Vamyangana 2 4:1-44
4 Jino pwevo umwe hamapwevo javana vavapolofweto+ ayayavalile kuli Elisha ngwenyi: “Lunga lyami, ngamba yove afwa. Kaha ove unatachikiza ngwove ngamba yove evwilenga Yehova woma makumbi osena.+ Jino muka-kulevanyisa neza mangana ambate vana vami vakapwe vandungo jenyi.”
2 Elisha ambile kuli ikiye ngwenyi: “Vyuma muka uli nakusaka ngukulingile? Ngulweze, vyuma muka uli navyo muzuvo yove?” Ikiye ambile ngwenyi: “Ami ngamba yove kangweshi navyuma vyeka muzuvoko shina saji yamaji yimwe kaha.”+
3 Elisha ambile ngwenyi: “Yako ukalombe milondo yamupolongwa kuli vakwenu vosena mwalihata navo. Kalombe milondo yayivulu.
4 Kufumaho kengile muzuvo yove navana vove, kaha kalisokelelemo. Kazalise yize milondo yosena namaji, kaha yize yinazale lyehi kayihake hauka wayo.”
5 Ngocho uze pwevo ayile nakulinga nge muze amulwezele Elisha.
Kaha engilile muzuvo navana venyi nakulisokelelamo. Alwezele vana venyi vamuhane yize milondo, kaha ahingunwinyinemo maji.+
6 Omu yazalile yize milondo, ambile kuli mwanenyi umwe ngwenyi: “Ngunehele mulondo ukwavo.”+ Ikiye ambile ngwenyi: “Milondo yosena yinakumu.” Ngocho aze maji echele kuhita.+
7 Uze pwevo ayile nakulweza mutu waKalunga wamuchano vyuma vyosena evi. Kaha ikiye amwambile ngwenyi: “Yako ukalanjise maji kana mangana jimbongo ukafwete mikuli yove, kaha jize najikasalaho ukalikafwe najo navana vove.”
8 Likumbi limwe Elisha ayile kuShuneme.+ Jino kuShuneme kwapwile pwevo umwe wamulemu, kaha uze pwevo amusanyikile alyenga vyakulya.+ Lwola lwosena ayilenga kuze, ahichililenga kuzuvo yauze pwevo nakulya vyakulya.
9 Uze pwevo ambile kuli lunga lyenyi ngwenyi: “Ou lunga eji kwizanga kuno lwola lwosena apwa mutu wajila, ngamba yaKalunga.
10 Shikaho tutunge kapete helu lyazuvo yetu,+ tumuhakilemo kahela, namesa, nachitwamo, nachitumbikilo chalinongo mangana omu mwezanga kuno atwamengamo.”+
11 Jino likumbi limwe ejile, kaha engilile muze mukapete nakusavala.
12 Elisha ambile kuli ngamba yenyi Ngehaze+ ngwenyi: “Musanyike ou pwevo wamuShuneme.”+ Ngocho amusanyikile, kaha ejile nakwimana kumeso enyi.
13 Elisha ambile kuli Ngehaze ngwenyi: “Mulweze ngwove, ‘Unayande nakutuzachila milimo yosena eyi,+ shikaho vyuma muka musaka tukulingile?+ Kuli chuma chimwe nausaka ngukuhanjikile kuli mwangana+ chipwe kuli kapitau kamaswalale nyi?’” Ikiye ambile ngwenyi: “Chauchi, ngunasuuluka kutwama navakwetu vene kuno.”
14 Elisha ambile ngwenyi: “Vyuma muka natumulingila?” Ngehaze akumbulwile ngwenyi: “Ou pwevo katwama namwanako,+ kaha lunga lyenyi nawa nashinakajiwa lyehi.”
15 Elisha ambile kuli Ngehaze ngwenyi: “Musanyike.” Ngocho amusanyikile, kaha ejile nakwimana muchikolo.
16 Elisha ambile kuli uze pwevo ngwenyi: “Mwaka nawizaho halwola nge luno, naukakwata mwana walunga.”+ Oloze ikiye ambile ngwenyi: “Nduma ove mwata wami, ove mutu waKalunga wamuchano. Kanda ungwonga ami ngamba yoveko.”
17 Uze pwevo emichile lijimo, kaha asemene mwana walunga mwaka wakavangijileho halwola vene luze amulwezele Elisha.
18 Uze mwana akolele, kaha likumbi limwe ayile kuli ise uze apwile hamwe navaka-kwaha.
19 Kaha ambile kuli ise ngwenyi: “Mama yami mutwe wami! Mutwe wami uli nakukola!” Ise ambile kuli ngamba yenyi ngwenyi: “Mumbate umutwale kuli naye.”
20 Ngocho amutwalile kuli naye, kaha naye amusachile hamahinji enyi palanga nomu lyahetele likumbi hamulungu, kaha afwile.+
21 Uze pwevo ayile nauze mwana mukapete kamutu waKalunga wamuchano,+ amusavalikile hakahela kenyi, kaha asokeleko nakuya.
22 Jino asanyikile lunga lyenyi, amulwezele ngwenyi: “Ngusuwile ngamba umwe nachimbulu umwe nguyenga washiwashi kuli mutu waKalunga wamuchano, kaha nangukinduluka.”
23 Lunga lyenyi ambile ngwenyi: “Mwomwo ika nauyila nakumumona lelo? Lelo keshi hilikumbi lyakumweka chakakweji+ chipwe lyasambatako.” Oloze ikiye ambile ngwenyi: “Kanda naulizakaminako.”
24 Ngocho alemene chimbulu, kaha ambile kuli ngamba yenyi ngwenyi: “Tambukisa washi chimbulu. Kanda utambuka chindendeko kuvanga ngunakulweze kulinga ngocho.”
25 Uze pwevo ayile kuli mutu waKalunga wamuchano kuPili yaKalamele. Omu mutu waKalunga wamuchano amumwene hahasuku, ambile kuli ngamba yenyi Ngehaze ngwenyi: “Tala, pwevo wakuShuneme uze ali nakwiza kuze.
26 Musese, umuhulise ngwove, ‘Kwahola! Uli kanawa? Lunga lyove namwanove vali kanawa tahi?’” Omu amuhulishile, ikiye ambile ngwenyi: “Tuvosena tuli kanawa.”
27 Uze pwevo ahetele kuli mutu waKalunga wamuchano hapili, kaha amukwachile kumahinji enyi.+ Jino Ngehaze ejile mangana afumise uze pwevo kumahinji amutu waKalunga wamuchano, oloze ikiye ambile ngwenyi: “Mweche, mwomwo ali nakwivwa kumuchima kukola,* Yehova nawa nanguswekela chuma kana, kangulwezeleko.”
28 Uze pwevo ambile kuli Elisha ngwenyi: “Ove mwata wami, uno ngwakukambile ngwami unguhane mwana tahi? Uno kangwambile ngwami: ‘Kanda ungufwelelesa vyuma vyamakuliko’ nyi?”+
29 Elisha ambile kuli Ngehaze ngwenyi: “Lijichike chikuto chove mumbunda,+ mbata mukombo wami uyenga nawo. Kachi nge muwana mutu mujila, kanda umumenekako, nge mutu nawa mwakumeneka, kanda umukumbululako. Kasalike mukombo wami kumeso ayauze kanyike.”
30 Uze pwevo ambile ngwenyi: “Nge omu ayoya Yehova tu, nomu wayoya yove,* kangweshi kukusezako.”+ Ngocho Elisha akatukile nakuya nauze pwevo.
31 Ngehaze alivangile kulutwe lwavo, akahakile uze mukombo kumeso ayauze kanyike oloze uze kanyike katonene, chipwe kulinyikisako.+ Ngocho akindulukile nakuliwana naElisha, kaha ambile kuli ikiye ngwenyi: “Uze kanyike katoneneko.”
32 Omu Elisha engilile mukapete kenyi awanyine uze kanyike wakufwa, vanamusavalika hakahela kenyi.+
33 Alisokelelele muze mukapete, kaha aputukile kulomba kuli Yehova.+
34 Elisha anyinyine hakahela kenyi, aulumanyine hali uze kanyike, ahakile kanwa kenyi kukanwa kayauze kanyike, nameso enyi hameso ayauze kanyike, namavoko enyi hamavoko ayauze kanyike. Amuulumanyine lika, kaha mujimba wayauze kanyike waputukile kuzuma.+
35 Elisha afumine haze hakahela nakutambwojoka muze muzuvo, kaha anyinyine haze hakahela nakumuulumana cheka. Uze kanyike achehwile mapapa 7, kaha atonene jino.+
36 Elisha asanyikile Ngehaze, ambile kuli ikiye ngwenyi: “Sanyika ou pwevo wakuShuneme.” Ngocho amusanyikile kaha ejile. Elisha ambile kuli ikiye ngwenyi: “Mbata mwanove.”+
37 Uze pwevo afukamine chameso hamavu kumeso aElisha, kufumaho ambachile mwanenyi nakulovoka.
38 Omu Elisha akindulukile kuNgilingale awanyine mungalila muli zala yakalombolombo.+ Jino vana vavapolofweto+ vejile kuli Elisha, kaha ambile kuli ngamba yenyi+ ngwenyi: “Haka ndeho yayinene hajiko utelekele vana vavapolofweto vyakulya.”
39 Mwanakapolofweto umwe ayile muchipapa mangana akambate visakwola, kaha akawanyine mutondo wamulive wamuchipapa, ahileko mihako yawo nakuzalisa chikuto chenyi. Omu akindulukile alengele yize mihako nakuyihaka mundeho, oloze kayitachikijileko.
40 Kufumaho vayihanyine kuli vaze vapolofweto valyenga, oloze omu valileko vatambakanyine ngwavo: “Ove mutu waKalunga wamuchano, omu mundeho muli usungu.” Kaha kavahashile kuyilyako.
41 Elisha ambile ngwenyi: “Ngunehelenu unga.” Omu vamunehelelewo, auhakile muze mundeho, kaha ambile ngwenyi: “Hanenu jino vatu valyenga.” Vize vyakulya kavyapwile nausungu chekako.+
42 Jino kuMbale-shalisha+ kwafumine lunga umwe uze anehelele mutu waKalunga wamuchano jimbolo 20 jaunga wambale+ jakujimbuto jenyi jakulivanga. Amunehelele nawa njeke yamanona amahya.+ Kaha Elisha ambile ngwenyi: “Vahanenu vatu valyenga.”
43 Jino ngamba yenyi ambile ngwenyi: “Evi vyakulya navavizuka ngachilihi vatu 100?”+ Ikiye ambile ngwenyi: “Vihane vatu valyenga mwomwo Yehova nambe ngwenyi, ‘Navavilya nakuvisezaho.’”+
44 Ngocho avihanyine kuvatu, kaha valile nakuvisezaho+ nge muze ahanjikile Yehova.
