Vilinga 20:1-38
20 Omu lyakumine lize liuya, Paulu atumine vatu vasanyike tumbaji. Kahomu alingile hanavakolezeza lyehi nakuvasalisa, atwalilileho naungeji nakuya kuMasetonya.
2 Omu alingile hanahichi lyehi mujingalila jize nakukolezeza tumbaji namazu amavulu, ahetele muHelase.
3 Kaha atwamine tukweji vatatu kuze. Hakuwana nge vaYuleya vamutwamine punga+ omu asakile kuya nawato kuSulya, ngocho alumwine vishinganyeka vyenyi nakukinduluka mujila yakupulasana muMasetonya.
4 Kaha vatu vaze vatambukilenga nenyi vapwile Sopate mwanaPulusu wakuMbeleya, naAlishitaku,+ naSekundu vakuTesolonyika, naNgayu wakuNdeleve, naChimoteu,+ naTukiku+ naTolofwimu+ vakungalila yaAja.
5 Ava vatu valivangile kulutwe, kaha vatuvandaminyine muTolowa.
6 Oloze etu twakatukile nawato kuFwilipi omu akumine makumbi aChiwanyino chaJimbolo Jakuzeneka Chimbalwila,+ kaha twahetele kuli vakiko muTolowa omu mwahichile makumbi atanu. Kaha twatwamine kuze makumbi 7.
7 Halikumbi lyatete muchalumingo, omu twalikungulwile hamwe mangana tulyenga vyakulya, Paulu aputukile kuhanjika kuvatu vakungulukile, mwomwo ajinyine kukatuka likumbi lyakavangijileho. Kaha ahanjikile swi namukachi kaufuku.
8 Ngocho mukapete kahelu muze twalikungulwilile mwapwile manongo amavulu.
9 Jino munjanena mwatwamine mukweze walunga umwe, lijina lyenyi ikiye Yutuku. Ou mukweze ayile mutulo omu Paulu apwile nakuhanjika, ngocho andumukile mwomwo yatulo nakuholokela hamavu kufuma hazuvo yahelu yamuchitatu, kaha vamuwanyine nafu lyehi.
10 Paulu ashikumukile hamavu, kaha alimbilile hali ikiye, amukumbachilile+ nakwamba ngwenyi: “Holenu, kanda namuneha liuyako, mwomwo wamutonyi.”*+
11 Jino akandukile cheka kuzuvo yahelu nakuputuka kulya vyakulya.* Kaha ashimutwilile lika navo swi nakukututuka chalikumbi, kufumaho akatukile nakuya.
12 Ngocho vakiko vambachile uze mukweze walunga nakuya nenyi wamutonyi, kaha chavavendejekele chikuma.
13 Jino etu twalivangile kuya kuwato, kaha twasunukile nakuya kuAso kuze twajinyine ngwetu Paulu engilileko muwato, mwomwo atulwezele ngwenyi ajinyine kuya kuze namahinji.
14 Kahomu atuwanyine kuAso, twamwingishile muwato nakuya kuMitulene.
15 Jino lichako omu twafumine nawato kuze, twahetele kuze kwalitalasana naKiyose, oloze likumbi lyakavangijileho twemanyine kuSamose, kaha likumbi likwavo lyakavangijileho twahetele kuMiletu.
16 Paulu kasakile kuhita muEfwesuko,+ kuchina ngwenyi mwenyekela lwola mungalila yaAja, mwomwo apwile nakwanguhwisa mangana nge nahase, akahete kuYelusalema+ halikumbi lyaChiwanyino chaPendekoseta.
17 Oloze omu apwile kuMiletu atumine mazu kuEfwesu akusanyika vakulwane vachikungulwilo.
18 Omu vahetele kuli ikiye, ambile kuli vakiko ngwenyi: “Enu munatachikiza kanawa omu ngwapwilenga nayenu kufuma vene kulikumbi lyatete lize ngwalyachile mungalila yaAja,+
19 nakumuzachilanga Mwata nakulinyisa chikuma,+ namasoji, navyeseko vize vyanguwanyinenga hakungutwamatwama jipunga kuli vaYuleya.
20 Kangwalitwaminyine kumilweza chuma chimwe chakuvyuma vyanganyoko,* chipwe kulitwamina kuminangulanga kumeso avatu+ vosena nakuzuvo hizuvoko.+
21 Oloze ngwahanyine kanawa unjiho kuli vaYuleya nakuli vaHelase wakupihilila nakwalumuka+ nakwiza kuli Kalunga nakupwa nalufwelelo muli Mwata wetu Yesu.+
22 Kaha ivwenu jino, ami shipilitu yinangukatula nguyenga kuYelusalema. Numba tuhu kangwatachikijile vyuma navikanguwana kuzeko,
23 oloze shipilitu yajila yili nakungulweza mapapa kakavulu ngwayo malenge navihuli vili nakunguvandamina kunganda hinganda.+
24 Chipwe ngocho, kangweshi kumona kuyoya* chami kupwa chachilemuko, chikalu kungunakumisa jila yami+ namulimo uze ngwatambwile kuli Mwata Yesu wakuhana kanawa unjiho wamujimbu wamwaza walikoji lyalinene lyaKalunga.
25 “Ivwenu jino, ami ngunatachikiza ngwami wauchi hali enu ngwambulilile vyaWangana mwakamona cheka chihanga chamiko.
26 Ngocho ngunamisanyika mupwenga muvinjiho likumbi lyalelo ngwami ami ngunatomo lyehi kumanyinga avatu vosena,+
27 mwomwo kangwalitwaminyine kumilweza mwosena mwaya kujina chaKalungako.+
28 Lilamenunga enu vavene,+ hakenunga muchima kuutanga wosena, utanga uze shipilitu yajila yinamitongola kupwa tulama,+ mangana mufungenga chikungulwilo chaKalunga+ chize alanjile namanyinga aMwanenyi.+
29 Ami ngunatachikiza ngwami omu nangulinga hingunayi lyehi, tungunge vaulyanyi navakengila muli enu,+ kaha kaveshi kukatetela utangako.
30 Muli enu nawa namukakatuka malunga vamwe navakahanjika vyuma vyakuhingama mangana vakakoke tumbaji vakavakavangizenga vakiko.+
31 “Shikaho tonenunga, kaha anukenunga ngwenu hamyaka yitatu,+ musana naufuku, kangwalitwaminyine kumihuhumuna mutu himutu namasojiko.
32 Kaha jino ngunamihane kuli Kalunga nakumazu alikoji lyenyi lyalinene aze nawahasa kumitunga nakumihana uswana uze uli muli vosena vaze valingisa lyehi kupwa vajila.+
33 Ami kangwafwililile palata yamutu numba umweko, chipwe ulu wenyi, chipwe uvwalo wenyiko.+
34 Enu vavene munatachikiza ngwenu awa mavoko ami anguzachilile vyuma vize vyasakiwilenga mukuyoya chami+ nachavaze ngwapwile navo.
35 Ami ngunamihane chakutalilaho muvyuma vyosena mangana ngwami nayenu nawa mukilikitenga chikuma+ nakukafwa vaze vazeya, kaha mwatela kwanukanga nawa mazu aMwata Yesu, omu ambile ivene ngwenyi: ‘Kuhana cheji kunehanga kuwahilila chikuma+ kuhambakana kutambula.’”
36 Kahomu akumishile kuhanjika vyumevi, afukamine hamavu navakiko hamwe, kaha alombele.
37 Ngocho vosena valilile chikuma, kaha vapakachile Paulu mukasamba* nakumusweswenya chikuma,
38 mwomwo vevwile ushona chikumanyi hamazu aze ahanjikile ngwenyi kaveshi kukamona cheka chihanga chenyiko.+ Ngocho vamushinjikijile swi nakuwato.
Kwinyikila Chamwishi
^ Chipwe “mwomwo mwono wenyi muuli.”
^ Hela., “nakuputuka kupuzula mbolo nakulya.”
^ Chipwe “vyakuminganyalisako.”
^ Chipwe “mwono.”
^ Hela., “vazeukilile hashingo yaPaulu.”
