Vilinga 3:1-26
3 Jino Petulu naYowano vapwile nakuya kutembele haola yakulomba, yize yapwile ola yakusokesa 9,*
2 kaha kwapwile lunga umwe uze apwile chitonji kufuma vene kukusemuka chenyi uze vambachile kuvatu. Vamutumbikilenga hakumbi hakumbi kwakamwihi nachikolo chatembele, chize vavulukilenga ngwavo, Chikolo Chamwaza, mangana alombelombenga mawana akutetela kuli vaze vengililenga mutembele.
3 Omu amwene Petulu naYowano navasaka kwingila mutembele, aputukile kuvalomba atambule mawana akutetela.
4 Oloze Petulu naYowano vamushishikile nakwamba ngwavo: “Achitutale.”
5 Ngocho avatalile, ashinganyekele ngwenyi pamo mwatambulako kamwe kuli vakiko.
6 Oloze Petulu ambile ngwenyi: “Ami kangweshi napalata nauluko, oloze echi nguli nacho chikiko nangukuhana. Mulijina lyaYesu Kulishitu wakuNazaleta, tambuka!”+
7 Ngocho amukwachile kulivoko lyenyi lyachilyo nakumukatula.+ Kaha hahaze vene vilyachilo vyenyi natusendengele twenyi vyakwachile ngolo,+
8 kaha alizaminyinyine namahinji enyi+ nakuputuka kutambuka. Ngocho engilile navo mutembele nakutambuka nakutumbwojoka nakumwalisa Kalunga.
9 Vatu vosena vamumwene ali nakutambuka nakumwalisa Kalunga.
10 Kaha vamutachikijile jino ngwavo, ou ikiye mutu uze apwilenga nakutwama kuChikolo Chamwaza chatembele+ nakulombalomba mawana akutetela, ngocho valikomokelele nakuwahilila chikuma hachuma chasolokele kuli ikiye.
11 Shimbu ou mutu alinjililile kuli Petulu naYowano, vatu vosena valahilile kuli vakiko kuze vavulukile ngwavo, kuSenge yaSolomone,+ oku vanalikomokela havyuma vyasolokele.
12 Omu Petulu amwene chuma kana, ambile kuli vaze vatu ngwenyi: “Enu vaIsalele, ikaze muli nakulikomokela hachumechi, kaha muli nakutushishikila ika kwijiva nge etu yetu tunamutambukisa mungolo jetu chipwe mwomwo yamuchima wetu wakuzachila Kalunga?
13 Kalunga kaApalahama, naIsaka, naYakova,+ Kalunga kavakakuluka jetu, natohwesa Ngamba+ yenyi Yesu+ uze mwahanyine enu mumavoko avatu+ nakumukana kumeso aPilatu numba tuhu asakile ngwenyi amukasunune.
14 Enu mwakanyine mutu wajila wakwoloka nakulomba ngwenu vamisuwile lunga uze apwile muka-kujiha vatu,+
15 oloze mwajihile Twamina Wamunene wakuyoya.+ Jino Kalunga amusangwile kuvafu, kaha etu tunapu tuvinjiho hachuma kanechi.+
16 Ngocho kuhichila mulijina lyenyi, nahakufwelela chetu mulijina lyenyi, ou mutu munamono nakutachikiza vanamuzamikisa. Lufwelelo elu tuli nalwo muli ikiye lunalingisa ou mutu kupwa wamukangule kumeso ayenu muvosena.
17 Kaha jino, enu vandumbwami, ngunatachikiza ngwami mwachilingile hakuhona kutachikiza,+ ngana muze valingile nawa vaka-kumiyula.+
18 Oloze echi chapwile ngocho mangana Kalunga atesemo vyuma avilikile chimweza kuhichila mutunwa twavapolofweto vosena ngwenyi Kulishitu yenyi mwakayanda.+
19 “Shikaho, pihililenu nakwalumuka,+ kaha kindulukenu kuli Kalunga+ mangana jishili jenu vajijimbangane,+ mangana lwola lwakuhizumuna luhase kwiza kufuma kuli Yehova ivene,*
20 mangana ahase nawa kumitumina Yesu uze apwa Kulishitu vamitongwela enu.
21 Melu atela kumulama ou mutu palanga nakulwola lwakukindulwisa cheka vyuma vyosena muze vyapwile, vize Kalunga ahanjikile kuhichila mutunwa twavapolofweto jenyi vajila vakushikulu.
22 Chikupu vene naMose ambile ngwenyi: ‘Yehova* Kalunga kenu mwakamikatwila kapolofweto wamuli vandumbwenu, wakufwana nge ami,+ kaha kevwililenu vyuma vyosena mwakamilweza.
23 Chikupu vene weshowo mwakakana kwivwilila kuli uze Kapolofweto, navakamunongesa muli vatu.’+
24 Kaha navapolofweto vosena nawa, kufuma kuli Samwele nakuneha kuli vaze vejile munyima yenyi, vosena vahanjikilemo nakuvilika hatoma vyamakumbi awa.+
25 Enu munapu muvana vavapolofweto kaha nawa muvana valushiko luze Kalunga ashikile vakakuluka jenu,+ hakwamba kuli Apalahama ngwenyi, ‘Kaha jitanga jahamavu josena navakajikisula kuhichila muli muka-tanga* yove.’+
26 Omu Kalunga alingile hanasangula lyehi Ngamba yenyi, amutumine chatete+ kuli enu mangana amikisule hakumyalumuna muvosena museze vilinga vyenu vyakuhuka.”
Kwinyikila Chamwishi
^ Kafwe 15:00.
^ Hela., “kufuma kumeso aYehova.” Tala Chihande A5.
^ Tala Chihande A5.
^ Hela., “mbuto.”
