Vilinga 8:1-40
8 Oloze Saulu avakundwijile mumuchima wenyi ngwenyi vajihe Setefwano.+
Jino halikumbi lize, vaputukile kuyanjisa chikuma chikungulwilo chize chapwile muYelusalema. Vosena valimwangilile kujingalila jaYuleya naSamaliya, kufumisako kaha vaposetolo.+
2 Ngocho malunga vaka-kulemesa Kalunga vambachile Setefwano nakumufunda, kaha vamulilile chikuma.
3 Jino Saulu aputukile kukinjila chikungulwilo naukenya. Apwilenga nakulukuka zuvo hizuvo, kaha akokangijilenga malunga namapwevo nakuvatwalatwala mukamenga.+
4 Oloze vaze valimwangile vatambwojokele mungalila yosena nakwambulula mazu amujimbu wamwaza.+
5 Jino Fwilipu ayile kunganda yaSamaliya+ nakuputuka kwambulila vatu vyaKulishitu.
6 Kaha mayongomena alinungile hamwe nakuhaka muchima kuvyuma apwile nakuhanjika Fwilipu omu vapwile nakwivwilila nakutala vinjikizo vize alingilenga.
7 Vatu vavavulu vapwile navashipilitu vavapi, ngocho ava vashipilitu vavapi vatambakanyinenga namazu akukanguka, kaha valovokelenga.+ Vaka-kalepa navitonji vavavulu nawa vavokile.
8 Kaha vatu vawahililile chikuma munganda yize.
9 Jino munganda yize mwapwile lunga umwe, lijina lyenyi ikiye Shimona, uze alingilenga visava vize vyakomweselenga muyachi wavaSamaliya. Alyambilenga ngwenyi apwile himutu umwe wamulemu.
10 Kaha vatu vamokomoko navava vavalemu vosena vahakilenga muchima kuvyuma ahanjikilenga nakwamba ngwavo: “Ou lunga ikiye vene Ngolo jaKalunga jize vavuluka ngwavo Ngolo Jajinene.”
11 Ngocho vahakilenga muchima kuvyuma ahanjikilenga hakuwana nge apwile nakuvakomwesa navisava vyenyi hatando yayisuku.
12 Oloze omu vamwitavilile Fwilipu uze apwile nakwambulula mujimbu wamwaza waWangana waKalunga,+ nawalijina lyaYesu Kulishitu, malunga namapwevo vavambapachishile.+
13 NaShimona nawa alumukile nakupwa muka-kwitava. Kahomu valingile hivanamumbapachisa lyehi, alikachilenga naFwilipu+ shimbu yosena. Kaha alikomokelelenga hakumona milimo yangolo chikuma navinjikizo vize vyapwilenga nakusoloka.
14 Kahomu vaposetolo vaze vapwile kuYelusalema vevwile ngwavo vaSamaliya vanetavila mazu aKalunga,+ vatumine Petulu naYowano vayenga kuli vakiko.
15 Vayileko, vavalombelele mangana vatambule shipilitu yajila.+
16 Mwomwo halwola luze shipilitu yajila yapwile kanda yichize hali mutu numba umwe hali vakikoko, oloze vavambapachishile mulijina lyaMwata Yesu kaha.+
17 Ngocho vavanangikile mavoko avo,+ kaha vaputukile kutambula shipilitu yajila.
18 Jino omu Shimona amwene vaposetolo vali nakuhana vatu shipilitu hakuvanangika mavoko, asakile ngwenyi avahane jimbongo.
19 Ambile ngwenyi: “Nayami nawa nguhanenuko ngolo kana mangana weshowo nangunangika mavoko ami ahase kutambula shipilitu yajila.”
20 Oloze Petulu ambile kuli ikiye ngwenyi: “Ojo jimbongo jove japalata jinongele kumwe nayove ivene, mwomwo unashinganyeka ngwove wana waKalunga wakanyombo unahase kuulanda najimbongo.+
21 Ove kaweshi nachazano chimwe chipwe chihanda mumulimo unoko, mwomwo muchima wove kawolokele kumeso aKalungako.
22 Shikaho pihilila nakwalumuka kuupi wove, mulembelele Yehova,* mangana nge chinahase, vakukonekele havishinganyeka vyavipi vili mumuchima wove.
23 Mwomwo ngunamono ngwami ove unyangwa yayisasu kaha nawa undungo kuvilinga vyakuhenga.”
24 Shimona ambile kuli vakiko ngwenyi: “Ngulembelelenuko kuli Yehova,* mangana havyumevi munavuluka hazeneke kunguwana chuma numba chimwe.”
25 Shikaho omu vakumishile kwambulula unjiho nakuhanjika mazu aYehova,* vakindulukile kuYelusalema. Kahomu vayilenga, vambulwilenga mujimbu wamwaza mumembo amavulu avaSamaliya.+
26 Oloze kangelo+ kaYehova* ahanjikile kuli Fwilipu ngwenyi: “Katuka, yako kusulo kujila yakufuma kuYelusalema nakuya kuNgaza.” (Eyi hijila yahita mupambo.)
27 Ngocho, akatukile nakuya, kaha aliwanyine nachilolo umwe wakaEchopa uze apwile nachihela chachinene muchiyulo chamwangana wapwevo Kandese wavaEchopa, kaha apwile nawa muka-kulama luheto lwosena lwamwangana. Ou lunga ayile kuYelusalema nakulemesa Kalunga,+
28 kaha apwile jino nakukinduluka oku natwame mulitemba lyenyi. Apwile nakutangila helu mukanda wakapolofweto Isaya.
29 Ngocho shipilitu yambile kuli Fwilipu ngwayo: “Yako upandame kulitemba kaneli.”
30 Fwilipu alahilile kusali yalitemba, kaha apwile nakumwivwa ali nakutangila helu mukanda wakapolofweto Isaya. Jino ambile ngwenyi: “Uno vyuma uli nakutanga unavitachikiza* tahi?”
31 Ikiye ambile ngwenyi: “Uno nanguhasa ngachilihi kuvitachikiza chakuzeneka mutu wakungulumbunwinavyo?” Ngocho alembelelele Fwilipu anyine mulitemba atwame nenyi.
32 Jino awa akiko mazu amuChisoneka aze apwile nakutangila helu: “Vamutwalile nge mukoko uze navatwala nakujiha, nge mwanamukoko uze naholo kulu kuli muka-kumuteula, ngocho naikiye kalokolwele mukanwa kenyiko.+
33 Halwola lwakumwinyisa, kavamuyulile mwaya chiyulo chakwolokako.+ Iya mwakahasa kulumbununa vyachisemunwino chenyi munona munona? Mwomwo kuyoya chenyi vanachifumisa hamavu.”+
34 Jino uze chilolo ambile kuli Fwilipu ngwenyi: “Ngunakukulembelela ungulweze, uno ou kapolofweto ali nakuvuluka iya? Ali nakulivuluka ivene tahi, nyi ali nakuvuluka mutu weka?”
35 Fwilipu aputukile kuhanjika. Aputukile nachisoneka chino kumwambulila mujimbu wamwaza waYesu.
36 Jino omu vapwile nakuya mujila, vahetele kuze kwapwile meya, kaha uze chilolo ambile ngwenyi: “Tala! Meya awa, chuma muka nachinguhonesa ami kungumbapachisa?”
37 *——
38 Ngocho uze chilolo ambile ngwenyi vemike litemba, kaha vosena vavali, Fwilipu nayauze chilolo, vashikumukile mumeya, kaha Fwilipu amumbapachishile.
39 Omu vafumine mumeya, shipilitu yaYehova* yafumishile Fwilipu kuze washiwashi, kaha uze chilolo kahashile kumumona chekako. Chipwe ngocho, atwalileho naungeji wenyi nakuwahilila.
40 Oloze Fwilipu akalovokelele kuAzotu, kaha ahichile mungalila yosena nakwambulula lika mujimbu wamwaza mujinganda josena palanga nomu akahetele kuKesaliya.+
Kwinyikila Chamwishi
^ Tala Chihande A5.
^ Tala Chihande A5.
^ Tala Chihande A5.
^ Tala Chihande A5.
^ Chipwe “vinakulumbunukila.”
^ Tala Chihande A3.
^ Tala Chihande A5.
