Vilinga 27:1-44
27 Jino omu vatulwezele ngwavo tuyenga kuItalya+ nawato, vambachile Paulu navafunge vamwe nakuvahana kuli kapitau kamaswalale vavulukile ngwavo Yulyu, wakulizavu lyamaswalale lyaAngusutu.
2 Twengilile muwato kuAndalamuchiyu uze wapwile nakuya kuvyau vyakukalungalwiji kungalila yaAja, kaha twasunukile nakuya. NaAlishitaku+ muka-Masetonya wakuTesolonyika apwile nayetu.
3 Lichako, twasulikile kuShitone. Jino Yulyu asolwelele Paulu likoji, amusuwile ayenga kuli masepa jenyi vakamuzakame.
4 Kaha twasunukile nawato kuze, oloze hakuwana nge kwapwile peho yize yahuhwilenga kufuminyina kulutwe lwetu, ngocho twahichilile kwakamwihi nalitungu lyaKupulusu lize lyatukingile kupeho.
5 Jino twapulasanyine hakalungalwiji kwakamwihi naShilisha naPamafulya, nakukasulika muchau chakuMula muLusha.
6 Kapitau kamaswalale awanyine wato kuze wakuAlekesandelya uze wapwile nakuya kuItalya, kaha atwingishilemo.
7 Omu twatambukile nawato chikoki chikoki nakupindasana hamakumbi amavulu, twahetele kuKinyitu. Jino hakuwana nge peho yatuhonesele tutwaleho kuya ungeji wetu, ngocho twayile kwakulitalasana naSalamone kuze litungu lyaKelete lyatukingile kupeho.
8 Twakulishile litungu kana nakupindasana, kaha twahetele kuchihela chimwe vavuluka ngwavo Vyau Vyamwaza, kwakamwihi nanganda yaLaseya.
9 Hakuwana nge hahichile tando yayisuku, kaha nawa hakalungalwiji hapihile kutambukaho nawato, oku nawa chilika chakulijilika kulya chaLikumbi lyaKulinga Chakufwika haShili+ hichinahichi lyehi, ngocho Paulu avahuhumwine
10 ngwenyi: “Enu malunga, ami ngunamono ngwami uno ungeji nautwingisa muponde, kaha natutokesa vyavivulu, keshi nge viteli nawato kahako, oloze namyono yetu nawa.”
11 Oloze kapitau kamaswalale evwililile mazu amuka-kutambukisa wato namwenyawato, keshi vyuma vize ahanjikile Pauluko.
12 Jino hakuwana nge kuchau kakwawahile kutwama hangonde yachishikako, ngocho vavavulu vambile ngwavo vasunune wato nakuya kuFwenyise, kuchau chakuKelete chize chatala kumusamuko mangana vakatwameko hangonde yachishika.
13 Omu peho yakusulo yaputukile kuhuhwa chindende, vashinganyekele ngwavo vyuma vajinanga navizachiwa. Shikaho vakokele chikungo chakwimikisa wato nakuputuka kuya nakukulisa litungu lyaKelete.
14 Omu hahichile kapyapya kakandende, kwejile peho yanyamanganda vavuluka ngwavo, Yulakwilo.*
15 Yize peho yalivetele hawato, kaha yauhonesele kutalisa tongo yawo kuze kwapwile nakufuminyina peho. Ngocho twawechele, kaha twapekumukile napeho.
16 Jino twakalovokelele kulitungu limwe lyalindende vavuluka ngwavo, Kauta lize lyatukingile kupeho, kaha twapinjile chikuma hakusaka tukoke wato waundende* uze wapwile hameya kutongo yakunyima.
17 Omu valingile hivanaunyinyisa lyehi, uze wato waunene vaputukile kuuselwisa jifungo mangana vaukase ukole. Kaha hakwivwa woma ngwavo navahungumuka nakukakachila hausekeseke waSulute,* vambwembwelesele mikokili, ngocho vahungumukile napeho.
18 Oloze hakuwana nge wato wanganjangile chikuma napeho yanyamanganda, lichako vaputukile kumbila viteli mumeya mangana wato uleluke.
19 Kaha halikumbi lyamuchitatu vambachile vyuma vyakutambukisa wato nakuvimbila mumeya namavoko avo.
20 Jino omu likumbi navatanganyika vyahonene kusoloka hamakumbi amavulu, oku nawa peho yayinene yanyamanganda yapwile lika nakuhuhwa, katwafwelelele cheka ngwetu natuyoyako.
21 Kahomu hahichile shimbu yayisuku chakuzeneka kulya, Paulu emanyine mukachi kavo nakwamba ngwenyi: “Enu malunga, kachi mwevwililile mazu ami nakuzeneka kukatuka nawato kuKelete, kachi vyuma kavyalyenyekele nakutoka nganako.+
22 Chipwe ngocho ami nangumilweza ngwami umikenu, mwomwo hali enu kaheshi kupwa mutu numba umwe mwafwako,* shina wato kaha.
23 Mwomwo naufuku, kuli ami kwemananga kangelo+ kaKalunga kami ou ngweji kuzachilanga mulimo wajila nakulemesa,
24 kaha ambanga ngwenyi: ‘Ove Paulu, kanda nawivwa womako. Watela kwimana kumeso aKesale.+ Tala! Kalunga mwavakinga vosena vaze uli nakutambuka navo muwato.’
25 Shikaho, enu malunga, umikenu, mwomwo ngunafwelela Kalunga ngwami vyuma navisoloka nganomu vene angulwezanga.
26 Oloze kuvanganyi makimba atumbile kulitungu limwe.”+
27 Jino omu wahetele ufuku wakusokesa 14, omu twapwile nakuhungumuka napeho noku noku haKalungalwiji waAndalya, vaka-kuzata kuwato vaputukile kuhumikiza mukachi kaufuku ngwavo vali nakupandama kwakamwihi natunda.
28 Kaha vapimine kukunama chameya, vawanyine jifwatome 20.* Vatambukileko cheka chindende, kaha vapimine cheka, vawanyine jifwatome 15.*
29 Jino hakwivwa woma ngwetu makimba pamo nawatupekumwina kuchihela chimwe chamalolwa, vazezumwinyine vikungo vyakwimikisa wato viwana vyakutongo yakunyima mumeya, kaha vafwililile kachi kuchenga washi.
30 Oloze omu vaka-kuzata kuwato vasakile ngwavo vafume muwato vachine, vazezumwinyine wato waundende hakalungalwiji nakulyonga nge vali nakusaka kuzezumwina mumeya vikungo vyakwimikisa wato vyakutongo yakulutwe.
31 Kaha Paulu ambile kuli kapitau kamaswalale nakuli maswalale ngwenyi: “Ava malunga kuvanga vatwame muwato, mokomoko kamweshi kuyovokako.”+
32 Kaha maswalale vavatwile mikole yawato waundende nakuwecha usale.
33 Jino hakuheta kwakamwihi nakucha, Paulu aputukile kukolezeza vosena mangana valyenga vyakulya, ngwenyi: “Lelo linapu jino likumbi lyakusokesa 14 munatwamenga nakulizakamina nakutalilila munavipwa vyuma, kaha munejiva kutwama chakuzeneka kulya vyakulya.
34 Shikaho nguli nakumikolezeza mulyenga vyakulya mangana mukwate ngolo, mwomwo kakweshi lukambu lwakumutwe wamutu umwe hali enu nalunongako.”
35 Omu akumishile kuhanjika ngocho, anonele mbolo, alombele kuli Kalunga kumeso avosena, kaha ayipuzwile nakuputuka kulya.
36 Ngocho vosena vomikile, kaha vaputukile kulya vyakulya.
37 Tuvosena twapwile muwato, twapwile 276.
38 Omu valingile hivanekuta lyehi, vambilile tiliku mukalungalwiji mangana wato uhehuke.+
39 Jino omu kwachele, kavatachikijile haze hatunda vapwileko,+ oloze vamwene chihukula chimwe chapwile nachisekeseke, kaha vafwililile ngwavo, nge navahasa, vakasulike wato kuze.
40 Ngocho vavatwileko vikungo vyakwimikisa wato nakuvyecha vijiminyine mukalungalwiji. Vakasunwine nawa jingoji jakuvilapo vyakupingulwisa, vazezwilile mupeho lihina lyakulutwe lyakutambukisa wato, kaha vayile kuze kuchisekeseke.
41 Oloze omu vahetele hamwava, wato washinjile hamavu, kaha tongo yakulutwe yakakachililemo mbe, oloze tongo yakunyima yaputukile kupazwojoka muvihanda mwomwo yamakimba.+
42 Hakumona ngocho, maswalale vashinganyekele kujiha vafunge, kuchina vamwe navahala nakuya kutunda nakuchina.
43 Oloze kapitau kamaswalale afwililile kukinga Paulu, ngocho avakanjile kulinga muze vashinganyekele. Kaha alwezele vaze navahasa kuhala valimbile hakalungalwiji nakulivanga kuheta kutunda,
44 numbanyi vakwavo veka vakavangizeho, vamwe hamaliva, vakwavo havihanda vyakuwato. Ngocho vosena vahetele kanawa kutunda.+
Kwinyikila Chamwishi
^ Kulumbununa, peho yakunote.
^ Wato uze vazachishilenga hakuyovola vatu.
^ Tala Mukana waMazu.
^ Chipwe “kupwa mwono numba umwe naufwako.”
^ Kafwe jimita 36. Tala Chihande B14.
^ Kafwe jimita 27. Tala Chihande B14.
