Vamyangana 2 5:1-27
5 Namane kapitau kamaswalale jamwangana waSulya, apwile mutu wamulemu uze vavumbikilenga kuli mwata wenyi mwomwo Yehova afungulwile vaka-kole javaSulya kuhichila muli ikiye. Namane apwile muka-kwasa jita wangolo numba tuhu apwile nambumba.*
2 Likumbi limwe omu vaSulya vayile nakulwa jita, vakakwachile kanyike wapwevo mulifuchi lyavaIsalele, kaha vamuhanyine kuli pwevo lyaNamane apwenga ngamba yenyi.
3 Uze kanyike ambile kuli kaka yenyi wapwevo ngwenyi: “Kachi nge mwata wami ayanga kuli kapolofweto+ kuSamaliya, kachi vanamuku kumusongo wenyi wambumba.”+
4 Ngocho ayile* nakulweza mwata wenyi mazu ahanjikile uze kanyike wakulifuchi lyavaIsalele.
5 Jino mwangana waSulya alwezele Namane ngwenyi: “Katuka uyenga oholili. Nangukuhana namukanda uyenga nawo kuli mwangana wavaIsalele.” Kaha ayile, ambachile jitalende* japalata 10, najishekele jaulu 6,000, namahina akuvwala 10.
6 Namane atwalile uze mukanda kuli mwangana wavaIsalele. Uze mukanda wapwile namazu akwamba ngwavo: “Ngunatumu ngamba yami Namane kuli ove mangana umuke kumusongo wenyi wambumba. Kaha ngunakusonekela namukanda.”
7 Omu mwangana wavaIsalele atangile uze mukanda, apihililile nakupula uvwalo wenyi, kaha ambile ngwenyi: “Uno ngwapwa nguKalunga numba ngupwenga nangolo jakujiha mutu chipwe jakumwecha ayoye tahi?+ Mwangana waSulya natumu ou mutu kuli ami mangana ngwenyi ngumuke kumusongo wambumba. Nayenu munamono ngwenu ou mwangana ali nakusaka vikokojola nayami.”
8 Omu mutu waKalunga wamuchano Elisha evwile ngwavo mwangana wavaIsalele napihilila nakupula uvwalo wenyi, hahaze vene atumine mazu kuli mwangana ngwenyi: “Mwomwo ika unapulila uvwalo wove? Musuule owo mutu ezanga kuli ami mangana atachikize ngwenyi muIsalele+ mwatwama kapolofweto.”
9 Ngocho Namane ayile natuvalu twenyi twajita namatemba enyi ajita kuchikolo chazuvo yaElisha.
10 Oloze Elisha atumine ngamba yenyi alweze Namane ngwenyi: “Yako usane muYotau+ mapapa 7,+ kaha nyama yove nayipwa yalambwe, nautoma kumbumba yove.”
11 Omu Namane evwile ngocho, apihililile nakusaka kukinduluka. Ambile ngwenyi: “Ami ngwashinganyekanga ngwami, ‘Mwalovoka nakwiza kuli ami, kaha mwasanyika halijina lyaYehova Kalunga kenyi nakuhichisa livoko lyenyi hambumba yami mangana anguke.’
12 Uno Avana naFwapale tulwiji vakuNdamashiku+ kavawaha kuhambakana meya amuIsaleleko tahi? Kutala kangweshi kuhasa kusana mutulwiji kana nakutoma kumbumba yamiko numba?” Ngocho anyingulukile nakuya oku napihilila.
13 Jino vangamba jenyi vapandamine kuli ikiye nakwamba ngwavo: “Ove mwata wetu, kachi nge kapolofweto akulwezanga kulinga chuma chachikalu, kutala kachi kawachilingileko tahi? Oloze ikiye nakulweze kaha ngwenyi, ‘Sana mangana utome.’”
14 Ngocho Namane ashikumukile nakukajiminyina muYotau mapapa 7 nge muze ahanjikile mutu waKalunga wamuchano.+ Nyama yenyi yapwile nge yakanyike wamundende,+ kaha atomene kumbumba yenyi.+
15 Kufumaho akindulukile nalizavu* lyenyi kuli mutu waKalunga wamuchano,+ kaha ambile kuli ikiye ngwenyi: “Ngunatachikiza jino ngwami hamavu hosena kaheshi Kalunga wekako kuvanga muIsalele kaha.+ Shikaho ove mwata wami achitavile wana* nangukuhana ami ngamba yove.”
16 Oloze Elisha ambile ngwenyi: “Omu ayoya Yehova tu, ou ngweji kuzachilanga,* kangweshi kwitavila wana kanako.”+ Namane amushinjililile autambule, oloze ikiye kautambwileko.
17 Jino Namane ambile ngwenyi: “Nge kaute kutambula ou wana, kaha nguhane milumba yamavu yakumbata vimbulu vavali yamulifuchi lino nguyenga nayo mwomwo ami ngamba yove kangweshi kukahana wana wakulumba chipwe kuvatwila vimuna kutulunga vekako, shina kuli Yehova kaha.
18 Oloze Yehova akangukonekele ami ngamba yove hachuma chino: Omu mwata wami mwangana mwengilanga mutembele yakalunga Limone nakulifukula, mwalikwachililanga kulivoko lyami nakungulingisa nayami ngulifukule. Shikaho omu nangukalifukula mutembele yakalunga Limone, Yehova akangukonekele ami ngamba yove hachuma kanechi.”
19 Omu Elisha evwile mazu kana, amwambile ngwenyi: “Yakonga mukuunda.” Namane akatukile mangana ayenga kwimbo lyenyi. Oloze omu atambukileko tunda yayindende,
20 Ngehaze+ ngamba yamutu waKalunga wamuchano+ alyambile ngwenyi: ‘Mwata wami namweche Namane kaSulya+ ayenga chakuhona kutambula wana amunehelanga. Omu ayoya Yehova tu, nangumulahila Namane ngukatambuleko wana umwe.’
21 Ngocho Ngehaze alahilile Namane. Omu Namane atalile munyima, amwene mutu ali nakumulahila, ngocho asulukile mulitemba lyenyi nakuliwana nenyi, kaha ambile ngwenyi: “Kwahola!”
22 Ikiye amukumbulwile ngwenyi: “Kwahola! Mwata wami nangutumu ngwenyi, ‘Oholili ngana kuli ami kuneza vanyike vamalunga vavali kufuma kuli vana vavapolofweto, kungalila yajipili yaEfwalime. Vahaneko talende yapalata yimwe namahina akuvwala avali.’”+
23 Namane ambile ngwenyi: “Chamwaza. Mbataho jitalende jivali.” Namane amushinjilile+ ambate jize jitalende jivali, kaha ajivungilile mujinjeke jivali, namahina akuvwala avali, kaha avihanyine kuli vangamba jenyi vavali mangana vamumbachiseko.
24 Omu vahetele kuOfwele,* Ngehaze atambwile vize vyuma kuli vaze vangamba nakuvingisa muzuvo yenyi, kaha avasuwile vayenga. Omu valingile hivanayi lyehi,
25 Ngehaze ayile nakwimana kumeso amwata wenyi. Kaha mwata wenyi Elisha amwihwile ngwenyi: “Ngehaze, uli nakufuminyina kulihi?” Oloze ikiye amukumbulwile ngwenyi: “Ami ngamba yove noku ngwayanga vene kwauchi.”+
26 Elisha amwambile ngwenyi: “Ngwakumonanga namuchima wami omu wayanga, nomu asulukanga Namane mulitemba nakukuwana. Kumana luno hilwola lwakutambula palata, namahina akuvwala, najilive, namande amivinyo, namikoko, navangombe, navangamba vamalunga navava vamapwevo nyi?+
27 Shikaho mbumba yaNamane+ nayiza hali ove navana vove haya myaka yosena.” Omu Ngehaze afumine kuli mwata wenyi, hahaze vene mbumba yamukwachile, kaha mujimba wenyi watomene to nambumba.+
Kwinyikila Chamwishi
^ Chipwe “apwile namusongo wahachikova.”
^ Pamo Namane.
^ Talende yimwe yapwile jikilongalamu 34.2. Tala Chihande B14.
^ Hepe., “kisu.”
^ Hepe., “nachilombo.”
^ Hepe., “ou ngweji kwimananga kumeso enyi.”
^ Chihela chimwe chamuSamaliya, pamo pili chipwe chihela chakukola.
