Vilinga 19:1-41
19 Jino lwola lumwe, omu Apolo+ apwile muKolinde, Paulu apulasanyine mujingalila jakutunda nakwiza kuEfwesu.+ Awanyine tumbaji vamwe kuze,
2 kaha avehwile ngwenyi: “Omu mwalumukile nakupwa muvaka-kwitava, mwatambwile shipilitu yajila tahi?”+ Vakiko vamukumbulwile ngwavo: “Etu kanda tuchivwengaho lyehi ngwavo kwatwama shipilitu yajila.”
3 Ngocho ehwile ngwenyi: “Nyi vamimbapachishile nalumbapachiso muka?” Vakiko vamukumbulwile ngwavo: “Nalumbapachiso lwaYowano.”+
4 Paulu ambile ngwenyi: “Yowano ambapachishilenga nalumbapachiso luze lwapwa chinjikizo chakupihilila nakwalumuka,+ nakulweza vatu vetavile muli uze apwile nakwiza munyima yenyi,+ ikiye vene Yesu.”
5 Hakwivwa ngocho, vavambapachishile mulijina lyaMwata Yesu.
6 Kahomu Paulu avanangikile mavoko enyi, shipilitu yajila yejile hali vakiko,+ kaha vaputukile kuhanjika mumalimi eka, nakupolofweta.+
7 Vosena vapwile kafwe malunga 12.
8 Ngocho hatukweji vatatu, engililenga musunangonga+ nakuhanjika nakumika, kaha ahanjikilenga vihande nakulijingisa navo nakuvakunyula havyuma vyaWangana waKalunga.+
9 Oloze vamwe omu vanjinjavalile* nakukana kwitava, nakusaula eyi Jila+ kumeso aliyongomena lyosena, Paulu afumine kuli vakiko,+ kaha natumbaji nawa avafumishileko. Kaha hakumbi hakumbi ahanjikilenga vihande muzuvo yakukungulukila yahashikola yaTulanu.
10 Alingilenga ngocho hamyaka yivali, ngocho vaYuleya navaHelase vosena vaze vatwaminenga mungalila yaAja vevwilenga mazu aMwata.
11 Kalunga azachilenga milimo yangolo yakulipwila kuhichila muli Paulu,+
12 ngocho vatu vambachilenga malesu namapunu* aze akukilenga kumujimba wenyi, vawatwalilenga kuli vaka-kuviza,+ kaha vahindukilenga kumisongo yavo, navashipilitu vakuhuka nawa valovokelenga.+
13 Oloze vaYuleya vamwe vaze vatambwojokelenga kwosena nakulovola vandemone, navakiko vesekele kuzachisa lijina lyaMwata Yesu kuli vaze vapwile navashipilitu vakuhuka. Vambilenga ngwavo: “Nangumyamba mulijina lyaYesu ou veji kwambululanga kuli Paulu.”+
14 Jino kwapwile vana vamalunga 7 vakapilishitu wamukulwane wakaYuleya uze vavulukilenga ngwavo Seva. Navakiko nawa valingilenga ngocho.
15 Oloze shipilitu wakuhuka avakumbulwile ngwenyi: “Ami Yesu ngwamutachikiza,+ naPaulu nawa ngunamwijiva,+ nyi enu yenu veya?”
16 Ngocho lunga uze apwile nashipilitu wakuhuka, avazombokelele, avapikasanyine vosena nakuvafungulula, ngocho vachinyine muzuvo yize uselesele oku vanavalemeka.
17 Chuma kana vachitachikijile kuli vaYuleya navaHelase vosena vaze vatwaminenga muEfwesu. Ngocho vosena vevwile woma, kaha lijina lyaMwata Yesu valitohweselenga.
18 Kaha vavavulu vaze valumukile nakupwa vaka-kwitava vapwilenga nakwiza nakulitavila vilinga vyavo nakuvyambulula hatoma.
19 Kaha vavavulu vaze valingilenga visava vanehele mikanda yavo hamwe nakuyochela kumeso avatu vosena.+ Ngocho valavile jindando jayo, kaha vawanyine nge jinahete mujimbongo japalata 50,000.
20 Ngocho mazu aYehova* ayilenga lika nakukula nakuzama nangolo.+
21 Jino omu vyakumine vyumevi, Paulu ajinyine mushipilitu yenyi ngwenyi omu mwalinga hanahichi lyehi muMasetonya+ namuAkaya, mwakaya kuYelusalema.+ Ambile ngwenyi: “Omu nangukaheta kuze, ngwatela kukaya nakuLoma nawa.”+
22 Ngocho atumine tumbaji twenyi vavali, Chimoteu+ naElasatu+ vaze vapwilenga nakumuzachila vayenga kuMasetonya, oloze ikiye asalile mungalila yaAja, kaha ashimbwilemo.
23 Jino halwola luze, kwalovokele pindangano+ kutalisa kuJila+ eyi.
24 Mwomwo kwapwile lunga umwe, lijina lyenyi Ndemetelyu, muka-kufula palata, kaha anehelelenga vitotombwe nganyo yayinene hakufulanga tujitembele twapalata twaAletemese.+
25 Ndemetelyu avakungulwilile hamwe navosena vaze vazachilenga milimo yangachize, nakwamba ngwenyi: “Enu malunga, enu munatachikiza ngwenu kumilimo kaneyi kukiko vene tunawanyina luheto lwetu.
26 Kaha enu munamono nakwivwa omu Paulu nakunyula vatu vavavulu nakwalumuna vishinganyeka vyavo, keshi nge muno muEfwesu+ kahako, oloze kafwe namungalila yaAja yosena hakwamba ngwenyi ava tulunga vakutenga namavoko kaveshi chikupu tulungako.+
27 Kaha nawa chuma nachipihyako shina chakumona nge mulimo wetu keshi ukiko kaha navahombwanyisako nduma, oloze natembele yakalunga wapwevo wamunene Aletemese navayimona kupwa yamokomoko, kaha vatu vamungalila yaAja yosena navaze vatwama hamavu hosena vaze veji kumulemesanga kaveshi kwalisa cheka ukelenga wenyiko.”
28 Vakiko hakwivwa ngocho vapihililile chikuma, kaha vaputukile kutambakana ngwavo: “Aletemese wavaka-Efwesu apwa wamunene!”
29 Ngocho munganda yize mwapwile pindangano, kaha vosena valahilile muzuvo yakuhemena, oku vali nakukokangiza vaNgayu naAlishitaku,+ malunga vakuMasetonya vaze vatambukilenga hamwe naPaulu.
30 Paulu asakile kachi engile mukachi kuli vaze vatu, oloze tumbaji kavamwitavishileko.
31 Navatu vamwe vaka-kulongesa viwanyino navyakuhemahema vaze vapwile masepa jenyi, vamutuminyine mazu nakumulembelela ahone kwingila muzuvo yakuhemena kuchina mwahaka mwono wenyi muponde.
32 Kaha vamwe vapwile nakutambakana ava namwavo, ava nawa namwavo, mwomwo lize lizavu lyapwile mulihayihayi, kaha vavavulu kavatachikijile ovyo vyavalingishile valikungulwile hamweko.
33 Ngocho vatu vafumishile Alekesande haze haliyongomena, kaha vaYuleya vamushinjikilile kulutwe. Jino Alekesande avaholesele nalivoko lyenyi, asakile ngwenyi ahakule chihande kana kumeso avatu.
34 Oloze omu vamutachikijile ngwavo kaYuleya, vosena vatambakanyine hamwe kafwe hajola jivali ngwavo: “Aletemese wavaka-Efwesu apwa wamunene!”
35 Omu alingile muka-kusoneka vyuma vyamunganda hanaholesa lyehi lize liyongomena, ambile ngwenyi: “Enu malunga vamuEfwesu, mutu muka hali enu uze azeneka kutachikiza ngwenyi nganda yavaka-Efwesu yikiko yeji kulamanga tembele yaAletemese nachifwanyisa chize chaholokele mwilu?
36 Jino hakuwana nge vyumevi naumwe wauchi mwahasa kuvihamikako, shikaho mwatela kuhola kulu, kanda namulinga vyuma mukulusukako.
37 Mwomwo ava malunga munanehe kuno, kavapwa vihwanga vajitembeleko chipwe vaka-kusaula kalunga ketu wapwevoko.
38 Shikaho kachi nge Ndemetelyu+ navitotombwe vaze ali navo vali namulonga namutu umwe, kwakusopela kwokukwo, navanguvulu* nawa kuvali. Vechenu vezenga nakwambulula milonga vanalivulumuna.
39 Oloze kachi nge kuli vihande vyeka muli nakutonda kuhambakana hali evi, kaha vatela kuchitwala kulizavu vakachivatule mwaya jishimbi.
40 Mwomwo natupwa muukalu chikupu, navatuhana mulonga wakufumbukila fulumende havyuma vinasoloka lelo, mwomwo katweshi kuhasa kulumbununa ovyo vinalingisa eli lizavu lyandombo likungulukile hanoko.”
41 Kahomu akumishile kuhanjika vyuma evi, asuwile lize lizavu lyavatu.
Kwinyikila Chamwishi
^ Chipwe “omu vakakamishile michima yavo.”
^ Mahina akuliuva hatulo akulikinga nawo kumajilo.
^ Tala Chihande A5.
^ Nguvulu waLoma wangalila. Tala Mukana waMazu.
