Vilinga 28:1-31
28 Omu twalingile hitunahete kanawa kutunda, twatachikijile jino ngwetu litungu kana valivuluka ngwavo, Melita.+
2 Ngocho vatu vakuze vaze vahanjikilenga lilimi lyeka,* vatusolwelele likoji lyakulipwila. Vawikile kakahya nakututambula nalikoji tuvosena hakuwana nge vula yapwile nakunoka, kaha nawa kwapwile chishika.
3 Oloze omu Paulu ambachile mukuta wajitete nakuuhaka hajiko, hasolomokele chiyenge mwomwo yakakahya nakukakachila kulivoko lyenyi.
4 Jino vatu vakuze vaze vahanjikilenga lilimi lyeka, hakumona uze linoka waulembe nazezalala kulivoko lyaPaulu, vaputukile kulihanjikisa mwavomwavo ngwavo: “Chikupu vene ou lunga apwa muka-kujiha vatu, kaha numba nayovoka tuhu hakalungalwiji, oloze Chiyulo* kachamwitavilile ayoye likako.”
5 Paulu atapwilile uze linoka mukakahya, kaha kalemanyineko.
6 Oloze vapwile nakumutalijiza ngwavo pamo mwajimba, mokomoko ngwavo linwomu alimbuke nakufwa. Oloze omu vamutalijijile hatando yayisuku chakuzeneka kumona chuma chimwe chachipi chinasoloka kuli ikiye, valumwine vishinganyeka vyavo nakuputuka kwamba ngwavo hikalunga.
7 Kwakamwihi nachihela kana kwapwile mande alunga umwe wamulemu wahaze halitungu, lijina lyenyi ikiye Puvuliu. Ikiye atutambwile nachisambo, kaha twatwamine nenyi makumbi atatu.
8 Jino ise yaPuvuliu asavalile hakahela, apwile nakuviza musongo wachishika nou wakuhichisa manyinga, kaha Paulu engilile mukachi muze apwile, alombele, kaha amunangikile mavoko enyi, amukile.+
9 Omu alingile ngocho, vatu vosena vahalitungu lize vaze vapwile nakuviza, vaputukile kwiza kuli ikiye, kaha avokile.+
10 Vatuvumbikile nawa hakutuhana mawana amavulu. Kahomu twalingile hinatusunuka nawato, vatulongejekele vyuma vyakulikafwa navyo.
11 Omu mwahichile tukweji vatatu, twakatukile nakuya nawato uze wapwile nakatachikijilo ngwavo “Vana vaZeuse.” Wato kana wafumine kuAlekesandelya, kaha watwamine ngonde yachishika yosena halitungu kana.
12 Omu twasulikile muchau kuSulakuse, twatwamine kuze makumbi atatu,
13 kaha kufuma kuze twayile nakukaheta kuLejume. Omu mwahichile likumbi limwe, peho yakusulo yahuhwile, kaha twahetele kuPuteyole halikumbi lyamuchivali.
14 Kuheta kuze twawanyine vandumbwetu, kaha vatulembelelele tutwame navo makumbi 7. Kufumaho twatalikishile kuLoma.
15 Kaha vandumbwetu kuze omu vatwivwile, vatusesele swi nakuChilanjilo chaApiu, nakuJizuvo jaVangeji Jitatu. Kahomu Paulu avamwene, amusakwililile Kalunga, kaha ajikijile.+
16 Jino omu twengilile muLoma, Paulu vamwitavishile kutwama uka wenyi naliswalale amulamenga.
17 Oloze omu mwahichile makumbi atatu, asanyikile malunga vavalemu vavaYuleya. Omu valikungulwilile hamwe, ambile kuli vakiko ngwenyi: “Enu malunga, enu vandumbwami, numba tuhu ami kangwalingile chuma chimwe chachipi kuvatu chipwe kuvilika vyavakakuluka jetuko,+ oloze vangufumishile kuYelusalema ngufunge nakunguhana mumavoko avaLoma.+
18 Kahomu vakumishile kungwihwojola,+ vasakile ngwavo vangukasunune, mwomwo kavanguwanyine namulonga wakungujihilako.+
19 Oloze omu vaYuleya vakanyine ngwavo kanda vangukasununako, changulingishile ngulombe mangana chihande chami vakachisope kuli Kesale.+ Oloze keshi ngwavo ngwapwile nakusaka kuwanyina vaka-lifuchi lyami mulongako, nduma.
20 Shikaho ngwalombele ngwami ngumimone nakuhanjika nayenu, mwomwo ami vanangukase lilenge lino mwomwo yachuma ocho vatalilila vaIsalele.”+
21 Vakiko vambile kuli ikiye ngwavo: “Etu katwatambwile mikanda yakufuma kuYuleya yakuhanjika hali oveko, chipwe vene vandumbwetu vaze vaneza kuno, kakweshi umwe nambulula chipwe kuhanjika chuma chachipi hali oveko.
22 Oloze tunachimono kupwa chakutamo ngwetu tukwivwilile omu unashinganyekela ove, mwomwo mwamuchano vene aka kaliuka kakuhanduka+ tunatachikiza ngwetu vakahanjika mwamupi kuvihela vyosena.”+
23 Jino valikashile likumbi lyakumuwana, kaha vatu vavavulu vejile kuli ikiye muzuvo yize atwaminenga. Kufuma kuchimene swi nakuchingoloshi, avalumbunwinyine chihande chosena hakuvambulila kanawa unjiho waWangana waKalunga mangana avakunyule havyuma vyakuvuluka Yesu+ vyakufuma muJishimbi jaMose+ namuMazu aVapolofweto.+
24 Vamwe vaputukile kwitavila vyuma vize ahanjikile, veka kavetavilileko.
25 Hakuwana nge vahonene kulivwasana mwavomwavo, Paulu ahanjikile mazu awa omu vapwile nakulimwanga ngwenyi:
“Shipilitu yajila yahanjikile kanawa kuli vakakuluka jenu kuhichila muli kapolofweto Isaya
26 ngwayo, ‘Yako ukalweze vatu ava ngwove: “Kwivwa namwivwa vene, oloze kamweshi kumona chikupu mwalumbunukila vyumako, kaha kutala namutala vene, oloze kamweshi kumonako.+
27 Mwomwo michima yavatu ava yinambumbula, kwivwa vanevu, oloze vanaliula, kaha nawa vanalalavika meso avo mangana vahone kumona, mangana vahone kwivwa, vahone kumona namichima yavo mwalumbunukila vyuma, nakwalumuka mangana ami nguvoke.”’+
28 Shikaho mwatela kwijiva ngwenu ou ulwilo wakuli Kalunga vanautumu lyehi kuli vaka-mafuchi eka,+ kaha navawivwilila chikupu.”+
29 *——
30 Ngocho atwamine kuze myaka yivali yamuundu muzuvo yenyi yakufwetela,+ kaha vosena vaze vejilenga kuli ikiye avatambwilenga nalikoji.
31 Avambulilile Wangana waKalunga, nakuvanangula vyaMwata Yesu Kulishitu hakuhanjika nakukasunuka chikuma,*+ chakuzeneka vyuma vimwe vyakumuhonesa.
Kwinyikila Chamwishi
^ Chipwe “Ngocho venyangalila.”
^ MuchiHelase ngwavo Diʹke, pamo kulumbununa kalunga wapwevo muka-kulingilako sambanjinga.
^ Tala Chihande A3.
^ Chipwe “nakumika chikuma.”
