Vishimo 16:1-33
16 Mutu eji kujinanga vyuma mumuchima wenyi,*Oloze Yehova ikiye eji kumulwezanga mwakukumbulwila.+
2 Mutu eji kumonanga jijila jenyi josena ngwenyi jinoloka,*+Oloze Yehova eji kukekesanga vishinganyeka* vyamutu.+
3 Vyeshovyo musaka kulinga vikunjike kuli Yehova,+Kaha vyuma unajinyi navifukila.
4 Yehova nalongesa vyuma vyosena mangana atesemo kujina chenyi,Navaka-kuhuka vakwechi likumbi lyavo lyaukalu.+
5 Mutu wamuchima wakulivwimba napu waunyengwe kumeso aYehova,+Kaha mutu kana navakamuzangamisa.
6 Mutu navamukonekela kuhenga chenyi hazangi yakwilila nakashishi,+Kaha kumwivwa Yehova woma cheji kupeulanga mutu kuupi.+
7 Nge Yehova nevwila jijila jamutu kuwaha,Kaha eji kulingisanga vaka-kole jamutu kana vatwame nenyi mukuunda.+
8 Chinawahe kupwa navyuma vyavindende oku uwakwoloka,+Kuhambakana kupwa naluheto lwaluvulu oku kaweshi nachiyuloko.+
9 Muchima wamutu weji kushinganyekanga jila yenyi,Oloze Yehova ikiye eji kwololanga jitambo jamutu kana.+
10 Kumivumbo yamwangana kupwenganga chiyulo chaKalunga.+Kaha mwangana kanda akahengesa chiyuloko.+
11 Vipezaliso navyesekelo vyakwoloka vyafuma kuli Yehova.Kaha malolwa akupezalisa osena amungonga anapu tengeso yenyi.+
12 Vilinga vyakuhenga vinapu vyaunyengwe kuli mwangana,+Oloze litanda veji kulizamisanga navilinga vyakwoloka.+
13 Kuhanjika mwakwoloka cheji kwivwisanga vamyangana kuwaha,Kaha vamyangana vazanga vaka-kuhanjika muchano.+
14 Kulundundu yamwangana yinapu nge kanganda wakuneha mujimbu wakufwa,+Oloze muka-mangana eji kuyiunjisanga.+
15 Kachi nge mwangana mwevwila mutu uselewa, mutu kana mwawahililanga,Uselewa wenyi unapu nge vula yakukuminyina.+
16 Kuheta mangana chinawahe kuhambakana ulu,+Kaha kuwana kunangakana chinawahe kuhambakana palata.+
17 Vaka-kusungama veji kulihendanga kujijila jajipi,Kaha mutu mwanyingilila jijila jenyi mwalama kuyoya* chenyi.+
18 Kulivwimba cheji kutwalanga kukulimbuka,Kaha muchima wakulitohwesa weji kuhukanyisanga mutu.+
19 Kupwa uwakulinyisa* havatu vavavwovu chinawahe,+Kuhambakana kulipangila vyuma vanapupu vaka-kulitohwesa.
20 Mutu uze anangakana muvyuma mwakafukila,Kaha mutu uze afwelela Yehova apwa wakuwahilila.
21 Mutu wamangana navakamuvuluka ngwavo anangakana,+Kaha muka-kuhanjika nalikoji* eji kukunyulanga vatu.+
22 Kunangakana chinapu nge kaselwoke kakuyoya kuli vaze vali nacho,Oloze uleya waviheu weji kuvazangamisanga vavene.
23 Muchima wamuka-mangana weji kulwezanga kanwa kenyi vyakuhanjika,+Nakumulingisa ahanjike nakukunyula.
24 Mazu amwaza anapu nge mwezu wakungenga,Ayekemena, kaha eji kukanga vifuwa.+
25 Kuyili jila mwamona mutu ngwenyi yinasungama,Oloze hakukuminyina nayimutwala kukufwa.+
26 Chipepa chakulya cheji kulingisanga mutu azate nangolo,Mwomwo zala* yikiko yeji kumuzondolanga.+
27 Kavihu eji kufulililanga vakwavo vyuma vyavipi,+Mazu enyi eji kwochanga nge kakahya.+
28 Kakulanganyi eji kunehesanga vikokojola,+Kaha muka-lusongi eji kuhandununanga vasepa namutu.+
29 Mutu waulyanyi eji kuzondolanga mukwavo muvatungila,Nakumutwala mujila yakuhenga.
30 Eji kukemwinakemwina mumeso enyi hakutaka vyuma vyavipi,Eji kusumanga kumazo enyi hakulinga vyuma vyakuhenga.
31 Jivwi jinapu muchama wamwaza,*+Kachi nge mutu mwajiwana mujila yakwoloka.+
32 Muka-kushipwokela kukwata utenu+ nawahe kuhambakana chindume,Kaha muka-kutulisa matoto* nawahe kuhambakana mutu uze nafungulula nganda.+
33 Katachikijilo veji kukalowelanga hatungi,+Oloze Yehova ikiye eji kuvatulanga chihande.+
Kwinyikila Chamwishi
^ Hepe., “Kuwahisa chamuchima chapwa chamutu.”
^ Hepe., “jinatomo.”
^ Hepe., “jishipilitu.”
^ Chipwe “mwono.”
^ Hepe., “Kupwa nashipilitu yakulinyisa.”
^ Chipwe “Kaha muka-kuhanjika mwamwaza.” Hepe., “Kaha kuyekemena chamivumbo.”
^ Hepe., “kanwa.”
^ Chipwe “waupahu.”
^ Hepe., “muka-kuyula shipilitu yenyi.”