Vilinga 11:1-30
11 Jino vaposetolo navandumbwetu vaze vapwile muYuleya vevwile ngwavo navatu vakumafuchi eka nawa vanetavila mazu aKalunga.
2 Ngocho omu Petulu ejile kuYelusalema, vaze vakundwijile ungalami+ vaputukile kumukokojwesa*
3 ngwavo: “Wengilile muzuvo yavilima nakulya navo.”
4 Ngocho Petulu avalumbunwinyine munona munona ngwenyi:
5 “Ami ngwapwile munganda yaNjopa nakulomba, kaha hakulezukila mutulo, ngwamwene chakumwenesa. Ngwamwene chuma chimwe* chili nakufuma mwilu kwijiva nge lihina lyalinene lize vanakwachila kujisongo jalyo jiwana vali nakuchizezumuna, kaha chahetele kuli ami.+
6 Hakushishikamo, ngwamwenemo tunyama vamahinji awana awana vahamavu, natunyama vamuchipapa navyuma vyakuhalala hamavu natujila vakutuka helu.
7 Kaha ngwevwile nawa lizu nalyamba kuli ami ngwalyo, ‘Ove Petulu, katuka, jiha ulyenga!’
8 Oloze ngwambile ngwami, ‘Nduma ove Mwata, mwomwo mukanwa kami kanda mwingilengaho lyehi chuma chamajilo chipwe chachipiko.’
9 Kaha lizu lyakufuma mwilu lyakumbulwile kamuchivali ngwalyo: ‘Vyuma natomesa lyehi Kalunga ove kanda uvivuluka cheka ngwove vinapihiko.’
10 Chuma kana chasolokele katatu, kaha vyuma vyosena vavitwalile cheka mwilu.
11 Hahaze vene, kuzuvo yize twapwile kwemanyine malunga vatatu, vavatumine kuli ami kufuma kuKesaliya.+
12 Ngocho shipilitu yangulwezele ngwayo kanda nanguhuhwasanako, oloze nguyenga navo. Navava vandumbwetu 6 nawa ngwayile navo, kaha twengilile muzuvo yayauze lunga.
13 “Jino atwambulilile omu amwene uze kangelo emanyine muzuvo yenyi nakwamba ngwenyi: ‘Tuma vatu kuNjopa vakasanyike Shimona uze vavuluka nawa ngwavo, Petulu,+
14 kaha ikiye mwakakulweza vyuma vize navikakulwila ove navaze vakuzuvo yove vosena.’
15 Oloze omu ngwaputukile kuhanjika, shipilitu yajila yavaholokelele nge muze yatuholokelele etu hakuputuka.+
16 Kaha ngwanukile mazu aMwata, uze ambilenga ngwenyi, ‘Yowano ambapachishilenga mumeya,+ oloze enu navakamimbapachisa nashipilitu yajila.’+
17 Shikaho, kachi nge Kalunga avahanyine wana wakanyombo woumwe uze atuhanyine nayetu nawa, etu tunetavila muli Mwata Yesu Kulishitu, nyi ami yami iyaze numba ngumukanyise Kalunga?”+
18 Omu vevwile vyuma kanevi, valitwaminyine kuneha jipami,* kaha vamutohwesele Kalunga ngwavo: “Navatu vakumafuchi eka nawa Kalunga navetavisa vapihilile nakwalumuka mangana vayoye.”+
19 Jino vaze valimwangile+ mwomwo yaluyando luze lwepukile hali Setefwano, vayile mbwe nakuFwenyisha nakuKupulusu nakuAndeyoka, oloze vahanjikilenga mazu kuli vaYuleya kaha.+
20 Oloze malunga vamwe hali vakiko vaze vafumine kuKupulusu nakuKulene, vaze vejile kuAndeyoka, vaputukile kuhanjika kuvatu vaze vahanjikilenga chiHelase, nakuvambulila mujimbu wamwaza waMwata Yesu.
21 Kaha nawa, livoko lyaYehova* lyapwilenga navo hamwe, ngocho vatu vavavulu vapwile jino vaka-kwitava, kaha valumukilile kuli Mwata.+
22 Puho yavo yahetele kuchikungulwilo chize chapwile muYelusalema, kaha vatumine Mbalanape+ ayenga mbwe nakuAndeyoka.
23 Omu ahetele kuze, hakumona likoji lyalinene lyaKalunga, awahililile nakuputuka kuvakolezeza vosena vakakachilenga lika kuli Mwata namichima yavo yosena.+
24 Mwomwo Mbalanape apwile lunga wamwaza wakuzala nashipilitu yajila nalufwelelo nawa. Kaha kuli Mwata+ vawezeleleko vatu vavavulu.
25 Ngocho Mbalanape akatukile, ayile kuTalasu nakutondatonda Saulu.+
26 Kahomu amuwanyine, amunehele kuAndeyoka. Ngocho valikungulwilenga hamwe navo muchikungulwilo hamwaka wamuundu nakunangula vatu vavavulu. Kaha kuAndeyoka kukiko vene vavangilile kuvuluka tumbaji ngwavo vaka-Kulishitu+ kweseka nomu atwaminyinyine Kalunga.
27 Jino hamakumbi aze, vapolofweto+ vafumine kuYelusalema nakwiza kuAndeyoka.
28 Kaha kapolofweto umwe vavulukilenga ngwavo Angavu,+ emanyine nakuputuka kuhanjika kuhichila muli shipilitu ngwenyi hamavu hosena kalinwomu hezenga zala yakalombolombo.+ Zala kana yejile vene hamakumbi aKolochiu.
29 Kaha tumbaji vafwililile kutuma vyuma vyakulikafwa navyo+ kuli vandumbwavo vaze vatwaminenga muYuleya, kweseka nomu ahashilile mutu himutu.+
30 Kahomu mukiko valingile, vavitumine kuli vakulwane hakuvihana kumavoko aMbalanape naSaulu.+
Kwinyikila Chamwishi
^ Chipwe “kulipika nenyi.”
^ Hela., “chuma chimwe chakumbachila.”
^ Hela., “vaholele kulu.”
^ Tala Chihande A5.
