.
17 Mwangana waMbavilone atongwele nawa Matanyiya, natu yaYehoyakine+ kupwa mwangana. Kaha amulukile lijina lyeka ngwenyi ikiye Zetekiya.+
18 Zetekiya aputukile kuyula omu apwile namyaka yakusemuka 21, kaha ayulile myaka 11 muYelusalema. Lijina lyanaye apwile ikiye Hamutale+ mwanaYelemiya wakuLivina.
19 Zetekiya alingilenga vyuma vyavipi kumeso aYehova, nge muze alingilenga Yehoyakime.+
20 Yehova evwile kupihya, shikaho vyuma kanevi vyasolokele muYelusalema namuYuta palanga nomu avafumishile kumeso enyi.+ Zetekiya alikangile kuli mwangana waMbavilone.+
Kwinyikila Chamwishi
^ Tala Mukana waMazu.
^ Chipwe “namunganda.”
^ Chipwe pamo, “navaka-kutunga jikembwe.”
^ Chipwe pamo, “navaka-kutunga jikembwe.”
