Vamyangana 2 7:1-20
7 Jino Elisha ambile ngwenyi, “Ivwenu omu nahanjika Yehova. Yehova nambe ngwenyi: ‘Kufuma hamene nalwola nge luno, unga wakusalulula wakuta mushiya* yimwe navaulanda nashekele yimwe kuchikolo* changanda yaSamaliya, kaha mbale yakuta mujishiya jivali navayilanda nashekele* yimwe.’”+
2 Kapitau uze vafwelelele kuli mwangana ambile kuli mutu waKalunga wamuchano ngwenyi: “Numba tuhu Yehova mwasokolola vikolo vyameya mwilu, chuma kanechi* kacheshi kuhasa kusolokako.”+ Uze mutu waKalunga amwambile ngwenyi: “Chuma kana nauchimona nameso ove,+ oloze vyakulya kana kaweshi kuvilyako.”+
3 Jino kuchikolo changanda+ kwatwaminenga vaka-mbumba vawana. Kaha valyambile mwavomwavo ngwavo: “Ika natutwamina hano nakufwilaho?
4 Numba natwamba ngwetu, ‘Tuyenu munganda,’ natukafwilamo mwomwo muli zala yakalombolombo,+ kaha nawa nge natutwama lika hano, natufwilaho. Shikaho tuyenu kuchilombo chavaSulya. Kachi nge navatwecha tuvavatonyi, kaha natuyoya. Oloze nge navakatujiha kaha tukafwe tuhu.”
5 Vaze vaka-mbumba vakatukile muze wi, vayile mangana vakengile muchilombo chavaSulya. Omu vahetele kusembwa yachilombo, kavamwene mutu numba umweko.
6 Yehova alingishile vaSulya muchilombo vevwenga jishindo jamaswalale vavavulu, namatemba avo ajita, natuvalu twavo.+ Ngocho valyambile mwavomwavo ngwavo: “Ivwenu! Mwangana wavaIsalele nakambe vamyangana javaHete navamyangana vakuEjipitu mangana vezenga nakutulukuka.”
7 Ngocho vakatukile muze wi nakuchina, vasezele jimbalaka javo, natuvalu twavo, navimbulu javo. Vasezele chilombo chavo nge muze chapwililile, vachinyine mangana vayovole myono yavo.
8 Omu vaka-mbumba vahetele kusembwa yachilombo vengilile mumbalaka yimwe, kaha valile nakunwa. Vambachile palata, naulu, nauvwalo, kaha vayile nakuvisweka. Kaha vakindulukile cheka nakwingila mumbalaka yikwavo, vambachilemo vyuma nakuya nakuvisweka.
9 Jino valyambile ngwavo: “Chuma tuli nakulinga kachawahileko. Likumbi lyalelo linapu hilikumbi lyamujimbu wamwaza. Kachi nge natulangisa nakuvandamina palanga nomu nakucha, kaha nachitamo tuhu kutuzangamisa. Tuyenu nakwambulula chuma kanechi kuli vaze vakuzuvo yamwangana.”
10 Ngocho vayile, vasanyikile vaka-kulama kuchikolo changanda, kaha vavambulilile ngwavo: “Twayanga kuchilombo chavaSulya, oloze katwawanyine mutu chipwe kwivwa lizu lyamutuko. Twawananga kaha tuvalu navimbulu vanavakase, jimbalaka nawa hanga japwilanga.”
11 Vaze vaka-kulama kuchikolo vambulwile chuma kana kuli vaze vakuzuvo yamwangana.
12 Jino mwangana ahindukile naufuku, ambile kuli vangamba jenyi ngwenyi: “Manenu ngumilweze omu vanalingi vaSulya. Vanatachikiza ngwavo tuli nazala,+ ngocho vanafumu muchilombo chavo, kaha vanaswame muchipapa nakwamba ngwavo, ‘Omu navalovoka munganda yavo, natuvakwata vavatonyi, kaha natwingila munganda yavo.’”+
13 Jino ngamba yenyi umwe ambile ngwenyi: “Sakula malunga vamwe vambate vimbulu vatanu vanasale muno munganda mangana uvatume vakatale vyuma vinalingiwa kuze. Numba nge vanavajihi, chili tuhu kanawa mwomwo navaIsalele vosena vaze vanasale kuno navafwa. Kaha kavahambakanyine nawa vaIsalele vaze vanafu lyehiko. Tuvatumenu vayenga kaha.”
14 Ngocho vambachile matemba ajita avali natuvalu, kaha mwangana avatumine kuchilombo chavaSulya ngwenyi: “Yenu mukataleko.”
15 Vaze malunga vakavangijile vaSulya swi nakuYotau, kaha mujila vayile vawanyinenga uvwalo, navyuma vize vaholwele vaSulya hakuchina. Vaze malunga vakindulukile kuli mwangana nakumuhichilamo mujimbu wosena.
16 Jino vatu valovokele munganda, vayile nakupukula vyuma vyavaSulya muchilombo. Ngocho unga wakusalulula wakuta mushiya yimwe vaulanjile nashekele yimwe, kaha mbale yakuta mujishiya jivali vayilanjile nashekele yimwe nge muze ahanjikile Yehova.+
17 Mwangana atongwele uze kapitau kenyi alamenga kuchikolo changanda, oloze vamulyatangilile kuze kuchikolo, kaha afwile nge muze mutu waKalunga wamuchano alwezele mwangana omu ejile kuli ikiye.
18 Vyuma vyasolokele vene nge muze ahanjikile mutu waKalunga wamuchano kuli mwangana ngwenyi: “Kufuma hamene nalwola nge luno, unga wakusalulula wakuta mushiya yimwe navaulanda nashekele yimwe kuchikolo changanda yaSamaliya,+ kaha mbale yakuta mujishiya jivali navayilanda nashekele yimwe.”
19 Oloze uze kapitau ambile kuli mutu waKalunga wamuchano ngwenyi: “Numba tuhu Yehova mwasokolola vikolo vyameya mwilu, chuma kanechi* kacheshi kuhasa kusolokako.” Uze mutu waKalunga amwambile ngwenyi: “Chuma kana nauchimona nameso ove, oloze vyakulya kana kaweshi kuvilyako.”
20 Omu mukiko chasolokele kuli ikiye, vatu vamulyatangilile kuchikolo changanda, kaha afwile.
Kwinyikila Chamwishi
^ Shiya yimwe yapwile jilita 7.33. Tala Chihande B14.
^ Chipwe “kuvisakano.”
^ Shekele yimwe yapwile jingalamu 11.4. Tala Chihande B14.
^ Hepe., “lizu kaneli.”
^ Hepe., “lizu kaneli.”
