Vishimo 17:1-28
17 Chinawahe kulya chihanda chambolo yaumu oku munatwame mukuunda,+Kuhambakana kulya vyakulya viyema* kuzuvo kuze kuli vikokojola.+
2 Ngamba wamangana mwakayula mwanakaka yenyi wachiheu,Kaha navakamuhanako luheto navana vakaka yenyi hamwe.
3 Ndeho yapwa yakutomeselamo palata, kaha lilungu lyapwa lyakuhehela ulu,+Oloze Yehova ikiye eji kukekesanga michima yavatu.+
4 Muka-kuhuka eji kwivwililanga kuhanjikiso yayipi,Kaha muka-kutangisa eji kwivwililanga kumazu amapi.+
5 Ou mwatoleka muka-kuhutwa ali nakutukana Muka-kumutenga,+Kahou mwawahilila hakuyanda chamukwavo navakamuzangamisa.+
6 Vazukulu vanapu muchama kuli vakulwane,Kaha visemi vanapu upahu kuli vana vavo.
7 Hanjikiso yakwoloka* kayatela chileyako,+Kaha hanjikiso yamakuli kayatela muka-kuyulako.*+
8 Wana unapu nge lilolwa lyandando* kuli mwenyawo,+Kweshokwo mwayanga vyuma navimuwahilanga.+
9 Weshowo mwakonekela* muka-kuzombwojoka jishimbi atwama nazangi.+Kahou mwatokomenya lika hachihande mwahandununa vasepa namutu.+
10 Kutenukila mutu wakunangakana nachimukafwa,+Kuhambakana kuveta chiheu mapapa 100.+
11 Mutu wavilinga vyavipi afwila kulikanga,Kaha navamutumina kanganda wakuhuka mangana akamuzangamise.+
12 Chinawahe kuliwana naulusu vanatambula vana venyi,Kuhambakana kuliwana nachileya uze mwalinga vyuma vyauleya.+
13 Kachi nge mutu mwalinga mwamupi kuli uze namulingi mwamwaza,Kaha upi kaweshi kukafuma kuzuvo yenyiko.+
14 Kuputuka chandombo chinapu nge kusokolola vikolo vyameya.*Shimbu kanda vikokojola vyepuke, katuka uyenga.+
15 Ou mwasambisa muka-kuhuka nayou nawa mwapayisa muka-kwoloka,+Vosena vanapu vaunyengwe kumeso aYehova.
16 Kachi nge chiheu ali najila yakuwanyinamo mangana,Oloze ikiye keshi namuchima wakuwawanako, kaha nachimukafwa ikaze?+
17 Sepa wamwenemwene eji kuzanganga sepa lyenyi shimbu yosena,+Kaha napu nge hindumbwenyi uze mwamukafwa mulwola lwavihuli.+
18 Mutu wakuhona mangana* eji kwitavilanga kufwetela mukuli mukwavo,Nakuhana chijikilo chenyi hameso amukwavo atunga nenyi.+
19 Ou azanga vikokojola azanga milonga,+Kahou mwalundula chikolo chenyi helu ali nakulikokela ukalu.+
20 Mutu wamuchima wakutangisa keshi kukafukilako,+Kaha muka-kuhanjika makuli mwakanonga.
21 Ou mwasema chiheu mwakalyonyinga.Kaha ise yachileya keshi kuwahililako.+
22 Muchima wakuwahilila unapu nge vitumbo vyamwaza,+Oloze muchima wakuhomba weji kukumisanga ngolo jamutu.*+
23 Muka-kuhuka eji kutambulanga maswekeza kupenge,*Mangana atangise chiyulo chakwoloka.+
24 Muka-kunangakana atwama namangana,Oloze meso aviheu eji kutalanga chamutalila.+
25 Mwana wachiheu eji kwivwisanga ise chinyengo,Kaha eji kulingisanga ou amusemene alyonyinge.*+
26 Kachapwa chamwaza kuzangamisa* muka-kwolokako,Kaha nawa kachapwa chakwoloka kuveta vatu vavalemuko.
27 Mutu wachinyingi keshi kulusuka kuhanjika mazu enyiko,+Kaha mutu wakunangakana eji kuholanga kulu.+
28 Chileya uze mwahola kulu vanahase kumumona ngwavo wamangana.Kahou mwafwika mivumbo yenyi navamumona kupwa wakunangakana.*
Kwinyikila Chamwishi
^ Hepe., “kulya vimuna vakuvatula.”
^ Chipwe “yamwaza.”
^ Chipwe “kayatela mutu wamulemuko.”
^ Chipwe “lilolwa lize nalineha uselewa.”
^ Hepe., “mwafwika.”
^ Chipwe “nge kusokolola chijiva.” Hepe., “nge kwecha meya ahite.”
^ Hepe., “wakuhona muchima.”
^ Chipwe “weji kumisanga vifuwa.”
^ Hepe., “maswekeza akufuma hatulo.”
^ Hepe., “evwenga kusasa.”
^ Chipwe “kukukisa.”
^ Hepe., “kupwa nashipilitu yakuunda.”
