Vilinga 25:1-27
25 Omu alingile Fwesetu+ hanahete lyehi mungalila yize nakuputuka kuyula, mwahichile kaha makumbi atatu, kaha afumine kuKesaliya nakuya kuYelusalema.
2 Kaha vapilishitu vavakulwane namalunga vavalemu vavaYuleya vamulwezele mulonga waPaulu.+ Ngocho vaputukile kumulembelela Fwesetu
3 avevwile uselewa mangana atume vatu vanehe Paulu kuYelusalema. Oloze vajinyine ngwavo vaswaminyine Paulu mangana vamujihile mujila.+
4 Oloze Fwesetu avalwezele ngwenyi Paulu atela kutwama kuKesaliya nakumulamina vene kuze kaha nawa ngwenyi naivene kalinwomu akinduluke kuze.
5 Kaha ambile ngwenyi: “Veshovo vanapu vatwamina hakachi kenu, vakatuke nakuya nayami hamwe mangana vakamuhane mulonga, kachi nge mutu kana nalingi chuma chakuhenga chikupu.”+
6 Ngocho omu alingile hanatwame lyehi navakiko kafwe makumbi 8 nyi 10 ngana, ayile kuKesaliya. Jino lichako atwamine hachitwamo chakusopela, kaha alwezele vatu vanehe Paulu.
7 Omu ejile, vaYuleya vaze vejile kufuma kuYelusalema vemanyine kuli ikiye jingulwishi, vamuhanyine milonga yayivulu yayinene, yize kavahashile kusolola unjihoko.+
8 Oloze Paulu alihakwilile ngwenyi: “Ami kangwalingile shili numba yimwe kuJishimbi javaYuleya, chipwe kutembele, chipwe kuli Kesaleko.”+
9 Jino Fwesetu hakusaka ngwenyi vaYuleya vamwivwile uselewa,+ ehwile Paulu ngwenyi: “Kutala nausaka kuya kuYelusalema vakakusopesele kumeso ami havyumevi tahi?”
10 Oloze Paulu amukumbulwile ngwenyi: “Ami ngunemana kuchitwamo chaKesale chakusopela, kuno kukiko vatela kungusopesela. Ami kangwalingile chuma chachipi kuli vaYuleyako, nge omu unejiva nayove.
11 Kachi nge ngunapu chikupu ngumuka-kuhengesa kaha nawa ngunavulumuna mulonga wakutela kufwa,+ ami kangweshi kuchina kufwako. Oloze nge vyuma vali nakunguhanyina mulonga kavyeshi vyamuchanoko, kaha kakweshi mutu ali nalisesa lyakunguhana kuli vakiko mwomwo yakusaka kuvevwisa kuwahako. Ngunalombo chihande chami vakachisope kuli Kesale!”+
12 Jino Fwesetu, omu alingile hanahanjika lyehi nalizavu lyavaka-kutwama punga, akumbulwile ngwenyi: “Unalombo lyehi chihande chove vakachisope kuli Kesale, ngocho nauya vene kuli Kesale.”
13 Jino omu mwahichile makumbi amwe, mwangana Angalipa naMbelenyise vejile muKesaliya nakumeneka Fwesetu.
14 Hakuwana nge vatwamine kuze makumbi amavulu, Fwesetu amuhichililemo mwangana mulonga waPaulu ngwenyi:
“Kuno kuli funge umwe uze asezele Fwelise mukamenga.
15 Kahomu ngwapwile kuYelusalema, vapilishitu vavakulwane navakulwane javaYuleya vangulwezele mulonga wenyi,+ nakungulomba ngwavo ngumusopese nakumuhana mulonga.
16 Oloze ngwavakumbulwile ngwami, lushimbi lwavaLoma kalwetavisa kuhana mutu mumavoko avaka-kumuhana mulonga hakusaka kaha kuvevwisa kuwahako shimbu kanda achilimone navo meso nameso nakuhasa kulihakwila ivene mulonga vanamuhaneko.+
17 Ngocho omu vejile vosena kuno, ami kangwalangishileko, oloze lichako ngwatwamine hachitwamo chakusopela, kaha ngwalwezele vatu vanehe uze lunga.
18 Omu vemanyine vaze vaka-kumuhana mulonga, kavavulukile vyuma vyavipi alingile nge omu ngwashinganyekele amiko.+
19 Oloze vapwile nakulipula nenyi kaha jipami hachihande chakulemesa tulunga twavo,*+ nahali lunga umwe vavuluka ngwavo Yesu uze afwile, oloze uze Paulu avulukilenga ngwenyi wamutonyi.+
20 Omu ngwahonene mwakulingila havikokojola kana, ngwamwihwile numba nge mwasaka kuya kuYelusalema vakamusopesele kuze havihande kanevi.+
21 Oloze omu Paulu alombele ngwenyi vamukase mumalenge nakuvandamina Angusutu Wamulemu*+ akayule mulonga wenyi, ngwalwezele vatu vamulame palanga nomu nangukamutuma kuli Kesale.”
22 Jino Angalipa ambile kuli Fwesetu ngwenyi: “Nayami nawa ngunakusaka ngumwivwe ou lunga.”+ Fwesetu ambile ngwenyi: “Naukamwivwa hamene.”
23 Kaha lichako, Angalipa naMbelenyise vejile naulemu waunene, kaha vengilile muzuvo yakusopela milonga hohamwe natupitau twamaswalale vavakulwane namalunga vavalemu vamunganda yize, kaha Fwesetu alwezele vatu vanehe Paulu, ngocho vamunehele.
24 Fwesetu ambile ngwenyi: “Ove Mwangana Angalipa, nayenu muvosena muli nayetu muno, munamumono ou lunga, ou vene vangulombele vaYuleya vosena nakuYelusalema nakuno nawa ngwavo nguvahaneyo, nakutambakana ngwavo katela kuyoyako.+
25 Oloze ami ngwamwene ngwami kalingile chuma chakutela kufwilako.+ Shikaho ou lunga, omu alombele ngwenyi vakamuyule kuli Angusutu Wamulemu, ngocho ngwambile ngwami nangumutuma.
26 Oloze ami kangweshi navimwe vyakusonekela Mwata wami hali ou mutuko. Shikaho ngunamunehe kumeso enu muvosena, chikumanyi kumeso ove, ove Mwangana Angalipa, mangana hakukumisa kuhehwojola mulonga wenyi, ami nguwane vinangusoneka.
27 Mwomwo ami ngunamono ngwami kacheshi chamanganako kutuma funge chakuzeneka kuvuluka mulonga vanamuhaneko.”
