Vilinga 23:1-35
23 Omu Paulu ashishikile chikuma vaka-Sunendeline, ambile ngwenyi: “Enu malunga, enu vandumbwami, ami ngunapunga nachivezu chitoma+ kumeso aKalunga swi nakulikumbi lyalelo.”
2 Hakwivwa ngocho, kapilishitu wakulitulaho Ananyiya alwezele vaze vemanyine kwakamwihi naikiye ngwenyi vamuvete kukanwa.
3 Jino Paulu ambile kuli ikiye ngwenyi: “Ove muka-kulyonga,* Kalunga mwakuveta. Ove unatwame ngwove ungusopese kweseka namwaya Jishimbi, kahove mutu youmwe nawa uhokole Jishimbi hakwamba ngwove vanguvete?”
4 Vaze vemanyine kwakamwihi vambile ngwavo: “Ove, uli nakusaula kapilishitu wakulitulaho waKalunga?”
5 Kaha Paulu ambile ngwenyi: “Enu vandumbwami, ami kangwatachikizanga ngwami hikapilishitu wakulitulahoko. Mwomwo vasoneka ngwavo: ‘Kanda naukahanjika mazu amapi kuli muka-kuyula vatu jenuko.’”+
6 Jino omu Paulu amwene ngwenyi chimbwa chimwe chavatu chapwile chavaSatuse, chikwavo chavaFwaliseu, atambakanyine muSunendeline ngwenyi: “Enu malunga, enu vandumbwami, ami ngukaFwaliseu,+ ngumwanavaFwaliseu. Ami vali nakungusopesela halutalililo lwakusanguka chavafu.”
7 Omu ahanjikile ngocho, vikokojola vyakatukile mukachi kavaFwaliseu navaSatuse, kaha lizavu lyalihandunwine hakachi.
8 Mwomwo vaSatuse veji kwambanga ngwavo, kakwatwama kusanguka chavafuko, ngwavo kakwatwama kangelo chipwe shipilituko, oloze vaFwaliseu veji kwitavilanga* hatoma ngwavo vyosena evi kuvyatwama.+
9 Ngocho kwepukile liuya lyalinene, kaha vaka-kusoneka vamwe vakuliuka lyavaFwaliseu vemanyine nakuputuka kulipula chikuma jipami ngwavo: “Etu katwawanyine mulonga muli ou mutuko, oloze nge shipilitu chipwe kangelo ikiye ahanjikanga kuli ikiye+—.”
10 Kahomu vikokojola vyatohwele chikuma, kapitau kamaswalale wamukulwane evwile woma ngwenyi Paulu navamutanya, ngocho atumine maswalale ngwenyi vamuhukule mukachi kavo nakumuneha muchilombo chamaswalale.
11 Oloze ufuku wakavangijileho Mwata emanyine kuli ikiye nakwamba ngwenyi: “Umika.+ Mwomwo nganomu unahane lyehi kanawa unjiho muYelusalema havyuma vyakunguvuluka ami, ngocho mukiko nawa watela kuhana unjiho namuLoma nawa.”+
12 Omu kwachele, vaYuleya valikashile, valishingile lushingo ngwavo kaveshi kulyako, chipwe kunwako kuvanga vanajihi Paulu.
13 Malunga vaze valikashile nakulishinga lushingo vahambakanyine 40.
14 Malunga kana vayile kuli vakulwane nakuli vapilishitu vavakulwane nakwamba ngwavo: “Tunalishingi lyehi ngwetu katweshi kulya chuma numba chimweko, kuvanga tunajihi Paulu.
15 Jino enu, navaka-Sunendeline, mwatela kulweza kapitau kamaswalale wamukulwane mangana asuule Paulu kuli enu nakulyonga nge muli nakusaka cheka kuhituluka kanawa muchihande chenyi. Oloze omu mwakalinga kanda achihete kwakamwihi, etu natukalizanga kumujiha.”
16 Oloze mwana walunga vasemene kuli ndumbwaPaulu wapwevo evwile kafuta kavo vashinganyekele kulinga, kaha engilile muchilombo chamaswalale nakumuhichilamo Paulu.
17 Jino Paulu asanyikile kapitau kamaswalale umwe nakwamba ngwenyi: “Mutwale ou mukweze walunga kuli kapitau kamaswalale wamukulwane, mwomwo ali namazu amwe akumulweza.”
18 Ngocho amumbachile nakumutwala kuli kapitau kamaswalale wamukulwane nakwamba ngwenyi: “Uze funge Paulu angusanyikanga, kaha angulombanga ngwenyi ngunehe ou mukweze walunga kuli ove, mwomwo ali namazu amwe akukulweza.”
19 Uze kapitau kamaswalale wamukulwane amukwachile kulivoko, ayile nenyi kupenge nakumwihwojola ngwenyi: “Mazu muka uli nakusaka kungulweza?”
20 Ikiye ambile ngwenyi: “VaYuleya vanalivwasana kukulomba mangana ngwavo usuule Paulu kuli vaka-Sunendeline hamene, hakulyonga ngwavo vali nakusaka vatachikize vyavivulu hachihande chenyi.+
21 Oloze ove kanda uvetavilako, mwomwo malunga vakuhambakana 40 vanamuswaminyina, vanalishingi lushingo ngwavo kaveshi kulyako chipwe kunwako kuvanga vanamujihi.+ Oholili vanalizange lyehi, vali nakuvandamina mazu ove akuvetavisa.”
22 Ngocho kapitau kamaswalale wamukulwane asuwile uze mukweze walunga nakumulweza ngwenyi: “Kanda mulweza mutu numba umwe ngwove unangujimbwila vyumeviko.”
23 Kaha asanyikile tupitau twamaswalale vavali nakwamba ngwenyi: “Longesenu maswalale 200 muyenga kuKesaliya haola yamuchitatu yaufuku,* navaka-tuvalu 70, navaka-makunga 200.
24 Kaha nawa, nehenu tuvalu vamunyinyiseho Paulu mangana vakamuhetese kanawa kuli nguvulu Fwelise.”
25 Kaha asonekele mukanda wamazu ano ngwenyi:
26 “Ami Kolochiu Lushase, ngunatumu mukanda kuli ove Nguvulu Fwelise Wamulemu: Ngunameneka mwane.
27 Ou lunga vamukwatanga kuli vaYuleya, kaha vasakanga ngwavo vamujihe, oloze ami ngwalovokanga washiwashi nalizavu lyamaswalale nakumupululula,+ hakwivwa ngwavo apwa kaLoma.+
28 Jino hakusaka ngwami ngutachikize mulonga vanamuhane, ngwamutwalanga muSunendeline+ yavo.
29 Kaha ngwamonanga ngwami mulonga vanamuhane unafumu kaha havikokojola vyaJishimbi javo,+ oloze kavamuwanyine namulonga numba umwe wakutela kumujihilaho, chipwe kumukashilahoko.
30 Jino hakuwana nge vanangulweze punga vanamutwame,+ ngocho ngunamutumu washiwashi kuli ove, nakulweza nawa vaze vanamuhane mulonga ngwami mulonga kana vawambulule kumeso ove.”
31 Shikaho vaze maswalale vambachile Paulu+ kweseka najindongi vavahanyine, kaha vamutwalile kuAndepatale naufuku.
32 Jino lichako, valwezele vaze vaka-tuvalu vayenga nenyi, oloze vakiko vakindulukile kuchilombo chamaswalale.
33 Jino vaze vaka-tuvalu vahetele kuKesaliya, vahanyine uze mukanda kuli nguvulu, kaha vahetesele nawa Paulu kuli ikiye.
34 Ngocho nguvulu atangile uze mukanda nakumwihula ejive kungalila afuma, kaha atachikijile ngwenyi wakuShilisha.+
35 Jino ambile ngwenyi: “Nangwivwilila kanawa chihande chove omu naveza vaze vanakuhane mulonga.”+ Kaha ambile ngwenyi vamulamine muzuvo yaHelote yawangana.
Kwinyikila Chamwishi
^ Hela., “Ove mbango yakukwita pemba.”
^ Chipwe “veji kuhanjikanga.”
^ Kafwe 21:00.
