Vamyangana 2 8:1-29
8 Elisha ahanjikile kuli naye yauze mwana ahindwile kukufwa+ ngwenyi: “Katuka uyenga natanga yove yosena, ukatwame kweshoko kulifuchi unasake mwomwo Yehova mwaneha zala yakalombolombo+ mulifuchi lino hamyaka 7.”
2 Uze pwevo alingile nge muze amulwezele mutu waKalunga wamuchano. Ayile navaze vakuzuvo yenyi vosena, kaha vakatwamine mulifuchi lyavaFwilishite+ hamyaka 7.
3 Omu yakumine yize myaka 7, uze pwevo akindulukile kufuma kulifuchi lyavaFwilishite. Kaha ayile akalembelele mwangana mangana vamuhane zuvo yenyi nawande wenyi.
4 Jino mwangana apwile nakuhanjika naNgehaze ngamba yamutu waKalunga wamuchano, amwihwile ngwenyi: “Ngulweze vyuma vyangolo vyosena nalinginga Elisha.”+
5 Shimbu Ngehaze apwile nakulweza mwangana omu Elisha ahindwile uze kanyike wakufwa,+ naye yauze kanyike vahindwile kuli Elisha ejile kuli mwangana nakumulembelela mangana vamuhane zuvo yenyi nawande wenyi.+ Kaha Ngehaze ambile kuli mwangana ngwenyi: “Ove mwata wami mwangana, ou ikiye uze pwevo namwanenyi uze vahindwile kuli Elisha.”
6 Jino mwangana ehwile uze pwevo amulweze mujimbu wosena, ngocho uze pwevo amuhichilililemo. Kaha mwangana alwezele chilolo chenyi ngwenyi: “Ou pwevo vamukindulwishile vyuma vyenyi vyosena, nakumushishishilamo jimbuto valiminenga muwande wenyi hamyaka yosena yize natwamenga kulifuchi lyeka.”
7 Omu Elisha ayile kuNdamashiku,+ Mbene-hatate+ mwangana waSulya apwile nakuviza. Kaha mwangana vamulwezele ngwavo: “Mutu waKalunga wamuchano+ neza kuno.”
8 Ngocho mwangana ambile kuli Hazayele+ ngwenyi: “Mbata wana uyenga nawo kuli mutu waKalunga wamuchano.+ Angwihwile kuli Yehova numba nge nanguyoya kumusongo wami nyi chiku.”
9 Hazayele ambachile wana nakuya nawo kuli Elisha. Ambachile vyuma vyamwaza vyamulifuchi lyaNdamashiku, avimbachilile hali vangamela 40. Ayile kuli Elisha nakwamba ngwenyi: “Mwanove Mbene-hatate mwangana waSulya nangutumu kuli ove ngwenyi, ‘Uno nanguhinduka kumusongo kanou tahi nyi chiku?’”
10 Jino Elisha amukumbulwile ngwenyi: “Yako ukamulweze ngwove, ‘Nauhinduka,’ olozenyi Yehova nangulweze ngwenyi mwafwa.”+
11 Elisha atalile Hazayele swi, kaha Hazayele evwile sonyi. Jino Elisha mutu waKalunga wamuchano aputukile kulila.
12 Hazayele ahulishile ngwenyi: “Ove mwata wami uli nakulila ika?” Elisha amukumbulwile ngwenyi: “Mwomwo ngunatachikiza ngwami naukalinga vyuma vyavipi kuli vaIsalele.+ Jinganda javo jajikembwe naukajocha nakakahya, maswalale javo naukavajiha najipoko jamikwale, vana vavo naukavachikachika, kaha mapwevo javo vaze vanemita naukavapulapula hamajimo avo.”+
13 Jino Hazayele ambile ngwenyi: “Ami ngamba yove, kawa wamokomoko kangweshi kuhasa kulinga vyuma kanako.” Oloze Elisha ambile ngwenyi: “Yehova nangulweze lyehi ngwenyi naukapwa umwangana waSulya.”+
14 Hazayele asezele Elisha nakukinduluka kuli mwata wenyi. Kaha mwata wenyi amwihwile ngwenyi: “Vyuma muka nahanjika Elisha?” Hazayele akumbulwile ngwenyi: “Elisha nangulweze ngwenyi nauhinduka kumusongo wove.”+
15 Jino lichako Hazayele ambachile lihina lyakwala hakahela, alimbwichikile mumeya nakumufwikalyo kumeso palanga nomu afwile nachitukulu.+ Kaha aswanyine hawangana.+
16 Yeholame+ mwanaYehoshafwate Mwangana wavaYuta aputukile kuyula muYelusalema mumwaka wamuchitanu wachiyulo chaYeholame+ mwanaAhave mwangana wavaIsalele.
17 Yeholame apwile namyaka yakusemuka 32 omu aputukile kuyula, kaha ayulile myaka 8 muYelusalema.
18 Yeholame akavilenga jijila jajipi javamyangana javaIsalele,+ nge muze valingilenga vaze vakuzuvo yaAhave.+ Ambachile mwanaAhave kupwa pwevo lyenyi,+ kaha alingilenga vyuma vyavipi kumeso aYehova.+
19 Oloze Yehova kasakile kunongesa vaYutako mwomwo yangamba yenyi+ Ndavichi. Kalunga ashikile kukahana linongo kuli Ndavichi+ nakuli vana venyi hamakumbi osena navayoyanga.
20 Hamakumbi ayulilenga Yeholame, vaEtome valikangile kuli vaYuta,+ kaha valitongwelele mwangana wavo.+
21 Ngocho Yeholame ayile kuZaile namatemba enyi ajita osena. Jino kuheta naufuku, ahindukile nakulukuka vaEtome vaze vamujingilikile hohamwe natupitau twamatemba ajita. Kaha maswalale vachinyinyine kujimbalaka javo.
22 VaEtome vanalikangenga kuli vaYuta palanga nakulikumbi lyalelo. Navatu vamunganda yaLivina+ nawa valikangile halwola luze.
23 Mujimbu wosena waYeholame wavyuma alingile vausoneka mumukanda wamijimbu yavamyangana javaYuta.
24 Yeholame atokele ngana mwavakakuluka jenyi, kaha vamufunjile navakakuluka jenyi hamwe muNganda yaNdavichi.+ Kaha mwanenyi Ahajiya+ aswanyine hawangana.
25 Ahajiya mwanaYeholame mwangana wavaYuta, aputukile kuyula muYelusalema mumwaka wakusokesa 12 wachiyulo chaYeholame mwanaAhave mwangana wavaIsalele.+
26 Ahajiya apwile namyaka yakusemuka 22 omu aputukile kuyula, kaha ayulile mwaka umwe muYelusalema. Lijina lyanaye apwile ikiye Ataliya+ muzukulu* lyaOmoli+ mwangana wavaIsalele.
27 Ahajiya akavilenga jijila jajipi javaze vakuzuvo yaAhave,+ kaha alingilenga vyuma vyavipi kumeso aYehova nge muze valingilenga vaze vakuzuvo yaAhave, mwomwo ambachile pwevo wakuzuvo yaAhave.+
28 Ahajiya ayile hamwe naYeholame mwanaAhave kuLamote-ngileyate+ vakalwe jita naHazayele mwangana waSulya. Oloze vaSulya valemekele Yeholame.+
29 Ngocho Mwangana Yeholame akindulukile kuYezelele+ mangana akalikangule kujimbandu vamulemekele vaSulya kuLama omu azungile naHazayele mwangana wavaSulya.+ Jino Ahajiya mwanaYeholame mwangana wavaYuta ayile kuYezelele akamone Yeholame mwanaAhave mwomwo vamulemekele jimbandu.*