Vamyangana 2 9:1-37
9 Jino kapolofweto Elisha ahanjikile kuli mwanakapolofweto umwe ngwenyi: “Lijichike chikuto chove mumbunda, umbate saji yamaji uyenga jimbushi kuLamote-ngileyate.+
2 Omu nauheta kuze, katonde Yehu+ mwanaYehoshafwate, Yehoshafwate mwanaNyimishi. Kamukatule hali vandumbwenyi, kaha kengile nenyi mukapete kamukachi.
3 Kaha ukambate yize saji yamaji, ukamuhingunwine maji hamutwe wenyi nakwamba ngwove: ‘Yehova nambe ngwenyi: “Ngunakuwavisa upwenga umwangana wavaIsalele.”’+ Kufumaho ukasokolole kuchikolo, ukalovoke nakuya jimbushi.”
4 Ngocho uze ngamba yakapolofweto ayile kuLamote-ngileyate.
5 Omu ahetele kuze, awanyine tupitau twamaswalale vanatwame hamwe. Kaha ambile ngwenyi: “Ove kapitau, nguli namazu akuhanjika kuli ove.” Jino Yehu amwihwile ngwenyi: “Iya uli nakusaka kuhanjika nenyi hakachi ketu?” Ikiye ambile ngwenyi: “Nguli nakusaka kuhanjika nayove vene.”
6 Ngocho Yehu akatukile nakwingila hamwe muzuvo. Kaha uze ngamba ahingunwinyine maji mumutwe waYehu nakwamba ngwenyi, “Yehova Kalunga kaIsalele nambe ngwenyi: ‘Ngunakuwavisa upwenga umwangana wavatu jaYehova, vaIsalele.+
7 Ukanongesa vaze vakuzuvo yamwata wove Ahave, mangana ngulinge sambanjinga hamanyinga avangamba jami vapolofweto, nahamanyinga avangamba jaYehova vosena vaze vajihile kuli Yezevele.+
8 Vaze vakuzuvo yaAhave nanguvanongesa hohamwe namalunga vosena* vakuzuvo yenyi. Nangunongesa navaze vazeneka wakuvakafwa, navaze vakuzeya muli vaIsalele.+
9 Vatu vakuzuvo yaAhave nanguvalinga nge muze ngwalingile vaze vakuzuvo yaYelovowame+ mwanaNevate, namuze nawa ngwalingile vaze vakuzuvo yaMbasha+ mwanaAhiya.
10 Kaha Yezevele navakamulya kutuwa hamusuka wamavu wakuYezelele,+ naumwe mwakamufunda wauchi.’” Ngocho uze mwanakapolofweto asokolwele kuchikolo nakuya jimbushi.+
11 Omu Yehu akindulukile kuli vaze vangamba jamwata wenyi, vamwihwile ngwavo: “Kwahola? Ou chizaluke ezanga nakulinga ika kuli ove?” Ikiye avakumbulwile ngwenyi: “Ou lunga mwamutachikiza lyehi, navyuma eji kuhanjikanga nawa mwavijiva.”
12 Oloze vakiko vambile ngwavo: “Makulyove, tulweze muchano.” Ikiye ambile ngwenyi: “Nangulweze munganji mukananga. Kaha ambanga nawa ngwenyi, ‘Yehova nambe ngwenyi: “Ngunakuwavisa upwenga umwangana wavaIsalele.”’”+
13 Hakwivwa mazu kana, mutu himutu azulile chikuto chenyi, achihakile hajindondelo mangana ikiye alyateho mahinji enyi.+ Kaha vembile luneta nakwamba ngwavo: “Yehu napu mwangana!”+
14 Kaha Yehu+ mwanaYehoshafwate, Yehoshafwate mwanaNyimishi ajinyine kufumbukila Yeholame.
Jino Yeholame navaIsalele vosena vapwile nakulama nganda yaLamote-ngileyate,+ mwomwo Hazayele mwangana+ waSulya asakile kuyilukuka.
15 Mwangana Yeholame akindulukile kuYezelele+ mangana akalikangule kujimbandu vamulemekele vaSulya kuLama omu azungile naHazayele mwangana wavaSulya.+
Jino Yehu ambile kuli vaze tupitau ngwenyi: “Kachi nge munetavila,* kaha kanda namwechelela mutu muno munganda ayenga nakwambulula mazu kana kuYezeleleko.”
16 Yehu ambachile litemba lyenyi nakuya kuYezelele mwomwo oku kukiko apwile Yeholame nakulikangula kujimbandu jenyi. Namwangana wavaYuta Ahajiya naikiye apwile kuze nakumenekela Yeholame.
17 Jino muka-kulama emanyine hakaposhi kakuYezelele, kaha amwene Yehu nalizavu lyenyi vali nakupandama kuze kunganda. Kaha ambile ngwenyi: “Ngunamono lizavu lyamalunga vali nakwiza.” Yeholame ambile ngwenyi: “Tumako muka-kutambukila hakavalu alihumangane navo nakuvehula ngwenyi, ‘Uno muneza mukuunda tahi?’”
18 Uze muka-kutambukila hakavalu ayile nakuliwana naYehu, kaha ambile ngwenyi: “Mwangana nambe ngwenyi, ‘Uno muneza mukuunda tahi?’” Oloze Yehu ambile ngwenyi: “Kanda naunguhulisa ‘vyakuundako.’ Ngukavangize kaha munyima.”
Uze muka-kulama ambulwile kuli mwangana ngwenyi: “Ou mutu twatumanga navawane, oloze kakindulukileko.”
19 Muka-kulama atumineko mutu mukwavo muka-kutambukila hakavalu. Kahomu ahetele, ambile kuli vakiko ngwenyi: “Mwangana nambe ngwenyi, ‘Uno muneza mukuunda tahi?’” Oloze Yehu ambile ngwenyi: “Kanda naunguhulisa ‘vyakuundako.’ Ngukavangize kaha munyima.”
20 Uze muka-kulama ambulwile kuli mwangana ngwenyi: “Ou mutu twatumanga navawane, oloze kakindulukileko. Ou ali nakutambukisa litemba ali nakusoloka nge Yehu muzukulu* lyaNyimishi, mwomwo eji kutambukisanga nge mutu wakuzaluka.”
21 Jino Yeholame ambile ngwenyi: “Kasenu litemba tuyengako.” Ngocho vakashile litemba lyenyi lyajita. Kaha Yeholame mwangana wavaIsalele, naAhajiya+ mwangana wavaYuta vayile mutu himutu mulitemba lyenyi mangana vakalihumangane naYehu. Kaha vakamuwanyine hamusuka wamavu waNavote+ muka-Yezelele.
22 Omu Yeholame aliwanyine naYehu, ambile kuli ikiye ngwenyi: “Ove Yehu, uneza mukuunda tahi?” Oloze Yehu ambile ngwenyi: “Nangwiza ngachilihi mukuunda okunyi noko Yezelele+ chalinga lika ujila navilinga vyakupanda?”+
23 Hahaze vene Yeholame alumwine litemba lyenyi nakuputuka kuchina. Ambile kuli Ahajiya ngwenyi: “Ove Ahajiya, tunafu!”
24 Jino Yehu ananyile uta wenyi wamanana nakwasa Yeholame munyima, mwivwi wapulasanyine hamuchima wenyi, kaha aholokelele mulitemba lyenyi.
25 Jino Yehu ambile kuli ngamba yenyi Mbinjikale ngwenyi: “Mumbate umumbile muwande waNavote muka-Yezelele.+ Anuka likumbi lize twapwile nakuya hamwe nayove munyima yaise Ahave. Yehova ambile mazu awa kuli Ahave ngwenyi:+
26 ‘Yehova nambe ngwenyi: “Zau ngwamonanga manyinga aNavote+ namanyinga amwanenyi. Shikaho naikiye nangukamujihila+ hamusuka uno wamavu,” mukiko mwanambe Yehova.’ Ngocho jino, mumbate umumbile hamusuka uno wamavu nge muze ahanjikile Yehova.”+
27 Omu Ahajiya+ mwangana wavaYuta amwene vyuma kana, achinyinyine jila yakuya kuzuvo yamumilemba. (Kaha Yehu amuhangasanyine nakwamba ngwenyi: “Mwasenu naikiye!” Kaha vamwashile muze mulitemba lyenyi omu apwile nakuchinyina kuNgule, kwakamwihi naIviliyame.+ Oloze achinyine lika nakukaheta kuMengito, kaha kukiko akafwililile.
28 Vangamba jenyi vamumbachile mulitemba nakumutwala kuYelusalema, kaha vakamufunjile mufuka yenyi navakakuluka jenyi hamwe muNganda yaNdavichi.+
29 Ahajiya+ aputukile kuyula vaYuta mumwaka wakusokesa 11 wachiyulo chaYeholame mwanaAhave.)
30 Omu Yehu ahetele kuYezelele,+ Yezevele+ evwile chuma kana. Ngocho alikwichile ulombo ulava mumeso enyi, nakuliwahisa kumutwe wenyi, kaha atalile munjanena.
31 Omu Yehu engilile kuchikolo, Yezevele amwambile ngwenyi: “Unanuka vyuma vyasolokele kuli Jimili omu ajihile mwata wenyi nyi?”+
32 Yehu andwile meso enyi kunjanena, kaha ambile ngwenyi: “Iya ali kusali yami?”+ Jino vilolo vavali nyi vatatu ngana vaze vapwile helu vamutalile.
33 Yehu ambile kuli vakiko ngwenyi: “Mumbilenu hamavu!” Ngocho vamukwachile nakumumbila hamavu, kaha manyinga enyi asapukilile hambango nahatuvalu. Jino Yehu amuhichishile litemba lyenyi.
34 Kufumaho engilile muzuvo, alile nakunwa. Kaha ambile ngwenyi: “Kambatenu mujimba wayou pwevo wakwangula mukaufunde mwomwo apwa mwanamwangana.”+
35 Oloze omu vayile nakumumbata mangana vakamufunde, vawanyine kaha chikola chenyi, navilyachilo vyenyi, navikamba vyamavoko enyi.+
36 Omu vakindulukile kuli Yehu nakumulweza chuma kana, ikiye ambile ngwenyi: “Echi chinatesamo mazu ahanjikile Yehova+ kuhichila muli ngamba yenyi Elija wakuChishivi ngwenyi, ‘Vatuwa navakalya mujimba waYezevele hamusuka wamavu wakuYezelele.+
37 Kaha mujimba waYezevele naukapwa wilo hamusuka wamavu wakuYezelele mangana vatu vakazeneke kwamba ngwavo: “Ou ikiye Yezevele.”’”
Kwinyikila Chamwishi
^ Hepe., “naweshowo eji kusushilanga hambango.” Eyi hihanjikiso yachiHepeleu yakasautu hakuvuluka malunga.
^ Chipwe “Kachi nge myono yenu yinetavila.”
^ Hepe., “mwana.”
