Vishimo 10:1-32
10 Evi vikiko vishimo vyaSolomone.+Mwana wamangana eji kwivwisanga ise kuwaha,+Oloze mwana wachiheu eji kwivwisanga naye chinyengo.
2 Luheto lwakuwanyina muvilinga vyakuhuka kalweshi kunganyalisako,Oloze vilinga vyakwoloka vyeji kupulululanga mutu kukufwa.+
3 Yehova keshi kukechelela muka-kwoloka* kufwa zalako,+Oloze mwakamina vaka-kuhuka vyuma vafwila.
4 Mavoko auvwa nawaneha uhutu,+Oloze mavoko akuzata nangolo nawaneha luheto.+
5 Mwana wakunangakana mwaha jimbuto hangonde yakwaha,Oloze mwana wachiheu mwasavala hangonde yakwaha.+
6 Hamutwe wamuka-kwoloka hali jikisu jajivulu,+Oloze kanwa kamuka-kuhuka nakasweka vishinganyeka vyaulyanyi.
7 Puho yamwaza yamuka-kwoloka nayimunehela jikisu,+Oloze lijina lyalipi lyamuka-kuhuka nalikatoka.+
8 Mutu wamuchima wamwaza mwetavila jishimbi,+Oloze ou mwahanjika vyauleya navakamulyatangila.+
9 Ou mwatambuka mukulonga, mwapwanga wakukingiwa,+Oloze ou mwatangisa jijila jenyi, navakamuwana.+
10 Ou mwanyachila vakwavo nameso mukulunguluka, mwakavayanjishisa,+Ou mwahanjika vyauleya navakamulyatangila.+
11 Kanwa kamuka-kwoloka kanapu kasulu kakuyoya,+Oloze kanwa kamuka-kuhuka nakasweka vishinganyeka vyaulyanyi.+
12 Vijindo vyeji kwepulanga vikokojola,Oloze zangi yeji kufwikanga jishili jajivulu.+
13 Mangana atwama kumivumbo yavaze vakwechi uhashi wakukekesa vyuma,+Oloze mungweji unapu wakuvetesa hanyima yavaze vazeneka mangana.*+
14 Vaka-mangana veji kulamanga chinyingi,+Oloze tunwa twavileya natuvatwala kukunonga.+
15 Vikumba vyamuka-luheto vinapu nge nganda yenyi yakujingulwisa nakembwe,Kaha chuma cheji kunongesanga vaka-kuhutwa shina uhutu wavo.+
16 Milimo yamuka-kwoloka yeji kutwalanga kukuyoya,Oloze vilinga vyamuka-kuhuka vyeji kutwalanga kushili.+
17 Ou mwetavila kumunangula napu jila yakutwala vakwavo kukuyoya,*Oloze ou mwakana kumuhanjikila mwahungumwisa vakwavo.
18 Ou mwasweka chijindo kumuchima wenyi napu muka-kwonga,+Kahou mwatanjisa lingwavo lyalipi napu chiheu.
19 Kuhanjika mazu amavulu nachilingisa mutu alimbenje,+Oloze weshowo mwakinga mivumbo yenyi napu wakuzangama.+
20 Lilimi lyamuka-kwoloka linapu nge palata yamwaza chikuma.+Oloze muchima wamuka-kuhuka unapu wamokomoko.
21 Mivumbo yamuka-kwoloka yeji kuhizumunanga* vavavulu,+Oloze vileya veji kufwanga hakuhona chavo mangana.+
22 Kukisula chaYehova chikiko cheji kuhetesanga mutu luheto,+Kaha keshi kuhakilako luyandoko.*
23 Kwazana muvilinga vyakwivwisa sonyi chinapu nge hikuhema kuli chileya,Oloze mangana ali kuli vaze vakwechi uhashi wakukekesa vyuma.+
24 Vyuma vevwila woma vaka-kuhuka navikavawana.Kaha vyuma vafwila vaka-kwoloka navakavahanavyo.+
25 Nge muze nyamanganda eji kukombanga vyuma, mukiko navakakomba namuka-kuhuka.+Oloze muka-kwoloka napu nge chihela chazuvo chakukola.+
26 Nge muze vinapu vinangele* kumazo, nawishi mumeso,Mukiko mwanapu namuvwa kuli kaka yenyi.*
27 Kumwivwa Yehova woma nachisuhwisa kuyoya chamutu,+Oloze myaka yamuka-kuhuka navakayikehesa.+
28 Vyuma atalilila muka-kwoloka vyeji kumwivwisanga kuwaha,+Oloze lutalililo lwamuka-kuhuka nalukanonga.+
29 Jijila jaYehova jinapu mukingo kuli muka-kulonga,+Oloze jinapu kunonga kuli vaka-kulinga vyuma vyavipi.+
30 Muka-kwoloka kaveshi kukamulimbulako.+Oloze muka-kuhuka keshi kukaswana lifuchiko.+
31 Kanwa kamuka-kwoloka keji kuhanjikanga vyamangana,*Oloze lilimi lyakuhanjika nakutangisa navakalitetako.
32 Mivumbo yamuka-kwoloka yatachikiza vyuma vyakwivwisa kuwaha,Oloze kanwa kamuka-kuhuka keji kutangisanga.
Kwinyikila Chamwishi
^ Chipwe “mwono wamuka-kwoloka.”
^ Hepe., “vazeneka muchima.”
^ Chipwe pamo, “ali mujila yakuya kukuyoya.”
^ Chipwe “kutwaminyinanga.”
^ Chipwe “ushonako; ukaluko.”
^ Vinangele vyapwa vyakunwa vingangamina vize vyafuminenga kuvinyo vyavisasu chipwe kuwala weka.
^ Chipwe “kuli uze amwingisa milimo.”
^ Chipwe “keji kwimanga mihako yamangana.”