Vilinga 1:1-26
1 Ove Teyofwilo, mumukanda wakulivanga ngwasonekelemo vyuma vyosena vize Yesu aputukile kulinga nakunangula+
2 palanga nakulikumbi lize vamutambwile mwilu,+ omu alingile hanahane lyehi jindongi kuhichila mushipilitu yajila kuli vaposetolo vaze asakwile.+
3 Omu alingile hanayande lyehi, alisolwele wamutonyi naunjiho wamwenemwene wauvulu kuli vakiko.+ Vamumwene hamakumbi 40, kaha apwilenga nakuvalweza vyaWangana waKalunga.+
4 Omu aliwanyine navo, avalwezele ngwenyi: “Kanda namufuma muYelusalemako,+ oloze vandaminenunga vyuma vize namishiki Tata,+ vize munevunga kuli ami,
5 mwomwo chikupu vene Yowano ambapachishilenga mumeya, oloze kamweshi kuhita makumbi amavuluko, navamimbapachisa nashipilitu yajila.”+
6 Jino omu valikungulwile hamwe, vamwihwile ngwavo: “Ove Mwata, uno wangana nauukindulwisa kuli vaIsalele halwola luno tahi?”+
7 Ikiye ambile kuli vakiko ngwenyi: “Kacheshi chenu kutachikiza lwola chipwe jingonde vize Tata atongola mungolo jenyiko.+
8 Oloze namukatambula ngolo omu shipilitu yajila nayikeza hali enu,+ kaha namukapwanga muvinjiho+ jami muYelusalema,+ namuYuleya mwosena, namuSamaliya,+ nakuvihela vyakwakusuku vyahamavu.”*+
9 Kahomu akumishile kuhanjika vyumevi, vamuzezwile mwilu oku vakiko vali nakumona, kaha livwi lyamufwikile, ngocho kavamumwene chekako.+
10 Shimbu vapwile nakushishika mwilu omu apwile nakuya, kukasumuka malunga vavali vanemana kuli vakiko, vanavwale uvwalo utoma,+
11 kaha vambile ngwavo: “Enu malunga vakuNgalileya, ika munemanyina nakutala mwilu? Ou Yesu vanatambula mwilu, ou nafumu kuli enu, mwakeza cheka mujila yoyimwe munamumwenamo hakuya mwilu.”
12 Jino vakindulukile cheka kuYelusalema+ kufuma kupili yize vavuluka ngwavo Pili yaMilive yize yatwama kwakamwihi naYelusalema, kafwe tunda vetavishile mutu kutambuka halikumbi lyasambata.*
13 Omu vahetele, vayile kukapete kahelu kuze vapwilenga nakutwama. Ava vapwile Petulu, naYowano, naYakova, naAndelei, naFwilipu, naTomase, naMbalaTolomeu, naMateu, naYakova mwanaAlefweu, naShimona uze watwima, naYuta mwanaYakova.+
14 Vosena ava valinungile hamwe nakukakachila kukulomba, hohamwe namapwevo vamwe,+ naMaliya naye yaYesu navandumbu jaYesu.+
15 Hamakumbi aze, Petulu emanyine mukachi kavandumbwenyi (vatu vosena vakungulukile vapwile kafwe 120) nakwamba ngwenyi:
16 “Enu malunga, enu vandumbwami, chapwile chakutamo chisoneka kutesamo, chize shipilitu yajila yapolofwetele kuhichila muli Ndavichi kutalisa kuli Yuta+ uze apwile muka-kutwaminyina vaze vakwachile Yesu.+
17 Mwomwo vamulavilile hali etu,+ kaha naikiye atambwile chazano kumulimo uno.
18 (Shikaho mutu kana alanjile chipapa nafweto yakuwanyina havilinga vyakuhenga,+ kaha ikiye hakuholokela chamutwe hamavu, lijimo lyenyi lyatuvikile, kaha vyamujimo lyenyi vyosena vyalovokele.+
19 Chuma kana vachitachikijile kuvatu vosena vatwaminenga muYelusalema, ngocho chize chipapa vachivulukile mulilimi lyavo ngwavo, Akeletama, kulumbununa, “Chipapa chaManyinga.”)
20 Mwomwo vasoneka mumukanda waJisamu ngwavo, ‘Chihela chenyi atwama chisale ngundu, kanda mukatwama mutuko,’+ kaha ‘Mulimo wenyi waulama vauzate kuli mutu weka.’+
21 Shikaho chatela hali ava malunga vaze vatambukilenga hamwe nayetu halwola lwosena luze Mwata Yesu apwilenga nayetu nakuzata milimo yenyi,*
22 kuputukila vene hakumumbapachisa kuli Yowano+ palanga nakulikumbi lize vatutambwileyo,+ hapwenga umwe uze mwapwa chinjiho nayetu hamwe kutalisa kukusanguka chenyi.”+
23 Ngocho vasakwile malunga vavali, ou Yosefwe, uze vavulukilenga ngwavo Mbalasava uze vavulukilenga nawa ngwavo Yushitu, kaha mukwavo Machiya.
24 Jino valombele ngwavo: “Ove Yehova,* ove watachikiza michima yavatu vosena,+ tulweze hali ava vavali ou unasakula
25 mangana ashise hachihela chakutala mulimo kanou nauposetolo, chize asezele Yuta uze ayile jila yenyi ivene.”+
26 Ngocho vazachishile tutachikijilo,+ kaha katachikijilo kenyikile Machiya, kaha vamulavilile hali vaze vaposetolo 11.*
Kwinyikila Chamwishi
^ Chipwe “nakusongosongo yamavu.”
^ Hela., “apwilenga muli etu, nakwingila nakulovoka.”
^ Tala Chihande A5.
^ Chipwe “kaha vamumwenenga nge vaze 11.”
