Vilinga 17:1-34
17 Kaha vahichile jino muAfwipole namuApolonya, nakuheta kuTesolonyika+ kuze kwapwile sunangonga yavaYuleya.
2 Jino kweseka namuze alingilenga Paulu,+ engilile mukachi muze vapwile, kaha hajisambata jitatu ashimutwilile navo kanawa* haVisoneka.+
3 Avalumbunwinyine nakuvalweza unjiho kweseka nomu vasoneka ngwenyi, chatelemo Kulishitu kumona luyando+ nakusanguka cheka kuvafu,+ kaha ngwenyi: “Ou Yesu nguli nakumyambulila ami, ikiye vene Kulishitu.”
4 Ngocho vamwe valumukile nakupwa vaka-kwitava, kaha valikachile naPaulu naShilase.+ NavaHelase vavavulu vaze valemeselenga Kalunga namapwevo vavalemu vavavulu navakiko valingile vene ngocho.
5 Oloze vaYuleya hakwivwa lwiso,+ vakungulwile malunga vakuhuka vaze vapwile nakwimajala kuchilanjilo, kaha vatungile lizavu lyavaka-ndombo, ngocho vakatwile liuya munganda. Valukukile zuvo yaYasone nakutondatonda Paulu naShilase mangana vavanehe kulizavu lyandombo.
6 Omu vahonene kuvawana, vakokelelemo Yasone navandumbwetu vamwe nakuvatwala kuli vaka-kuyula nganda oku vanakutambakana ngwavo: “Malunga vaze vananehenga pindangano* hamavu hosena, vaneza nakuno nawa,+
7 kaha Yasone navatambula kuzuvo yenyi. Ava malunga vosena veji kulikanganga kujishimbi jaKesale nakwamba ngwavo kuli mwangana weka, Yesu.”+
8 Omu liyongomena navaka-kuyula nganda vevwile vyumevi, vavangulukile.
9 Omu valingile hivanatambula lyehi chijikilo kuli Yasone nakuli vakwavo, vavasuwile vayenga.
10 Jino kuheta naufuku, vandumbwetu vasuwile Paulu naShilase mangana vayenga kuMbeleya. Kahomu vahetele kuze, vengilile musunangonga yavaYuleya.
11 Jino vatu vamuMbeleya vapwile namuchima wamwaza chikuma kuhambakana vaze vamuTesolonyika, mwomwo mazu vawetavilile namuchima wakwanguhwa, kaha vakekeselenga kanawa Visoneka hakumbi hakumbi mangana vamone numba nge vyuma kana muvyaya vene ngana.
12 Shikaho vavavulu hakachi kavo valumukile nakupwa vaka-kwitava, kaha namapwevo vavalemu vavaHelase, namalunga vamwe valingile vene ngocho.
13 Oloze omu vaYuleya vakuTesolonyika vatachikijile ngwavo Paulu nambulula mazu aKalunga nakuMbeleya nawa, vayile nakuze mangana vakasowangize mazavu avatu nakuvevwisa kupihya.+
14 Jino hahaze vene vandumbwetu vasuwile Paulu ayenga kukalungalwiji,+ olozenyi Shilase naChimoteu vasalile kuze.
15 Vaze vashinjikijile Paulu vamutwalile mbwe nakuAtene, kaha vakindulukile omu akumishile kuvalweza ngwenyi Shilase naChimoteu+ vezenga washi kuli ikiye.
16 Jino shimbu Paulu apwile nakuvavandamina muAtene, afutukile mushipilitu yenyi hakumona nganda kana yinazale namakombelo.
17 Ngocho engilile musunangonga nakuputuka kushimutwila kanawa navaYuleya navatu veka vaze valemeselenga Kalunga. Ashimutwilile nawa hakumbi hakumbi navaze aliwanyinenga navo kuchilanjilo.
18 Oloze vaka-Epikule vamwe navaka-Shitoke vaze valinangwile mangana autu, vaputukile kulipula nenyi jipami, kaha vamwe vapwile nakwamba ngwavo: “Vyuma mukaze mwasaka kutulweza ou muka-kundengula?” Veka ngwavo: “Anakwivwakana nge muka-kwambulula vyatulunga vakumafuchi eka.” Vambile ngocho mwomwo apwile nakuvilika mujimbu wamwaza waYesu nawou wakusanguka.+
19 Ngocho vamukwachile nakumutwala haPili yaAlese, kaha vambile ngwavo: “Tulweze echi kunangula chachihya uli nakunangula.
20 Mwomwo uli nakuhanjika vyuma vimwe vyaungeji kumatwitwi etu, kaha tuli nakusaka tutachikize munatalikisa vyuma kanevi.”
21 Mwomwo vaka-Atene vosena, navaka-mafuchi eka vaze vatwaminenga* kuze, hakushikama kavapwilenga nakushimutwila vyuma vyekako, shina kwambulula chipwe kwivwilila kuvyuma vyavihya kaha.
22 Jino Paulu emanyine mukachi kavo haPili yaAlese+ nakwamba ngwenyi:
“Enu malunga vamuAtene, ami ngunamono ngwami enu mwasoloka kupwa muvaka-kwivwa tulunga woma* kuhambakana vakwenu vosena.+
23 Chakutalilaho, omu ngwapwanga nakutambwojoka munganda nakutalatala kanawa vyuma mwalemesa, ngwamonanga nawa lijiko lyakulumbila limwe haze vanasoneka ngwavo, ‘Kuli Kalunga Vazeneka Kutachikiza.’ Shikaho ou muli nakulemesa chakuzeneka kutachikiza, ikiye vene ou nguli nakwambulula kuli enu.
24 Kalunga uze atangile kaye navyosena vyatwamaho, ikiye hakupwa Mwata walilu namavu,+ katwama mujitembele jakutunga namavokoko,+
25 kaha nawa kaveshi kumuzachila namavoko avatu kwijiva nge himuka-kukalikizako,+ mwomwo ikiye eji kuhananga vatu vosena kuyoya nakuhwima+ navyuma vyosena.
26 Kaha kumutu umwe+ aloweleko miyachi yavatu yosena mangana ngwenyi vatwamenga hamavu hosena,+ kaha ahakileko lwola vatongola nakupula jingiza javihela vyakutwama vatu,+
27 mangana vatondetonde Kalunga, chipwe vene kumupupuchila nakumuwana,+ mwomwo ikiye kapwa kwakusuku nayetu tuvosena mutu himutuko.
28 Ngocho twayoya, tweji kutambukanga, kaha nawa twapwako mwomwo yaikiye, nge omu vahanjika vatu jenu vamwe vaka-kusoneka tushimutwiji ngwavo, ‘Mwomwo nayetu nawa tuvana venyi.’
29 “Shikaho etu hakupwa tuvana vaKalunga,+ katwatela kushinganyeka ngwetu Kalunga afwana nge ulu, chipwe palata, chipwe lilolwa, chipwe nge vyuma vyakusonga nautotombwe wavatu chipwe navyuma vatakako, nduma.+
30 Kalunga naliula myaka yize vatu vatwaminenga chakuzeneka kutachikiza,+ oloze oholyapwa ali nakwambulila vatu kwosena ngwenyi vapihilile nakwalumuka.
31 Mwomwo nasakula lyehi likumbi lize najinyi kukasopesa+ vatu hamavu hosena mukwoloka, kuhichila muli lunga uze atongola, kaha nafwelelesa nawa vatu vosena hakumusangula kuvafu.”+
32 Omu vevwile vyakusanguka chavafu, vamwe vaputukile kumuhulamisa,+ oloze veka vambile ngwavo: “Natukakwivwilila cheka hachihande kana.”
33 Ngocho Paulu avasezele,
34 oloze malunga vamwe valipanjikile kuli ikiye, kaha valumukile nakupwa vaka-kwitava. Hali vakiko hapwile naNdeyonyishu, muka-kuyula muzango yakusopela yahaPili yaAlese, napwevo umwe vavulukilenga ngwavo Ndamale, navakwavo veka nawa.
Kwinyikila Chamwishi
^ Chipwe “alijingishile navo.”
^ Chipwe “vananehenga ukalu.”
^ Chipwe “vatambukililenga.”
^ Chipwe “muvaka-kwitava chikuma.”
