Vilinga 15:1-41
-
Navalipula jipami muAndeyoka hachihande chakujihana (1, 2)
-
Navatwala chihande kuYelusalema (3-5)
-
Vakulwane navaposetolo navaliwana (6-21)
-
Mukanda wakufuma kulizavu lyakutwaminyina (22-29)
-
Kulihenda kumanyinga (28, 29)
-
-
Mukanda naukolezeza vikungulwilo (30-35)
-
Paulu naMbalanape navalihandununa (36-41)
15 Jino malunga vamwe vejile kufuma kuYuleya nakuputuka kunangula vandumbwetu ngwavo: “Kuvanga vamijihane kweseka nomu mwaya jishimbi jaMose,+ mokomoko kaveshi kumilwilako.”
2 Oloze omu valingile hivanalikokojwesa lyehi chikuma naPaulu naMbalanape nakulipula navo jipami, vatongwele Paulu naMbalanape navakwavo vamwe mangana vatwale chihande kanechi kuli vaposetolo navakulwane kuYelusalema.+
3 Ngocho omu chalingile chikungulwilo chinavashinjikiza lyehi, ava malunga vayile ungeji wavo, kaha vapulasanyine muFwenyisha namuSamaliya nakulumbununa munona munona omu vatu vakumafuchi eka valumukile, kaha vevwishilenga vandumbwetu vosena kuwaha chikuma.
4 Omu vahetele muYelusalema, vavatambwile nalikoji kuchikungulwilo, nakuli vaposetolo, nakuli vakulwane, kaha vavahichililemo vyuma vyosena vize alingile Kalunga kuhichila muli vakiko.
5 Oloze vamwe mukaliuka kakuhanduka kavaFwaliseu, vaze valumukile nakupwa vaka-kwitava vakatukile muvitwamo vyavo nakwamba ngwavo: “Chinatemo ava vatu vavajihane nakuvalweza valamenga Jishimbi jaMose.”+
6 Ngocho vaposetolo navakulwane valiwanyine mangana vatale hachihande kanechi.
7 Jino omu vashimutwilile chikuma,* Petulu akatukile nakwamba kuli vakiko ngwenyi: “Enu malunga, enu vandumbwami, enu munatachikiza kanawa ngwenu kumakumbi akunyima Kalunga angusakwile ami muli enu mangana ngwenyi vaka-mafuchi eka vevwenga mazu amujimbu wamwaza mukanwa kami, mangana vetavile.+
8 Kaha Kalunga uze atachikiza vili mumuchima+ asolwele unjiho hakuvahana ava shipilitu yajila,+ nge muze alingile kuli etu nawa.
9 Kaha kasolwele chihandwa mukachi ketu navakikoko,+ oloze atomesele michima yavo mwomwo yalufwelelo.+
10 Jino ikaze muli nakwesekela Kalunga hakuhaka toka hajishingo jatumbaji,+ eyi vahonene kumbata vakakuluka jetu chipwe yetu?+
11 Oloze etu tunafwelela ngwetu navakatulwila kuhichila mulikoji lyalinene lyaMwata Yesu,+ ngana muze vafwelela navakiko nawa.”+
12 Ngocho lize lizavu lyosena lyaholele kulu, kaha vaputukile kwivwilila Mbalanape naPaulu omu vapwile nakuvahichilamo vinjikizo vyavivulu navyuma vyakukomwesa vize alingile Kalunga muli vaka-mafuchi eka kuhichila muli vakiko.
13 Kahomu vakumishile kuhanjika, Yakova akumbulwile ngwenyi: “Enu malunga, enu vandumbwami, ngwivwililenu.
14 Shimeyone*+ nahichimo lyehi mwosena omu Kalunga alakanyine vaka-mafuchi eka lwola lwatete mangana ambatemo vamwe muli vakiko vapwenga vatu navavulukilanga lijina lyenyi.+
15 Omu mukiko vene mwaya naMazu aVapolofweto, nge muze vasoneka ngwavo,
16 ‘Omu navikakuma vyumevi, nangukakinduluka nakutunga cheka mbalaka* yaNdavichi yize yinashiuka. Nangukatungulula vize vinalyenyeka, nangukayitungulula yikapwe nge muze yapwile,
17 mangana vatu vaze navakasalaho vakahase kumutondatonda chikuma Yehova,* hohamwe navatu vakumafuchi osena vaze vavulukila lijina lyami. Omu mukiko mwanambe Yehova* ou ali nakulinga vyumevi,+
18 ou vatachikiza kufuma kushikulu.’+
19 Shikaho ami ngunamono ngwami vatu vakumafuchi eka vaze vali nakwalumukila kuli Kalunga, kavatela kuvayanjisako,+
20 oloze tuvasonekelenu mangana valihendenga kuvyuma vinapihi mwomwo yakuvikombelela kumakombelo,+ nakulihenda kuujila,*+ nakuvyuma vyakunyotolola,* nakumanyinga.+
21 Mwomwo kufuma kumyaka yakushikulu, Mazu aMose vanawambululanga munganda hinganda, kaha vanawatangilanga helu mujisunangonga hasambata hasambata.”+
22 Jino vaposetolo navakulwane hohamwe nachikungulwilo chosena vachimwene kupwa chakutamo kusakula malunga vamwe muli vakiko nakuvatuma kuAndeyoka hamwe naPaulu naMbalanape. Vatumine Yuta uze vavulukilenga nawa ngwavo Mbalasava, naShilase,+ malunga vaze vapwile vaka-kutwaminyina muli vandumbwetu.
23 Kaha vasonekele mukanda uno nakuutuma navakiko ngwavo:
“Etu vaposetolo nayetu vakulwane, etu vandumbwenu, tunamimeneka enu vandumbwetu vakumafuchi eka, enu muli muAndeyoka,+ namuSulya, namuShilisha.
24 Tunevu ngwavo vamwe vamuli etu vanamiyanjisa navyuma vanahanjika+ nakumilumbula,* numba tuhu etu katwavahanyine jindongiko.
25 Jino tunalivwasana tuvosena kusakula malunga vakutuma kuli enu hamwe navatu twazanga, vaMbalanape naPaulu,
26 malunga vaze vaneche lyehi myono yavo mwomwo yalijina lyaMwata Yesu Kulishitu.+
27 Shikaho tuli nakumitumina Yuta naShilase mangana navakiko nawa vamilweze vyuma vyovimwe mutunwa twavo.+
28 Mwomwo shipilitu yajila+ nayetu tunachimono kupwa chakutamo kuhona kumiwezelako chiteli cheka, shina vyumevi vyavilemu kaha:
29 lihendenunga kuvyuma vyakuvatwila kumakombelo,+ nakumanyinga,+ nakuvyuma vyakunyotolola,*+ nakuujila.*+ Kachi nge namulilamanga kanawa kuvyumevi, kaha namufukilanga. Twamenunga kanawa!”*
30 Ngocho omu vasuwile ava malunga, vayile kuAndeyoka, kaha vakungulwilile hamwe lizavu lyosena nakuvahana mukanda kana.
31 Kahomu vakumishile kuutanga, vawahililile hamazu akuvakolezeza.
32 Hakuwana nge Yuta naShilase navakiko nawa vapwile vapolofweto, ngocho vakolezezele vandumbwetu navihande vyavivulu nakuvazamikisa.+
33 Omu valingile hivanashimbulako lyehi, vandumbwetu vavasuwile mukuunda mangana vakinduluke kuli vaze vavatumine.
34 *——
35 Oloze Paulu naMbalanape vatwamine muAndeyoka, nakunangula vatu nakuvilika mujimbu wamwaza wamazu aYehova,* hohamwe navakwavo veka vavavulu.
36 Jino omu mwahichile makumbi amwe, Paulu ambile kuli Mbalanape ngwenyi: “Tukinduluke jino tutambukile vandumbwetu munganda hinganda muze twambulwilile mazu aYehova* mangana tukamone omu vali.”+
37 Mbalanape afwilile ambate naYowano uze vavulukilenga ngwavo, Mako.+
38 Oloze Paulu ketavilile kumbata ou mutu vayenga nenyi hamweko, mwomwo avasele kuPamafulya nakukana kuya navo kumulimo.+
39 Ngocho vaputukile kulikokojwesa chikuma, kaha valihandunwine. Mbalanape+ ambachile Mako nakuya nenyi nawato kuKupulusu.
40 Oloze Paulu asakwile Shilase, kahomu valingile vandumbwetu hivanamuhane lyehi mumavoko aYehova* mangana amusolwele likoji lyalinene, akatukile nakuya.+
41 Kaha ahichile muSulya namuShilisha nakuzamikisa vikungulwilo.
Kwinyikila Chamwishi
^ Chipwe “omu valipulile chikuma jipami.”
^ Eyi hijila yikwavo yakusonekelamo lijina lyaShimona (Petulu).
^ Chipwe “chisakila; zuvo.”
^ Tala Chihande A5.
^ Tala Chihande A5.
^ Chipwe “nakuvyuma vize vanajihi chakuzeneka kuhichisa manyinga avyo.”
^ MuchiHelase, por·neiʹa. Tala Mukana waMazu.
^ Chipwe “nakulumbula myono yenu.”
^ Chipwe “Mwoyo wenu.”
^ MuchiHelase, por·neiʹa. Tala Mukana waMazu.
^ Chipwe “nakuvyuma vize vanajihi chakuzeneka kuhichisa manyinga avyo.”
^ Tala Chihande A3.
^ Tala Chihande A5.
^ Tala Chihande A5.
^ Tala Chihande A5.
