Vishimo 14:1-35
14 Pwevo wamangana eji kutunganga zuvo yenyi,+Oloze pwevo wachileya eji kuyishiulanga namavoko enyi.
2 Muka-kutambuka mukusungama eji kwivwanga Yehova woma,Oloze mutu wajijila jakutangisa eji kulumbilisanga Kalunga.
3 Kuhanjika chachileya wakulivwimba chinapu nge chitondo chakuzangamisa nacho mutu,Oloze mivumbo yavaka-mangana yeji kuvakinganga.
4 Kuze kakweshi vangombeko muvizau mweji kupwanga mwapimbi,Oloze kuze kuli vangombe vavakuji vyakulya vyeji kuvulanga.
5 Chinjiho wakushishika keshi kwongako,Oloze chinjiho wamakuli eji kuhanjikanga vyakwonga.+
6 Muka-kutoleka eji kutondanga mangana, oloze keshi kuwawanako.Oloze muka-kunangakana eji kuwananga washi chinyingi.+
7 Lihende kuli chileya,Mwomwo kumivumbo yenyi kaweshi kuwanako chinyingiko.+
8 Mangana eji kulingisanga mutu wakuzangama atachikize jila yenyi,Oloze uleya waviheu weji kuvatangisanga.*+
9 Vileya veji kusehanga kachi nge vanapihisa,+Oloze vaka-kusungama veji kufwilanga kulikonekela.*
10 Muchima watachikiza kulyonyinga chawo,Kaha mutu weka keshi kuhasa kwazana mukuwahilila chawoko.
11 Zuvo yamuka-kuhuka navakayinongesa,+Oloze mbalaka yamuka-kusungama nayikelila.
12 Kuyili jila mwamona mutu ngwenyi yinasungama,+Oloze hakukuminyina nayimutwala kukufwa.+
13 Mutu nahase kuseha numba tuhu ali nakulyonyinga.Kaha nawa nahase kuwahilila oloze kutwala muze himwalishona.
14 Mutu wamuchima waupi mwaha vyavipi kujijila jenyi,+Oloze mutu wamwenemwene eji kwahanga vyuma vyamwaza kumilimo yenyi.+
15 Mutu wakuzeneka chinyingi eji kwitavilanga vyuma vyosena navamulweza,Oloze mutu wakuzangama eji kuhehwojolanga jijila jenyi josena.+
16 Mutu wamangana apwa wakuvanguluka kaha eji kusosolokanga kuupi,Oloze chiheu eji kulifwelelanga ivene nakulinga vyuma chamulingila.
17 Muka-kukwata washi matoto eji kulinganga mwauleya,+Kaha muka-kuhunanana havyuma* veji kumuhunganga.
18 Mutu wakuzeneka chinyingi mwakasolola uleya wenyi,Oloze vatu vakuzangama veji kupwanga nachinyingi.+
19 Vatu vavilinga vyavipi navakalifukula kuli vatu vavilinga vyamwaza,Kaha vaka-kuhuka navakeza kuvikolo nakulifukula kuvatu vakwoloka.
20 Chihutu veji kumuhunganga kuli vatu atunga navo,+Oloze muka-luheto atwama namasepa vavavulu.+
21 Ou mwalumbilisa mukwavo nalingi shili,Oloze ou mwatetela muka-kukalikiza mwawahililanga.+
22 Vaka-kutaka vyavipi veji kuhungumukanga,Oloze vatu veji kusolwelanga zangi yakwilila vaze vafwila kulinga mwamwaza nakushishika kuli vakiko.+
23 Kuzata nangolo cheji kunganyalisanga,Oloze kuhanjika kaha hakanwa cheji kutwalanga kukukalikiza.+
24 Muchama wavaka-mangana lukiko luheto lwavo.Oloze milimo yachileya nayimutwala cheka kuuleya wenyi.+
25 Chinjiho wamuchano eji kulwilanga myono yavatu,Oloze chinjiho wamakuli eji kuhanjikanga vyakwonga.
26 Ou amwivwa Yehova+ woma mwafwelelanga muli ikiye,Kaha vana vamutu kana navakawana kwakuchinyina.+
27 Kumwivwa Yehova woma chinapu kaselwoke kakuyoya,Kaha nachifumisa mutu kumiheto yakutwala kukufwa.
28 Ulemu wamwangana wapendamina hakuvula chavatu,+Oloze muka-kuyula wakuzeneka vatu, eji kupwanga wamokomoko.
29 Muka-kushipwokela kukwata utenu atwama nauhashi wakukekesa vyuma.+Oloze mutu wakandakundaku eji kusololanga uleya wenyi.+
30 Muchima wakuunda weji kunehanga kuyoya* kumujimba.Oloze lisungu linapu nge musongo wakupolesa vifuwa.+
31 Ou mwalyapula muka-kukalikiza ali nakutukana Tengi yenyi,+Oloze ou mwatetela vaka-kukalikiza ali nakwalisa Kalunga.+
32 Vilinga vyavipi vyamuka-kuhuka navikamwinyisa,Oloze kulonga chamuka-kwoloka nachikamukinga.+
33 Muchima wamuka-kunangakana weji kulamanga mangana,+Oloze viheu veji kutufulanga vyuma vize vanamono ngwavo vyamangana.
34 Kwoloka cheji kuzezulanga lifuchi helu,+Oloze shili yeji kusawisanga vatu.
35 Mwangana eji kwivwilanga kuwaha ngamba yenyi wakunangakana,+Oloze eji kupihilila namutu uze mwalinga vyuma vyakwivwisa sonyi.+
Kwinyikila Chamwishi
^ Chipwe pamo, “weji kutangisanga vakwavo.”
^ Chipwe “kufwilanga vyuma vyamwaza.”
^ Chipwe “Kaha mutu wauhashi wakushinganyeka.”
^ Chipwe “kulikangula.”
