Vilinga 21:1-40
21 Omu twalihandunwine navo nakusununa wato, twayile swi nakuKose, kaha likumbi lyakavangijileho twahetele kuLotese. Hakufuma kuze twayile kuPatala.
2 Kahomu twawanyine wato uze wapwile nakuzauka musali muFwenyisha, twanyinyinemo nakuya.
3 Omu twahetele hamwe haze twamwene litungu lyaKupulusu, twambilile litungu kana kumutamba wachimoswe nakuya kuSulya, kaha twakasulikile kuTule kuze vatelele kulongolwela viteli vyapwile muwato.
4 Jino twatondele tumbaji, kahomu twavawanyine, twatwamine navo makumbi 7. Oloze vakiko kuhichila mushipilitu vamulwezele Paulu kakavulu ngwavo kanda akalyata muYelusalemako.+
5 Omu lwakumine lwola luze twatelele kutwama kuze, twakatukile nakutwalilila ungeji wetu. Oloze vosena, namapwevo navana, vatushinjikijile nomu twalovokele munganda yize swi nakuchikulo. Twafukamine kuchikulo nakulomba,
6 kaha twalisalishile navo. Kufumaho twengilile muwato, oloze vakiko vakindulukile kumembo avo.
7 Kahomu twafumine nawato kuTule, twakahetele jino kuTolemai. Twamenekele vandumbwetu nakutwama navo likumbi limwe.
8 Lichako twakatukile, twayile nakuheta kuKesaliya, kaha twengilile muzuvo yaFwilipu, muka-kwambulula mujimbu wamwaza, uze apwile umwe wavaze malunga 7,+ kaha twatwamine nenyi.
9 Ou lunga apwile navana venyi vamapwevo vawana vavajike* vaze vapolofwetelenga.+
10 Omu twalingile hitunatwame lyehi makumbi amwe kuze, kwejile kapolofweto umwe kufuma kuYuleya, lijina lyenyi ikiye Angavu.+
11 Ejile kuli etu, atambwile muhya waPaulu nakulikasawo kumavoko nakumahinji enyi nakwamba ngwenyi: “Shipilitu yajila yinambe ngwayo, ‘Omu mukiko vaYuleya munavakakasa mwenya uno muhya muYelusalema,+ nakukamuhana mumavoko avatu vakumafuchi eka.’”+
12 Jino omu twevwile ngocho, etu navatu vakuchihela chize, twaputukile kulembelela Paulu ngwetu kanda mwaya kuYelusalemako.
13 Oloze Paulu akumbulwile ngwenyi: “Ika muli nakulilila nakunguhombesa?* Enu mwatela kutachikiza ngwenu, ami ngunalizange lyehi, keshi nge kungukasa kahako, oloze nakufwa nawa kuYelusalema mwomwo yalijina lyaMwata Yesu.”+
14 Omu twahonene kumukunyula, twalitwaminyine kumukanyisa* nakwamba ngwetu: “Echenu mwaya muchima waYehova* mulingiwe.”
15 Jino omu akumine makumbi kana, twawahishile vyaungeji wetu, kaha twaputukile kuya kuYelusalema.
16 Tumbaji vamwe vakuKesaliya vayile nayetu hamwe nakututwala kuli Nasone wakuKupulusu, kambaji umwe wakulivanga, mwenyazuvo yize vatuwahishilile tutwamemo.
17 Omu twahetele muYelusalema, vandumbwetu vatutambwile nachisambo.
18 Oloze likumbi lyakavangijileho, Paulu ayile hamwe nayetu kuli Yakova,+ kaha vakulwane vosena vapwile kuze.
19 Kaha avamenekele nakuputuka kuvahichilamo munona munona vyuma vize Kalunga alingile muli vaka-mafuchi eka kuhichila mumulimo wenyi.
20 Hakwivwa ngocho vaputukile kutohwesa Kalunga, oloze vambile kuli Paulu ngwavo: “Ove ndumbwetu, unamono omu vaka-kwitava vanavulu muli vaYuleya. Vosena vali natwima yakukavangiza Jishimbi.+
21 Oloze jino vanevunga lingwavo lyakwamba ngwavo ove unapunga nakunangula vaYuleya vosena vamuli vaka-mafuchi eka valikange nakuseza Jishimbi jaMose, hakuvalweza ngwove kanda vajihana vana vavoko, chipwe kulinga mwaya chisemwa chetu.+
22 Kaha jino natulinga ngachilihi? Mwomwo navakwivwa ngwavo uneza.
23 Ngocho linga vyumevi natukulweza: Tuli namalunga vawana vaze vanalishiki lushiko naKalunga.
24 Mbata ava malunga uyenga navo, ukalitomese hamwe navakiko kweseka najishimbi nakuvafwetela vyosena navakasaka, mangana vakateule nakumitwe yavo. Kaha vatu vosena navakatachikiza ngwavo lingwavo vanakuvulukila ove kumana lyamakuli, oloze ngwavo nayove kumana uli nakutambuka mukulonga, kaha nawa uli nakulama Jishimbi.+
25 Olozenyi kutalisa kuli vaka-kwitava vamuli vaka-mafuchi eka, etu tunasoneka lyehi vyuma tunalivwasana nakuvatuminavyo ngwetu, vatela kulilamanga kuvyuma vanavatwila kumakombelo,+ nakumanyinga,+ nakuvyuma vyakunyotolola,*+ nakuujila.”*+
26 Jino lichako, Paulu ambachile vaze malunga nakuya navo, kaha alitomesele hamwe navakiko kweseka najishimbi.+ Engilile mutembele avalweze oho nawakakumina makumbi akulitomesa mwaya Jishimbi, mangana vahane wana wamutu himutu.
27 Jino omu makumbi 7 apwile kwakamwihi nakukuma, vaYuleya vakuAja hakumona Paulu mutembele vasowangijile liyongomena lyosena, kaha vamukwachile
28 nakutambakana ngwavo: “Enu vaIsalele, tukafwenuko. Ou lunga ikiye uze eji kunangulanga vatu vosena kwosena vyuma vyakufulilila vatu jetu, naJishimbi jetu, nachihela chino. Kaha nawa engishile navaHelase muno mutembele, ngocho najilulula chino chihela chajila.”+
29 Mwomwo hakavanga vamwene Tolofwimu+ wakuEfwesu ali hamwe naPaulu munganda, kaha vapwile nakushinganyeka ngwavo namutembele namwingisamo.
30 Munganda yosena mwakatukile liuya, kaha vatu vejile jimbushi, vamukwachile Paulu nakumukokela kuweluka watembele, kaha hahaze vene vasokele mapito.
31 Kahomu vasakile ngwavo vamujihe, kapitau wamukulwane walizavu lyamaswalale atambwile mujimbu ngwavo muYelusalema mwosena muli pindangano.
32 Hahaze vene ambachile maswalale natupitau vamaswalale nakulahila kuli vakiko. Jino omu vamwene uze kapitau kamaswalale wamukulwane navaze maswalale, valitwaminyine kuveta Paulu.
33 Jino uze kapitau kamaswalale wamukulwane apandamine kwakamwihi, kaha amukwachile nakulweza vatu ngwenyi vamukase namalenge avali.+ Kaha ehwile ejive mutu kana navyuma nalingi.
34 Oloze vamwe haze haliyongomena vaputukile kutambakana ava namwavo, ava nawa namwavo. Ngocho omu ahonene kuwana mashina namasongo mwomwo yaliuya, avalwezele vamutwale kuchilombo chamaswalale.
35 Jino omu Paulu ahetele kujindondelo, maswalale vamuzundwile mwomwo lize liyongomena lyapwile nautenu,
36 kaha nawa lizavu lyavatu lyavakavangijile nakutambakana ngwavo: “Mujihenu!”
37 Omu valingile ngwavo vengise Paulu muchilombo chamaswalale, ambile kuli uze kapitau kamaswalale wamukulwane ngwenyi: “Uno naungwitavisa nguhanjike mazu amwe kuli ove tahi?” Ikiye ambile ngwenyi: “Kumana weji kuhanjikanga chiHelase?
38 Ove keshi yove uze kaEjipitu asangumwine vatu vafumbukile fulumende hamakumbi akunyima nakumbata vasamalyamba 4,000 nakuvatwala mupamboko nyi?”
39 Jino Paulu ambile ngwenyi: “Ami ngukaYuleya+ wakuTalasu+ muShilisha, ngumutu wakunganda yayilemu. Shikaho, ngunakulembelela ngwami, ngwitavise nguhanjike kuvatu kanava.”
40 Kahomu alingile hanamuhane lyehi lisesa, Paulu emanyine hajindondelo, aholesele vatu nalivoko lyenyi. Jino omu vaholele kulu, ahanjikile kuli vakiko mulilimi lyachiHepeleu+ ngwenyi:
Kwinyikila Chamwishi
^ Hela., “vawana vaze vapwile kanda valisavaleho lyehi namalunga.”
^ Chipwe “nakuzeyesa muchima wami?”
^ Hela., “twaholele kulu.”
^ Tala Chihande A5.
^ Chipwe “nakuvyuma vize vanajihi chakuzeneka kuhichisa manyinga avyo.”
^ MuchiHelase, por·neiʹa. Tala Mukana waMazu.
