Vilinga 22:1-30
22 “Enu malunga, enu vandumbwami, nayenu vatata, ngwivwililenu omu nangulihakwila kumeso enu.”+
2 Jino omu vevwile ali nakuhanjika kuli vakiko mulilimi lyachiHepeleu, vaholele kulu, kaha ambile ngwenyi:
3 “Ami ngukaYuleya,+ ngwasemukilile muTalasu yakuShilisha,+ oloze ngwatangilile munganda yino kutungi yaNgamalyele.+ Vangunangwilenga mwosena mwaya Jishimbi javakakuluka jetu,+ kaha ngwapwilenga natwima yakumuzachila Kalunga, nganomu muli nakulinga enu muvosena likumbi lyalelo.+
4 Ami ngwayanjishilenga vatu vakuli eyi Jila nakuvajiha, ngwakashilenga malunga namapwevo nakuvatwalatwala kukamenga.+
5 Kapilishitu wakulitulaho nalizavu lyavakulwane vosena vanahase kupwa vinjiho jami havyumevi. Kaha ngwatambwile namikanda kuli vakiko yakuya nayo kuli vandumbwetu muNdamashiku, ngwayileko mangana ngwami navaze vapwile kuze nawa ngukavakase nakuvaneha kuYelusalema mangana vavazangamise.
6 “Kahomu ngwapwile nakuya nakupandama kwakamwihi naNdamashiku, kafwe hamulungu, ngwakasumukile mwilu namufuma mumunyi waunene nakumunyikila hosena haze ngwapwile ami,+
7 kaha ngwalimbukile hamavu nakwivwa lizu nalihanjika kuli ami ngwalyo: ‘Ove Saulu, ove Saulu, uli nakunguyanjishila ika?’
8 Ami ngwakumbulwile ngwami: ‘Ove Mwata, yove iya?’ Kaha ambile kuli ami ngwenyi: ‘Ami yami Yesu wakuNazaleta, ou uli nakuyanjisa.’
9 Jino malunga vaze vapwile nayami, vamwene mumunyi, oloze kavevwile lizu lyamutu uze apwile nakuhanjika kuli amiko.
10 Ngocho ngwambile ngwami: ‘Ove Mwata, vyuma muka ngwatela kulinga?’ Mwata ambile ngwenyi: ‘Katuka, yako muNdamashiku, kaha navakulweza vyuma vyosena ovyo vanakutongwela lyehi kulinga.’+
11 Oloze hakuwana nge kangwahashile kumona chuma numba chimweko mwomwo yaupahu wamumunyi, ngocho vaze ngwapwile navo vangukwachile kulivoko nakungutetekela, kaha ngwahetele muNdamashiku.
12 “Jino Ananyiya uze akomokelenga Kalunga kweseka namwaya Jishimbi, uze vasangejekelenga kuli vaYuleya vosena vaze vatwaminenga kuze,
13 ejile kuli ami. Kaha emanyine hakamwihi nayami nakwamba ngwenyi: ‘Ove Saulu, ove ndumbwami, tona.’ Kaha hahaze vene ngwatonene nakumumona.+
14 Jino ikiye ambile ngwenyi: ‘Kalunga kavakakuluka jetu nakusakula mangana ngwenyi utachikize mwaya muchima wenyi, umone uze wakwoloka+ nakwivwa lizu lyamukanwa kenyi,
15 mwomwo naupwanga uchinjiho chenyi kuvatu vosena havyumevi unamono nakwivwa.+
16 Jino uli nakulangishila ika? Katuka vakumbapachise, kaha sana jishili jove+ hakusanyika Mwata halijina lyenyi.’+
17 “Oloze omu ngwakindulukile kuYelusalema,+ ngwapwile mutembele nakulomba, kaha ngwalezukilile mutulo.
18 Jino ngwamwene Mwata mwamba kuli ami ngwenyi: ‘Anguhwisako, fuma washi muYelusalema, mwomwo kaveshi kwitavila unjiho wove wakunguvuluka amiko.’+
19 Kaha ngwambile ngwami: ‘Ove Mwata, vakiko vanatachikiza kanawa ngwavo ami ngwakashilenga nakuvetaveta vaka-kwitava musunangonga hisunangonga.+
20 Kahomu vamwangile manyinga achinjiho chove Setefwano, nayami nawa ngwemanyine kuze nakulikundwiza navo nakulama uvwalo wahelu wavaze vapwile nakumujiha.’+
21 Oloze Mwata ambile kuli ami ngwenyi: ‘Yakonga, mwomwo ami nangukutuma kwakusuku kuli vaka-mafuchi eka.’”+
22 Jino vatwalileho lika kumwivwilila omu ahanjikile mazu kana. Kaha vahanjikile namazu akukanguka ngwavo: “Mutu wangana mujihenu afume hano hamavu, mwomwo katelemo kuyoyako.”
23 Jino hakuwana nge vapwile nakutambakana nakutapwojola uvwalo wavo wahelu nakufundula lukungu,+
24 kapitau kamaswalale wamukulwane ambile ngwenyi vengise Paulu muchilombo chamaswalale, nakwamba nawa ngwenyi vamuvete vikote ambulule, mangana atachikize ovyo vinalingisa numba vatu vatambakane ngocho.
25 Kahomu volwele mujimba waPaulu mangana vamuvete vikote, ikiye ambile kuli kapitau kamaswalale uze emanyine hakamwihi naikiye ngwenyi: “Uno vachitavisa kuli enu kuveta kaLoma* uze kanda vachihane mulonga tahi?”*+
26 Jino uze kapitau kamaswalale hakwivwa ngocho, ayile kuli kapitau kamaswalale wamukulwane nakwambulula ngwenyi: “Uno ou mutu naumulinga muka? Mwomwo mutu kana kaLoma.”
27 Ngocho uze kapitau kamaswalale wamukulwane ayile nakwamba kuli ikiye ngwenyi: “Ngulweze, uno ukaLoma tahi?” Ikiye ambile ngwenyi: “Eyo.”
28 Jino uze kapitau kamaswalale wamukulwane ambile ngwenyi: “Lisesa lyakutwama mulifuchi lino ngwalilanjile najimbongo jajivulu.” Paulu ambile ngwenyi: “Oloze aminyi ngwasemuka nalyo.”+
29 Hahaze vene malunga vaze vasakile kumuveta vikote mangana ambulule, vamusosolokele. Kaha uze kapitau kamaswalale wamukulwane evwile woma hakumona ngwenyi apwile kaLoma kaha nawa amukasanga mumalenge.+
30 Jino lichako, omu apwile nakusaka atachikize kanawa ovyo vaYuleya vanamuhanyina mulonga, amukasunwine, kaha alwezele vapilishitu vavakulwane navaka-Sunendeline vosena valikungulule. Ngocho anehele jino Paulu nakumwimika mukachi kavo.+
