Vamyangana 2 3:1-27
3 Yeholame+ mwanaAhave aputukile kuyula vaIsalele muSamaliya mumwaka wakusokesa 18 wachiyulo chaYehoshafwate Mwangana wavaYuta, kaha ayulile myaka 12.
2 Yeholame alingilenga vyuma vyavipi kumeso aYehova, oloze upi wenyi kawatohwele nge uze alingilenga ise nanayeko, mwomwo ikiye afumishile panda yajila yakulemesela Mbale yize atengele ise.+
3 Yeholame alingilenga jishili jize alingilenga Yelovowame mwanaNevate uze ahungumwishile navaIsalele valinge jishili kana.+ Yeholame kambilile jishili kanako.
4 Jino Mesha mwangana wavaMowave apwile muka-kupita mikoko. Kaha alambwililenga mwangana wavaIsalele mikoko vavihwevo 100,000 navizamba jamikoko vakuzeneka kuteula 100,000.
5 Omu afwile Ahave,+ mwangana wavaMowave alikangile kuli mwangana wavaIsalele.+
6 Halwola luze, Mwangana Yeholame alovokele muSamaliya mangana akungulule vaIsalele vayenga kujita.
7 Atumine nawa mazu kuli Yehoshafwate mwangana wavaYuta ngwenyi: “Mwangana wavaMowave nalikange kuli ami. Uno natuya hamwe tukalwe jita navaMowave nyi?” Yehoshafwate amukumbulwile ngwenyi: “Natuya hamwe.+ Etu tuvatu vovamwe. Vatu jami vanapu vatu jove. Tuvalu twami nawa vanapu tuvalu twove.”+
8 Kaha amwihwile ngwenyi: “Natuya jila muka?” Ikiye amukumbulwile ngwenyi: “Natuya jila yapambo yaEtome.”
9 Mwangana wavaIsalele ayile hamwe namwangana wavaYuta namwangana wavaEtome.+ Omu valingile hivanatambuka lyehi ungeji wakulijinga hamakumbi 7, kakwapwile meya akunwa maswalale javo navimuna javo vaze vayilenga navo hamweko.
10 Kaha mwangana wavaIsalele ambile ngwenyi: “Mama lelo! Yehova natusanyika etu vamyangana vatatu mangana atuhane mumavoko avaMowave.”
11 Jino Yehoshafwate ambile ngwenyi: “Kuno kakweshi kapolofweto kaYehova uze mwatwihwila kuli Yehovako nyi?”+ Kaha ngamba yamwangana wavaIsalele amukumbulwile ngwenyi: “Kwali Elisha+ mwanaShafwate uze asangililenga meya kumavoko aElija.”*+
12 Yehoshafwate ambile ngwenyi: “Ikiye mwatulweza omu nashinganyekela Yehova.” Ngocho mwangana wavaIsalele, naYehoshafwate, namwangana wavaEtome vayile kuli Elisha.
13 Elisha ambile kuli mwangana wavaIsalele ngwenyi: “Vyuma muka unakatukila kuno?+ Yako kuli vapolofweto jaiso nakuli vapolofweto janoko.”+ Oloze mwangana wavaIsalele ambile kuli ikiye ngwenyi: “Kanda nauhanjika ngochoko. Yehova ikiye natusanyika etu vamyangana vatatu mangana atuhane mumavoko avaMowave.”
14 Elisha ambile ngwenyi: “Omu ayoya Yehova wamayongomena tu, ou ngweji kuzachilanga,* chikeshi Yehoshafwate Mwangana+ wavaYuta, kachi kangwakuhakile muchima chipwe manganako.+
15 Oloze jino ngunehelenu muka-kwimba kalyalya.”+ Omu ejile uze muka-kwimba kalyalya nakuputuka kwimba, ngolo jaYehova jejile hali Elisha.+
16 Ngocho Elisha ambile ngwenyi: “Yehova nambe ngwenyi, ‘Fulenu tupila muchinema echi.*
17 Mwomwo Yehova nambe ngwenyi: “Kamweshi kumona peho nayihuhwako, kaha nawa kamweshi kumona vulako. Oloze echi chinema* nachizala nameya,+ kaha namunwamo meya navimuna jenu hamwe.”’
18 Chuma kana chinapu chachashi chikuma kuli Yehova,+ kaha nawa vaMowave mwavahana mumavoko enu.+
19 Shikaho kalukukenu jinganda javo jajikembwe josena,+ najinganda javo jamwaza josena. Kavukenu mitondo yavo yamwaza yosena, kashikilenu mashima avo ameya osena, kaha kambilenu malolwa hamisuka yavo yamavu amwaza mangana mukayenyeke.”+
20 Jino nachimene, halwola vahanyinenga wana wamanona wachimene,+ kuEtome kwafumine meya kaha muze muchinema mwazalile nameya.
21 Omu vaMowave vevwile ngwavo vamyangana vaneza nakulwa navo jita, vakungulwile malunga vaka-kulipakachisa vitwa* nakuya nakwimana kungiza yalifuchi lyavo.
22 Omu vahindukile nachimene, likumbi lyatutukile nakumunyika hameya, kaha vaMowave vaze vapwile musali vamwene aze meya anachilana ngengu kwijiva nge manyinga.
23 Kaha vambile ngwavo: “Aze himanyinga! Vamyangana vanalijihi mwavomwavo najipoko jamikwale. Shikaho enu vaMowave tuyenu tukapukule+ vyuma vyavo.”
24 Omu vahetele muchilombo chavaIsalele, vaIsalele vakatukile nakuputuka kujiha vaMowave. VaMowave vachinyine,+ oloze vavahangasanyine kuli vaIsalele nakuvajiha swi nomu vengilile mulifuchi lyavo.
25 Vashiwile jinganda javo, vashile malolwa hamisuka yavo yamavu kaha hazalile to namalolwa. Vashikilile mashima avo ameya,+ vavukile mitondo yavo yamwaza yosena.+ Oloze kembwe yamalolwa yakunganda yaKile-halesete+ yikiko kaha yasalileho. Jino vaka-kwasa navikapa vyakwashisa vajingilikile nganda kana nakuyishiula.
26 Omu mwangana wavaMowave amwene ngwenyi jita yinavatohwela, ambachile malunga 700 vakulipakachisa jipoko jamikwale mangana akalihumangane namwangana wavaEtome,+ oloze kavahashileko.
27 Ngocho mwangana wavaMowave akwachile mwanenyi watwatwa uze atelelele kumuswana, amulumbilile hakembwe kupwa wana wakulumba.+ Chuma kana chevwishile vaIsalele kupihya, ngocho valitwaminyine kumuzungisa, kaha vakindulukile kulifuchi lyavo.
Kwinyikila Chamwishi
^ Chipwe “uze apwilenga ngamba yaElija.”
^ Hepe., “ou ngweji kwimananga kumeso enyi.”
^ Chipwe “mumwanakalwiji ou.”
^ Chipwe “ou mwanakalwiji.”
^ Chipwe “vakungulwile vaze valikashile mihya mujimbunda.”
