Vamyangana 2 25:1-30
25 Mumwaka wakusokesa 9 wachiyulo chaZetekiya, mukakweji wakusokesa 10, halikumbi lyakusokesa 10 lyakakweji kana, Nevukataneza+ mwangana waMbavilone ejile namaswalale jenyi vosena mangana vanyemukile Yelusalema.+ Kaha vatungile chilombo chavo nakembwe kunganda jingulwishi ndo.+
2 Nganda vayihakile muchingombela palanga nakumwaka wakusokesa 11 wachiyulo chaMwangana Zetekiya.
3 Halikumbi lyakusokesa 9 mukakweji wamuchiwana, zala yatohwele chikuma+ munganda, kaha mulifuchi kamwapwile vyakulyako.+
4 Vatuvile lihanya hakembwe yanganda nakwingila,+ kaha maswalale vosena vachinyine naufuku nakulovokela kuchikolo chapwile hakachi kajikembwe jivali kwakamwihi namilemba yamwangana, oku vaKalateya vanajingilika nganda. Jino mwangana achinyinyine mujila yakuya kuAlava.+
5 Oloze maswalale javaKalateya vamuhangasanyine, kaha vakamuwanyine mulikundu lyaYeliko. Maswalale jenyi vosena vachinyine nakumuseza.
6 Maswalale javaKalateya vamukwachile,+ kaha vamutwalile kuli mwangana waMbavilone kuLivila nakumusopesa.
7 Vajihilile vana vaZetekiya vamalunga hameso enyi, kaha Nevukataneza atuvile Zetekiya meso, amukashile namalenge aunengu nakumutwala kuMbavilone.+
8 Mukakweji wamuchitanu, halikumbi lyakusokesa 7 lyakakweji kana, mumwaka wakusokesa 19 wachiyulo chaNevukataneza mwangana waMbavilone, Nevuzalatane+ mukulwane wavaka-kulama mwangana uze apwile nawa ngamba yamwangana waMbavilone, ayile kuYelusalema.+
9 Akochele zuvo yaYehova,+ nazuvo* yamwangana+ najizuvo japwile muYelusalema josena.+ Akochele nawa najizuvo javatu vavalemu.+
10 Kaha maswalale javaKalateya vaze vapwile namukulwane wavaka-kulama mwangana vapuzwile jikembwe jize jajingilikile nganda yaYelusalema.+
11 Nevuzalatane mukulwane wavaka-kulama mwangana, ambachile vatu vaze vasalile munganda, navaze valitwalile vavene kuli mwangana waMbavilone, navatu vamuchivulu vosena, avatwalile muufunge.+
12 Oloze vatu vakuhutwa vamulifuchi lize avasezele mangana vazatenga mumande amivinyo nakuzatanga milimo yaundungo.+
13 VaKalateya vachikile jize jipanda jaunengu+ japwile kuzuvo yaYehova, namatemba,+ nalize Limbashiya lyaunengu+ vyapwile kuzuvo yaYehova. Kaha unengu wavyo vautwalile kuMbavilone.+
14 Vambachile navifwoyo, najifwosholo, natuzola twamanongo, najipasa, navyuma vyaunengu vyosena vize vazachishilenga kutembele.
15 Uze mukulwane wavaka-kulama mwangana ambachile natumalonga twakukwachila kakahya, naviloso vize vyapwile vyaulu+ napalata yamwaza.+
16 Oloze unengu wajize jipanda jivali, nalize Limbashiya, namatemba aze atengele Solomone akuzachisa kuzuvo yaYehova, kavahashile kuupezalisako.+
17 Panda yimwe yasuhwile jikuvite* 18,+ kaha mutwe uze vahakileho wapwile waunengu. Mutwe kana wazandamine jikuvite jitatu, kaha uze wanda wakuselasana najiloma vahakile kuze kumutwe jingulwishi ndo, vyapwile vyaunengu.+ Omu mukiko yapwile napanda yize yamuchivali namutwe wayo.
18 Uze mukulwane wavaka-kulama mwangana akwachile nawa kapilishitu wamukulwane Selaya,+ nakapilishitu wamuchivali Zefwanyiya,+ navaka-kulama kuvikolo vatatu.+
19 Munganda akwachilemo chilolo umwe uze apwile muka-kutala maswalale. Akwachile nawa masepa jamwangana vatanu vaze vapwile munganda, namuka-kusoneka wakapitau kamaswalale uze akungulwilenga vatu mulifuchi, namalunga 60 vamulifuchi vaze awanyine munganda.
20 Nevuzalatane+ mukulwane wavaka-kulama mwangana avambachile nakuvatwala kuli mwangana waMbavilone kuLivila.+
21 Kaha mwangana waMbavilone avajihililile kuLivila kungalila yaHamate.+ Ngocho vaYuta vafumine mulifuchi lyavo nakuya muufunge.+
22 Jino Nevukataneza mwangana waMbavilone atongwele Ngetaliya+ mwanaAhikame, Ahikame+ mwanaShafwane+ atalenga vatu vaze vasalile muYuta.+
23 Omu tupitau twamaswalale namaswalale javo+ vevwile ngwavo mwangana waMbavilone natongola Ngetaliya, hahaze vene vayile kuli Ngetaliya kuMijipa. Tupitau kana vapwile Ishimele mwanaNetanyiya, naYohanane mwanaKaleya, naSelaya mwanaTanahumete wakuNetofwa, naYazanyiya mwanauze lunga wakuMakate. Vayile hamwe namaswalale javo.
24 Jino Ngetaliya alishingile kuli vakiko nakuli maswalale javo, kaha ambile ngwenyi: “Kanda namwivwa woma wakupwa vangamba javaKalateyako. Twamenu mulifuchi lino muzachilenga mwangana waMbavilone, kaha vyuma navimiwahilanga.”+
25 Jino mukakweji wakusokesa 7, Ishimele+ mwanaNetanyiya, Netanyiya mwanaElishama wakutanga yawangana* ayile namalunga 10 kuli Ngetaliya. Kaha vajihile Ngetaliya, navaYuleya, navaKalateya vaze apwile navo kuMijipa.+
26 Kaha vatu vosena vavalemu, navava vamokomoko, natupitau twamaswalale vakatukile nakuya kuEjipitu+ mwomwo vevwile woma wavaKalateya.+
27 Jino mumwaka wakusokesa 37 waufunge waYehoyakine+ mwangana wavaYuta, mukakweji wakusokesa 12, halikumbi lyakusokesa 27 lyakakweji kana, Evile-melotake mwangana waMbavilone, mumwaka wenyi aputukile kuyula, afumishile* Yehoyakine mwangana wavaYuta mukamenga.+
28 Mwangana waMbavilone ahanjikile kuli Yehoyakine nalikoji, kaha azezwile litanda lyenyi helu lyamatanda avamyangana vakwavo vaze apwile navo muMbavilone.
29 Yehoyakine azulile uvwalo wenyi wamukamenga, kaha alilenga vyakulya kumeso amwangana hamakumbi osena akuyoya chenyi.
30 Kaha hakumbi hakumbi vamuhanyinenga vyakulya kuli mwangana waMbavilone hamakumbi akuyoya chenyi osena.
Kwinyikila Chamwishi
^ Chipwe “nanganda.”
^ Kuvite yimwe yapwile jisendimita 44.5. Tala Chihande B14.
^ Hepe., “wakumbuto yawangana.”
^ Hepe., “azundwile mutwe.”
