Vilinga 6:1-15
6 Jino hamakumbi aze, omu tumbaji vapwile nakuvula chikuma, vaYuleya vaze vahanjikilenga chiHelase vaputukile kutatwokesa vaYuleya vaze vahanjikilenga chiHepeleu, mwomwo vatuliwe javo vamapwevo vapwilenga nakuvasuvilila hakupanga vyakulya vyahakumbi hakumbi.+
2 Ngocho vaze 12 vasanyikile lizavu lyatumbaji hamwe nakwamba ngwavo: “Kacheshi chakwoloka* kuli etu kuseza mazu aKalunga nakuzata milimo yakupangila vyakulya kujimesako.+
3 Ngocho enu vandumbwetu, sakulenu malunga 7 vapuho yamwaza+ muli enu, vakuzala nashipilitu namangana,+ nakuvaneha tuhase kuvatongola vazate mulimo kanou waulemu,+
4 mangana etu tuhake chikuma michima yetu kukulomba nakumulimo wakunangula mazu.”
5 Kaha vyuma vahanjikile vyasuulwishile liyongomena lyosena, ngocho vasakwile Setefwano, lunga walufwelelo lwalunene nashipilitu yajila, naFwilipu,+ naPolokolu, naNyikanole, naChimone, naPalamena, naNyikolau wakuAndeyoka uze alumukile kupwa kaYuleya.
6 Vavanehele kuvaposetolo. Kahomu valingile vaposetolo hivanalombo lyehi, vavanangikile mavoko.+
7 Shikaho mazu aKalunga ayilenga lika nakutanda,+ kaha tumbaji muYelusalema vapwilenga lika nakuvulilako chikuma.+ Liyongomena lyalinene lyavapilishitu lyaputukile kufwelela.+
8 Jino Setefwano, uze apwile wakuzala nauselewa waKalunga nangolo, alingilenga vyuma vyakukomwesa vyavinene navinjikizo nawa muli vatu.
9 Oloze vatu vamwe vakuliuka vavulukilenga ngwavo Sunangonga yaVatu Vakusokoka, vejile hamwe navatu vamwe vaka-Kulene navaka-Alekesandelya, navatu vamwe vakuShilisha navakuAja mangana valipule jipami naSetefwano.
10 Chipwe ngocho, kavahashile kulingulula mangana enyi nashipilitu yize yamukafwile ahanjikeko.+
11 Jino vakunywile malunga kupenge vambenga ngwavo: “Tunamwivu mwahanjika mazu akusaula Mose naKalunga.”
12 Kaha vasangumwine vatu, vakulwane, navaka-kusoneka, vamuzemukilile, vamukwachile nangolo nakumutwala kuli vaka-Sunendeline.
13 Kaha vanehele vinjiho vamakuli, vambile ngwavo: “Ou mutu ali nakuhanjika lika mazu akusaula chino chihela chajila naJishimbi.
14 Chakutalilaho, tunamwivu mwamba ngwenyi ou Yesu wakuNazaleta mwakenyeka chihela chino nakwalumuna nawa vilika vize atuhanyine Mose.”
15 Vosena vaze vatwamine muSunendeline omu vamushishikile, vamwene kumeso enyi kwapwile nge kumeso akangelo.
Kwinyikila Chamwishi
^ Hela., “Kacheshi kuwaha.”
