Vilinga 12:1-25
12 Kafwe halwola luze, mwangana Helote aputukile kuyanjisa vamwe muchikungulwilo.+
2 Kaha ajihile Yakova ndumbwaYowano+ napoko yamukwale.+
3 Omu amwene ngwenyi chuma kana chinevwisa vaYuleya kuwaha, ayile nawa nakukasa Petulu. (Echi chasolokele hamakumbi aChiwanyino chaJimbolo Jakuzeneka Chimbalwila.)+
4 Amukwachile nakumuhaka mukamenga,+ amuhanyine kumazavu amaswalale akulishisashisa awana aze apwile namaswalale vawana vawana mulizavu mangana vamulame mwomwo asakile ngwenyi omu nayikuma Paseka numba amulovole* kumeso avatu.
5 Ngocho Petulu vamulaminyine muze mukamenga, oloze chikungulwilo chapwile lika nakumulombelako chikuma kuli Kalunga.+
6 Jino omu Helote apwile hakamwihi nakulovola Petulu, haufuku uze Petulu asavalile tulo mukachi kamaswalale vavali oku vanamukase malenge avali, kaha vaka-kulama vapwile kuchikolo nakulama kamenga.
7 Jino kuli ikiye kwemanyine kangelo kaYehova,*+ kaha muze mukapete kamukamenga mwamunyikile zwalala. Uze kangelo anyikishile Petulu kuluhachi, amuhindwile nakwamba ngwenyi: “Katuka washi!” Kaha malenge aholokele kumavoko enyi.+
8 Uze kangelo ambile kuli ikiye ngwenyi: “Vwala uvwalo namendelo ove.” Kaha alingile vene ngocho. Jino uze kangelo ambile kuli ikiye ngwenyi: “Vwala uvwalo wove wahelu ungukavangize lika.”
9 Kaha alovokele, amukavangijile lika, oloze katachikijile ngwenyi vize apwile nakulinga uze kangelo vyamuchanoko. Ikiye ashinganyekele ngwenyi pamo ali nakumona chuma chakumwenesa kaha.
10 Omu vapulasanyine mukachi kavaze vaka-kulama vatete navaze vamuchivali, vahetele kuchikolo chafwelu chize chakulovokela munganda, kaha chize chikolo chalisokolokelele chivene. Valovokele, vosena vayile mujila yimwe, kaha hahaze vene uze kangelo amusezele.
11 Kahomu Petulu atachikijile vyuma vyasolokele, ambile ngwenyi: “Ngunatachikiza jino ngwami, chikupu vene Yehova* atumanga kangelo kenyi nakungupululula mulivoko lyaHelote nakuvyuma vyosena vize vapwanga nakutalilila vaYuleya ngwavo navisoloka.”+
12 Omu atachikijile ngocho, ayile kuzuvo yaMaliya, naye yaYowano uze vavulukile nawa ngwavo Mako,+ kuze valikungulwilile vavavulu nakulomba.
13 Kahomu angongomwezele kuchikolo chakuwingililo, ngamba wapwevo vavulukilenga ngwavo Londa, ejile nakutalako.
14 Jino hakutachikiza kanawa ngwenyi lizu kana lyaPetulu, kasokolwele kuchikoloko mwomwo yakuwahilila chikuma, oloze alahilile muzuvo nakuvalweza ngwenyi, Petulu nemana kuweluka kuchikolo.
15 Vakiko vambile kuli ikiye ngwavo: “Unazaluka.” Oloze ikiye ahanjikilenga lika ngwenyi vyuma apwile nakuvalweza vyamuchano. Kaha vakiko vambile ngwavo: “Kahanyi kangelo kenyi.”
16 Oloze Petulu apwile lika kuze nakungongomweza. Jino omu vasokolwele kuchikolo vamumwene, kaha valikomokelele.
17 Oloze avaholesele nalivoko mangana vahole kulu, nakuvalweza munona munona omu Yehova* amulovolanga mukamenga, kaha ambile ngwenyi: “Vyumevi kavyambululenu kuli Yakova+ nakuli vandumbwetu.” Ngocho afumine kuze nakuya kuchihela cheka.
18 Jino omu kwachele, muli vaze maswalale mwepukile pindangano hakusaka kwijiva vyuma vyasolokele kuli Petulu.
19 Helote amutondele chikuma. Kahomu ahonene kumuwana, ehwojwele vaze vaka-kulama nakwamba ngwenyi vavatwale nakuvazangamisa.+ Kaha afumine kuYuleya, ayile kuKesaliya nakukatwama vene kuze.
20 Jino Helote apihililile chikuma navatu vakuTule nakuShitone. Ngocho valinungile hamwe nakwiza kuli ikiye. Kahomu vakunywile Mbalashitu uze apwile kaselwa kuzuvo yamwangana,* vashimutwilile vyakuneha kuunda, mwomwo lifuchi lyavo lyatambwilenga kulya kufuma kulifuchi lyayou mwangana.
21 Oloze halikumbi limwe lyachilika, Helote avwalile uvwalo wenyi wawangana, kaha atwamine hachitwamo chakusopela nakuputuka kuhanjika kulikungumbuwa lyavatu.
22 Jino vatu vaze vakungulukile vaputukile kutambakana ngwavo: “Olyo hilizu lyakalunga, kalyeshi lyamutuko!”
23 Hahaze vene kangelo kaYehova* amuvetele, mwomwo katohwesele Kalungako, kaha vamulile kumavunu, ngocho afwile.
24 Oloze mazu aYehova* ayilenga lika nakukula nakutanda.+
25 Jino omu Mbalanape+ naSaulu vamanyishile mulimo wavo wakutwala vyuma vyakukafwa vatu muYelusalema,+ vakindulukile, kaha vambachile naYowano+ uze vavulukilenga ngwavo, Mako.
Kwinyikila Chamwishi
^ Chipwe “amulovole nakumusopesa.”
^ Tala Chihande A5.
^ Tala Chihande A5.
^ Tala Chihande A5.
^ Hela., “uze alaminenga kapete kamwangana kakusavala.”
^ Tala Chihande A5.
^ Tala Chihande A5.
