Vilinga 26:1-32
26 Angalipa+ ambile kuli Paulu ngwenyi: “Ngunakwitavisa ulihakwile ove ivene.” Jino Paulu olwele livoko lyenyi nakuputuka kulihakwila ngwenyi:
2 “Ove Mwangana Angalipa, ngunawahilila hakulihakwila lelo kumeso ove havyuma vyosena evi vananguvangijikila vaYuleya,+
3 chikumanyi mwomwo ove wapwa ukuluwa muvilika vyosena vyavaYuleya namuvyuma veji kulikokojwesanga. Shikaho ngunakulombo ngwami ungutalilile chikoki nakungwivwilila kanawa.
4 “Chiyoyelo ngunayoyonga kufuma kuunyike wami omu ngwatwaminenga muli vaka-lifuchi lyami namuYelusalema, vanachitachikiza kuli vaYuleya vosena+
5 vaze vangwijivile kunyima, kaha kachi nge vanasake, vanahase kunguhakwila ngwavo ngwapwilenga ngukaFwaliseu+ wamukaliuka kakuhanduka kaze kakavilenga chikuma mwaya kunangula chetu.+
6 Jino oholili ngunemana kuno nakungusopesa halutalililo lwami lwakutalilila vyuma vize Kalunga ashikile vakakuluka jetu.+
7 Elu hilutalililo lwolumwe luze miyachi yetu 12 yili nakutalilila kukatesamo hakumuzachila chikuma mulimo wajila namusana naufuku. Kaha Ove Mwangana, lutalililo kanelu, lukiko vene vali nakunguhanyina mulonga vaYuleya.+
8 “Mwomwo ika enu vatu mweji kuhonenanga kwitavila* ngwenu Kalunga eji kusangulanga vafu?
9 Ami ngwachimwene kupwa chakutamo kwimanyina chikuma nakole lijina lyaYesu wakuNazaleta.
10 Evi vikiko vene ngwalingilenga muYelusalema, kaha ngwahakilenga vaka-kujila vavavulu mutumenga,+ mwomwo ngwatambwile ngolo kuli vapilishitu vavakulwane.+ Kahomu vasakilenga ngwavo vavajihe, nayami nawa ngwetavililenga.
11 Ngwesekelenga kuvashinjila mangana vaseze lufwelelo lwavo hakuvayanjisanga kakavulu mujisunangonga josena. Ngocho hakuwana nge ngwavahungile chikuma, ngwayilenga nakuvayanjisa nakujinganda jeka nawa.
12 “Omu ngwapwile nakutakajala vyumevi, ngwakashile ungeji wakuya kuNdamashiku oku hingunatambula lyehi ngolo nalisesa kuli vapilishitu vavakulwane.
13 Kaha mujila, omu likumbi lyahetele hamulungu, Ove Mwangana, ngwamwene mumunyi wakufuma mwilu uze wamunyikile chikuma kuhambakana likumbi, kaha wangumunyikilile ami navaze ngwapwile nakutambuka navo.+
14 Kahomu tuvosena twalimbukile hamavu, ngwevwile lizu nalihanjika kuli ami mulilimi lyachiHepeleu ngwalyo: ‘Ove Saulu, ove Saulu, uli nakunguyanjishila ika? Kwasanga lihinji lyove kumyumba* nachikulemeka.’
15 Oloze ami ngwambile ngwami: ‘Ove Mwata, yove iya?’ Kaha Mwata ambile ngwenyi: ‘Ami yami Yesu, ou uli nakuyanjisa.
16 Chipwe ngocho, katuka wimane. Evi vikiko vene ngunalisolwela kuli ove mangana ngukusakule upwenga ungamba, uchinjiho kuvyumevi unamono, navyuma vize nangukakumwenesa kutalisa kuli ami.+
17 Kaha nangukakupululula kuvatu kanava nakuli vaka-mafuchi, kuze nangukutuma ami+
18 mangana ukatonese meso avo,+ ukavalumune kufuma kumilima+ nakwiza kumumunyi,+ nakufuma kuwata waSatana+ nakwiza kuli Kalunga, mangana vavakonekele jishili javo+ nakuswana uswana uze uli muli vaze valingisa lyehi kupwa vajila mwomwo yalufwelelo lwavo muli ami.’
19 “Shikaho, ove Mwangana Angalipa, ami kangwalikangile kuchuma chize vangumwenesele chakufuma mwiluko,
20 oloze ngwayile chatete nakwambulula mujimbu kuli vaze vapwile muNdamashiku.+ Kufumaho ngwayile kuli vaze vapwile muYelusalema+ namungalila yosena yaYuleya nakuli vaka-mafuchi eka ngwami, vatela kupihilila nakwalumuka nakwiza kuli Kalunga hakulinganga vyuma vize navisolola nge vanapihilila nakwalumuka.+
21 Evi vikiko vangukwachilile vaYuleya mutembele nakusaka ngwavo vangujihe.+
22 Oloze hakungukafwa kuli Kalunga, ngunahanenga lika unjiho kuvatu vamokomoko nakuvatu vavalemu palanga nakulikumbi lyalelo. Kaha ami kangweshi kuhanjika vyuma vyekako, shina vize kaha vavulukile muMazu aVapolofweto namuMazu aMose ngwavo navikasoloka,+
23 ngwavo Kulishitu mwakayanda,+ kaha ikiye hakupwa watete kusanguka kuvafu,+ mwakambulula kumunyika kuvatu ava, nakuli vaka-mafuchi eka nawa.”+
24 Jino omu Paulu apwile nakuhanjika vyumevi hakulihakwila ivene, Fwesetu ambile nalizu lyakukanguka ngwenyi: “Ove Paulu, unazaluka. Kunanguka chikuma chili nakukuzalwisa.”
25 Oloze Paulu ambile ngwenyi: “Ove Fwesetu Wamulemu, ami kangwazalukileko, nguli nakuhanjika mazu amuchano kaha nawa amangana.
26 Chikupu vene, mwangana ou nguli nakuhanjika nenyi nakukasunuka, natachikiza kanawa vyumevi. Ngunenjikiza chikupu ngwami havyumevi kaheshi chimwe chinaswame kuli ikiyeko, mwomwo nachimwe chauchi chalingiwile kupenge.+
27 Ove Mwangana Angalipa, uno Mazu aVapolofweto wawafwelela tahi? Ngunatachikiza ngwami wawafwelela vene.”
28 Oloze Angalipa ambile kuli Paulu ngwenyi: “Mukatando kakandende kaha, naungukunyula ngupwenga ngumuka-Kulishitu.”
29 Hakwivwa ngocho, Paulu ambile ngwenyi: “Ngunalombo kuli Kalunga ngwami numba mukatando kakandende chipwe mutando yayinene, keshi nge yove kahako, oloze navosena ava vali nakungwivwilila lelo, kachi navapwa nganomu ngwapwa ami, olozenyi chakuzeneka kupwa mumalenge.”
30 Jino mwangana, nanguvulu, naMbelenyise, namalunga vaze vatwamine navo vakatukile.
31 Oloze omu vapwile nakulimwanga, vaputukile kulihanjikisa mwavomwavo ngwavo: “Ou lunga keshi nakulinga chuma chakutela kufwilako chipwe kumukasako.”+
32 Jino Angalipa ambile kuli Fwesetu ngwenyi: “Kachi nge ou lunga kalombanga chihande chenyi vakachisope kuli Kesaleko,+ kachi vanamukasununa.”
