Vilinga 16:1-40
16 Ngocho ahetele kuNdeleve nakuLusutala.+ Kaha kuze kwapwile kambaji umwe, lijina lyenyi ikiye Chimoteu,+ mwana vasemene kuli pwevo wakaYuleya muka-kwitava, oloze ise apwile kaHelase.
2 Ou Chimoteu vamusangejekelenga kuli vandumbwetu vamuLusutala namuIkonyume.
3 Paulu afwilile ambate Chimoteu ayenga nenyi, ngocho amumbachile nakumujihana, mwomwo yavaYuleya vaze vapwilenga muvihela kana,+ hakuwana nge vosena vatachikijile ngwavo ise apwile kaHelase.
4 Omu vahichilenga mujinganda, vapwilenga nakuhana vatu jishimbi jize vakashile vaposetolo navakulwane vakuYelusalema, mangana vajilamenga. +
5 Ngocho vikungulwilo vyazaminenga lika mulufwelelo, kaha hakumbi hakumbi vatu vapwile nakuvulilako lika.
6 Kaha nawa vahichile muFwiluja namungalila yaNgalesha,+ mwomwo shipilitu yajila yavakanyishile kuhanjika mazu mungalila yaAja.
7 Omu vahetele kuMusha, vesekele ngwavo vengile muMbitunya,+ oloze shipilitu yaYesu kayavetavishileko.
8 Ngocho vahambakanyine Musha nakwiza kuTolowa.
9 Kaha naufuku Paulu amwene chuma chakumwenesa. Amwene lunga wakuMasetonya nemana nakumulembelela ngwenyi: “Zauka muno muMasetonya utukafweko.”
10 Omu amwene chize chakumwenesa, twasakile ngwetu tuyenga muMasetonya mwomwo twashinganyekele ngwetu Kalunga natusanyika mangana tukavilike mujimbu wamwaza kuli vakiko.
11 Shikaho twasunukile nawato kufuma kuTolowa nakuya swi nakuSamotelese, kaha lichako twahetele kuNeyapole.
12 Kufuma kuze twayile kuFwilipi,+ nganda vayulilenga vaLoma, yize yapwile nganda yayinene mungalila yaMasetonya. Twatwamine makumbi amwe munganda kaneyi.
13 Kaha halikumbi lyaSambata, twalovokele kuchikolo changanda nakuya kuweluka kungenge yakalwiji kuze twashinganyekele ngwetu kukiko kwapwile chihela chakulombela, kaha twatwamine nakuputuka kuhanjika kuli mapwevo vaze vakungulukile kuze.
14 Jino pwevo umwe uze vavulukilenga ngwavo Luchiya, uze alanjishilenga mahina aungonyi, wakunganda yaTulachila,+ kaha nawa muka-kulemesa Kalunga, apwile nakwivwilila, kaha Yehova* asokolwele mumuchima wenyi mangana evwilile kanawa kuvyuma vize ahanjikilenga Paulu.
15 Jino omu vamumbapachishile+ hohamwe navakuzuvo yenyi, atulembelelele ngwenyi: “Kachi nge enu munangumono ngwenu ngunapu nguwakushishika kuli Yehova,* kaha twayenu mutwame muzuvo yami.” Kaha atushinjilile palanga nomu twatwamine.
16 Kahomu twapwile nakuya kuchihela chakulombela, ngamba umwe wapwevo uze apwile nandemone wakutahisa,+ atuhumanganyine. Ou kanyike wapwevo apwilenga nakunehela vakaka jenyi nganyo yayinene hakuhanjikanga vyuma vyakulutwe.
17 Ou kanyike wapwevo akavangijilenga lika Paulu nayetu nakutambakana ngwenyi: “Ava malunga hivandungo jaKalunga Wakulitulaho Chikuma,+ kaha vali nakumyambulila jila yaulwilo.”
18 Alingilenga ngocho hamakumbi amavulu. Kutwala muze, chuma kana chafutwishile Paulu kumuchima, kaha alumukile nakwamba kuli uze shipilitu ngwenyi: “Nangukwamba mulijina lyaYesu Kulishitu ngwami mulovoke.” Kaha alovokele haola vene yize.+
19 Omu vakaka jenyi vamwene jino ngwavo kalilo kavo kanakumu,+ vakwachile Paulu naShilase nakuvakokela kuchilanjilo kuli vaka-kuyula.+
20 Omu vavatwalile kuli vaka-kuyula, vambile ngwavo: “Ava malunga vali nakuneha chikuma pindangano munganda yetu.+ Vakiko hivaYuleya,
21 kaha vali nakunangula vyuma vyeka vize kavatwitavisa etu kuvilinga, chipwe kuvilamako hakupwa etu tuvaLoma.”
22 Ngocho liyongomena lyavanyemukilile, kaha vaka-kuyula valwezele vatu vavapule uvwalo, nakuvaveta jimbwechi.+
23 Omu valingile hivanavavete lyehi chikuma, vavahakile mukamenga, kaha valwezele uze muka-kulama kukamenga avalame kanawa.+
24 Ikiye hakumulweza ngocho, avambachile nakuvahaka mukapete kamukachi nakuvengisa mahinji avo mujikuli.
25 Oloze kuheta mukachi kaufuku Paulu naShilase vapwile nakulomba nakwalisa Kalunga namyaso,+ kaha navafunge vakwavo vapwile nakuvevwilila.
26 Hahaze vene kwejile mundenda waunene, ngocho chihela chakamenga chalinyikile. Vikolo vyosena vyasokolokele hahaze vene, najikuli javosena nawa jazokwojokele.+
27 Omu muka-kulama kukamenga alangumukile mutulo nakumona vikolo vyakamenga vyawashi, asolomwene poko yenyi ngwenyi alijihe, mwomwo ashinganyekele ngwenyi vafunge vanachinyimo lyehi.+
28 Oloze Paulu atambakanyine nalizu lyakukanguka ngwenyi: “Kanda ulilemekako, mwomwo tuvosena mutuli muno!”
29 Ngocho alombele manongo, kaha alahilile mukachi. Jino hakulizuzukila nawoma, alimbilile hamavu kumeso aPaulu naShilase.
30 Avalowelemo nakwamba kuli vakiko ngwenyi: “Enu vamyata, vyuma muka ngwatela kulinga mangana vangulwile?”
31 Vakiko vambile ngwavo: “Itavila muli Mwata Yesu, kaha navakulwila navava vakuzuvo yove.”+
32 Ngocho vahanjikile mazu aYehova* kuli ikiye hohamwe navosena vaze vapwile muzuvo yenyi.
33 Kaha avambachile nakuya navo haola vene yize yaufuku nakuvakosa hajimbandu javo. Jino ikiye navaze vakuzuvo yenyi vosena vavambapachishile hahaze vene.+
34 Ngocho avengishile muzuvo yenyi, avawahishilile vyakulya kumesa, kaha awahililile chikuma navaze vakuzuvo yenyi vosena hakumona ngwenyi netavila lyehi muli Kalunga.
35 Omu kwachele, vaze vaka-kuyula vatumine tupasu vakambe ngwavo: “Vakasununenu ovo malunga.”
36 Ngocho uze muka-kulama kukamenga atwalile mazu avo kuli Paulu ngwenyi: “Vaka-kuyula vanatumu malunga ngwavo enu vavali vatela kumikasununa. Shikaho lovokenu oholili vene ngana, liyilenu tuhu kwenu mukuunda.”
37 Oloze Paulu ambile kuli vakiko ngwenyi: “Vatuvetelanga hameso avatu chakuzeneka kutusopesa, nakutuhaka mukamenga, numba tuhu etu tuvaLoma,+ kaha vatulowele jino kupenge? Nduma. Vezenga vavene vatulovolemo nakutushinjikiza.”
38 Vaze tupasu vayile nakwambulula awa mazu kuli vakulwane vafulumende. Kaha vakiko vevwile woma omu vevwile ngwavo malunga kana vaLoma.+
39 Ngocho vejile nakuvalembelela, kahomu vavalowelemo nakuvashinjikiza, vavalombele vafume munganda.
40 Oloze omu valovokele muze mukamenga, vayile kuzuvo yaLuchiya. Kahomu vamwene vandumbwetu, vavakolezezele,+ kaha vafumine kuze nakuya.
