Vamyangana 2 6:1-33
6 Jino vana vavapolofweto+ vahanjikile kuli Elisha ngwavo: “Kuno kuchihela tuli nakutwama nayove kunatukehela.
2 Shikaho tusuule tuyenga kuYotau. Mutu himutu mwakateta mwalachi mangana tukatunge mwakutwama.” Kaha Elisha avambile ngwenyi: “Yenunga.”
3 Mwanakapolofweto umwe ambile ngwenyi: “Mwitavila kuya hamwe nayetu vangamba jove tahi?” Elisha amukumbulwile ngwenyi: “Natuya hamwe.”
4 Elisha ayile navo, kahomu vahetele kuYotau vaputukile kuteta mitondo.
5 Omu mwanakapolofweto umwe apwile nakuteta mutondo, ngimbu yenyi yasokokelele mulwiji. Kaha atambakanyine ngwenyi: “Mama lelo ove mwata wami! Eyi ngimbu ngwalinganga yakulomba.”
6 Uze mutu waKalunga wamuchano ambile ngwenyi: “Yinaholokela kulihi?” Kaha amulwezele haze yaholokelele. Elisha atetele chitondo nakwasa haze yaholokelele, kaha yafwapukile.
7 Ambile ngwenyi: “Yinone.” Ngocho olwele livoko lyenyi nakuyinona.
8 Jino mwangana waSulya ayile mangana akalwe jita navaIsalele.+ Kaha atwamine punga navangamba jenyi, ngocho ambile ngwenyi: “Natukatunga chilombo chetu kunganji kukananga.”
9 Jino mutu waKalunga wamuchano+ atumine mazu kuli mwangana wavaIsalele ngwenyi: “Zangama, kanda ukahichila kunganji kukanangako, mwomwo kukiko vali nakuya vaSulya.”
10 Kaha mwangana wavaIsalele atumine mazu kuchihela kuze amukanjile mutu waKalunga wamuchano. Elisha akanjile mwangana wavaIsalele mapapa kakavulu,* kaha kayileko.+
11 Chuma kana chevwishile mwangana* waSulya kupihya, ngocho asanyikile vangamba jenyi nakwamba ngwenyi: “Ngulwezenu! Iya hakachi ketu ali kusali yavaIsalele?”
12 Jino ngamba yenyi umwe ambile ngwenyi: “Wauchi ove mwata wetu mwangana. Kapolofweto wamuIsalele Elisha ikiye eji kwambululanga vyuma weji kuhanjikilanga mukapete kove kakusavala.”+
13 Kaha mwangana waSulya ambile ngwenyi: “Yenu nakutondatonda okwo ali mangana ngutume vatu vakamukwate.” Omu mwahichile makumbi, vamulwezele jino ngwavo: “Elisha ali kuNdotane.”+
14 Ngocho atumine maswalale vavavulu namatemba avo ajita natuvalu twavo. Vayile naufuku, kaha vakahakile nganda yize muchingombela.
15 Omu ngamba yayauze mutu waKalunga wamuchano ahindukile chimene nakulovoka haweluka, amwene liyongomena lyamaswalale, natuvalu twavo, namatemba avo ajita vanajingilika nganda yosena. Uze ngamba ambile kuli Elisha ngwenyi: “Mama lelo ove mwata wami! Natulinga ngachilihi?”
16 Elisha ambile ngwenyi: “Kanda nawivwa womako.+ Mwomwo kuli etu kuli vavavulu kuhambakana vaze vali kuli vakiko.”+
17 Jino Elisha alombele ngwenyi: “Ove Yehova, taununa meso enyi mangana ahase kumona.”+ Hahaze vene Yehova ataunwine meso ayauze ngamba, kaha amwene kungalila yajipili kwosena kuli tuvalu namatemba ajita akakahya+ vinamujingilika Elisha che ndo.+
18 VaSulya vapandamine kuze apwile Elisha, kaha ikiye alombele kuli Yehova ngwenyi: “Vavete ava vatu naupuputa.”+ Ngocho avavetele naupuputa nge muze alombele Elisha.
19 Kaha Elisha ambile kuli vakiko ngwenyi: “Jila muneza keshi yikikoko. Kaha nganda munakatukila nawa keshi yikikoko. Shikaho ngukavangizenu ngumitwale kuli mutu muli nakutonda.” Oloze ikiye avatwalile kuSamaliya.+
20 Omu vahetele kuSamaliya, Elisha ambile ngwenyi: “Ove Yehova tonesa meso avo mangana vamone.” Ngocho Yehova atonesele meso avo, kaha vamwene ngwavo vali muSamaliya.
21 Omu mwangana wavaIsalele avamwene, ambile kuli Elisha ngwenyi: “Ove mwata wami mungwitavisa nguvanongese nyi?”
22 Oloze Elisha ambile ngwenyi: “Kanda uvanongesako. Kutala vatu vaze weji kukwatanga ufunge napoko yove yamukwale nauta wove wamanana weji kuvanongesanga nyi? Vahane vyakulya valyenga nameya vanwenga,+ kufumaho valiyile kuli mwata wavo.”
23 Kaha avawahishilile vyakulya vyavivulu, ngocho valile nakunwa, kaha avasuwile vayenga kuli mwata wavo. Kufuma vene haze, mazavu avaSulya+ avaka-kunyemukila kawayilenga cheka mulifuchi lyavaIsaleleko.
24 Jino Mbene-hatate mwangana waSulya akungulwile maswalale* jenyi vosena, kaha vayile vakahake Samaliya muchingombela.+
25 Vahakile nganda yaSamaliya muchingombela, ngocho munganda mwapwile zala yakalombolombo.+ Mutwe wachimbulu+ vaulanjilenga najimbongo japalata 80, kaha chimbwa chakave* chatuji twamayembe chakusokesa muvimbwa viwana vachilanjilenga najimbongo japalata jitanu.
26 Omu mwangana wavaIsalele apwile nakutambuka hakembwe, evwile pwevo mwamutambakana ngwenyi: “Ove mwata wami mwangana, tukafwe!”
27 Mwangana amwihwile ngwenyi: “Kachi nge Yehova kamikafwileko, kaha ami vyuma nangumikafwa navifuma kulihi? Uno navifuma kuchizungwilo chamanona tahi, nyi kuchikamwino chavinyo chipwe chamaji?”
28 Amwihwile nawa ngwenyi: “Ukalu muka uli nawo?” Amukumbulwile ngwenyi: “Ou pwevo ambanga kuli ami ngwenyi, ‘Neha mwanove tulyenga lelo, kaha hamene nawa natulya mwanami.’+
29 Ngocho twatelekanga mwanami nakumulya.+ Kaha lichako, ngwambanga kuli ikiye ngwami, ‘Neha mwanove nawa mangana tumulye.’ Oloze ikiye nasweke mwanenyi.”
30 Omu mwangana evwile mazu kana, apihililile nakupula uvwalo wenyi.+ Kahomu apwile nakutambuka hakembwe, vatu vamumwene navwale chikeleyi kwishi yauvwalo wenyi.*
31 Kaha mwangana ambile ngwenyi: “Kalunga anguzangamise mwamunene kachi nge lelo kangweshi kuvatula mutwe waElisha mwanaShafwateko.”+
32 Jino Elisha atwamine muzuvo yenyi navakulwane hamwe. Kaha mwangana atumine kanganda alivange kulutwe lwenyi, oloze shimbu kanda uze kanganda ahete, Elisha alwezele vaze vakulwane ngwenyi: “Munamono ngwetu! Ou muka-kujiha vatu+ natumu kanganda kenyi mangana ezenga anguvatule mutwe. Omu mweza ou kanganda, musoke lipito nakukundaminaho. Ngunevu jishindo jamahinji amwata wenyi munyima yenyi.”
33 Shimbu Elisha apwile nakuhanjika navaze vakulwane, uze kanganda ejile. Kaha mwangana ambile ngwenyi: “Ou ukalu kana unafumu kuli Yehova. Mwomwo ika nanguvandamina lika Yehova?”
Kwinyikila Chamwishi
^ Chipwe “keshi kamwe kaha chipwe kavaliko.”
^ Hepe., “muchima wamwangana.”
^ Hepe., “chilombo.”
^ Kave yimwe yapwile jilita 1.22. Tala Chihande B14.
^ Chipwe “kwishi, hamujimba wenyi.”
