Vilinga 18:1-28
18 Jino Paulu afumine kuAtene nakwiza kuKolinde.
2 Kaha awanyine kaYuleya umwe vavulukile ngwavo Akwila,+ wakusemukila kuPondu uze apwile mukufuma kuItalya napwevo lyenyi Pilishila, mwomwo Kolochiu ahanyine lushimbi ngwenyi, vaYuleya vosena vafume muLoma. Ngocho Paulu ayile kuli vakiko.
3 Hakuwana nge azachilenga mulimo woumwe navakiko, ngocho atwamine kuzuvo yavo, kaha vazachililenga hamwe,+ mwomwo vapwilenga vaka-kutunga jimbalaka.
4 Paulu apwilenga nakuhanjika vihande* musunangonga+ hasambata hasambata,+ kaha apwilenga nakukunyula vaYuleya navaHelase.
5 Jino omu Shilase+ naChimoteu+ vejile kufuma kuMasetonya, Paulu aputukile kuhundangana mulimo wakwambulula mazu, kaha ambulilile vaYuleya mangana asolole unjiho ngwenyi, Yesu ikiye Kulishitu.+
6 Oloze omu vatwalileho lika kumuhamika nakumusaula, atotomwene uvwalo wenyi+ nakwamba kuli vakiko ngwenyi: “Manyinga enu apwenga hamitwe yenu.+ Ami ngunatomo.+ Kufuma vene oholili nanguya kuvatu vakumafuchi eka.”+
7 Ngocho afumine kuze,* ayile nakwingila muzuvo yalunga umwe vavulukile ngwavo Chichiyu Yushitu, muka-kulemesa Kalunga, uze apwile nazuvo vanungasanyine nasunangonga.
8 Oloze Kulishipu+ uze apwile muka-kutwaminyina musunangonga, alumukile nakupwa muka-kwitava muli Mwata, navaze vakuzuvo yenyi vosena. Kaha navaka-Kolinde vavavulu vaze vevwile mazu, vaputukile kwitava nakuvambapachisa.
9 Kaha nawa Mwata ahanjikile kuli Paulu muchakumwenesa naufuku ngwenyi: “Kanda nawivwa womako, oloze twalaho lika kuhanjikanga, kanda nauhola kuluko,
10 mwomwo ami nguli nayove,+ kaha kakweshi mutu mwakulukuka nakukulemekako, mwomwo nguli navatu vavavulu munganda yino.”
11 Ngocho atwamine kuze mwaka umwe natukweji 6, nakunangula mazu aKalunga mukachi kavo.
12 Jino halwola luze Ngalyo apwile nguvulu* kuAkaya, vaYuleya valinungile hamwe nakufumbukila Paulu, kaha vamukwachile nakumutwala kuchitwamo chakusopela
13 nakwamba ngwavo: “Ou lunga ali nakukunyula vatu mangana valemesenga Kalunga mujila yalimbalaka najishimbi.”
14 Oloze omu Paulu asakile kuhanjika, Ngalyo ambile kuli vaYuleya ngwenyi: “Enu vaYuleya, kachi nge ou lunga alinganga vyuma vimwe vyakuhenga, chipwe vyavipi chikuma, kachi ngunamivwilila lika.
15 Oloze hakuwana nge hivikokojola kaha vyamazu, namajina, najishimbi jenu,+ vitalenu enu vavene. Ami kangwasakile ngupwenga muka-kusopa vyuma kaneviko.”
16 Shikaho avahangile kuchitwamo chakusopela.
17 Ngocho vatu vosena vakwachile Sosetene,+ muka-kutwaminyina musunangonga nakuputuka kumuvetela kulutwe lwachitwamo chakusopela. Oloze Ngalyo kazanyine muvyuma kaneviko.
18 Omu Paulu alingile hanatwame cheka makumbi amavulu, asalishile vandumbwetu, kaha afumine kuze nakuya nawato kuSulya, hohamwe naPilishila naAkwila. Akambile jikambu jenyi muKenekeleya+ mwomwo yalushiko alishikile.
19 Ngocho vahetele kuEfwesu, kaha avasezele kuze. Oloze ikiye ayile nakwingila musunangonga nakushimutwila navaYuleya.+
20 Numba tuhu vamulombelenga lika mangana atwame kuze halwola lwalusuku, oloze ikiye ketavileko,
21 avasalishile nakuvalweza ngwenyi: “Kachi nge Yehova* netava, kaha nangukakinduluka cheka kuli enu.” Afumine nawato kuEfwesu
22 nakwiza kuKesaliya. Kaha ayile* nakumeneka chikungulwilo, kufumaho ayile jino kuAndeyoka.+
23 Kahomu alingile hanatwame lyehi makumbi amwe kuze, afumineko, apulasanyine muvihela vyosena vyamungalila yaNgalesha naFwiluja+ nakuzamikisa tumbaji vosena.+
24 Jino kaYuleya umwe vavulukilenga ngwavo Apolo,+ wakusemukila kuAlekesandelya, ejile muEfwesu. Apwile lunga muka-kuhanjika kanawa uze atachikijile chikuma Visoneka.
25 Ou lunga vamunangwile* mwaya jila yaYehova,* kaha hakusava nashipilitu, apwile nakuhanjika nakunangula mwakwoloka vyuma vyakuvuluka Yesu, oloze atachikijile kaha vyalumbapachiso lwaYowano.
26 Aputukile kuhanjika nakumika musunangonga. Kahomu Pilishila naAkwila+ vamwivwile, vamumbachile nakumulumbunwina jila yaKalunga mwakwoloka.
27 Jino hakuwana nge asakile kuya kuAkaya, vandumbwetu vasonekelele tumbaji, vavalembelelele vamutambule nalikoji. Ngocho omu ahetele kuze, akafwile chikuma vaze vetavile kuhichila mulikoji lyalinene lyaKalunga,
28 mwomwo asolwele hatoma ngwenyi vaYuleya valimbenja, kaha avalwezele naVisoneka ngwenyi Yesu ikiye Kulishitu.+
Kwinyikila Chamwishi
^ Chipwe “apwilenga nakushimutwila navo.”
^ Kulumbununa, kusunangonga.
^ Nguvulu waLoma wangalila. Tala Mukana waMazu.
^ Tala Chihande A5.
^ Kafwe kuYelusalema.
^ Chipwe “vamunangwile hakanwa.”
^ Tala Chihande A5.
