Vishimo 25:1-28
25 Evi vikiko nawa vishimo vyaSolomone+ vize vanungulwile vatu jaHezekiya,+ mwangana wavaYuta:
2 Kusweka vyuma chinapu ulemu waKalunga,+Kaha kuhehwojola vihande chinapu ulemu wavamyangana.
3 Nge omu ajindama melu, nomu akunama mavu,Mukiko yinapu namichima yavamyangana, yapwa yayikalu kuhehwojola.
4 Fumisa vizozo kupalata,Kaha nayipwa yakutomesa kanawa.+
5 Fumisa muka-kuhuka kumeso amwangana,Kaha litanda lyamwangana nalizama mukwoloka.+
6 Kanda naulitohwesa ove ivene kumeso amwanganako,+Kaha kanda nautwama hali vatu vavalemuko,+
7 Mwomwo chinawahe akwambe ngwenyi: “Twaya kuno,”Kuhambakana akusawise hameso avatu vavalemu.+
8 Kanda mulusuka kutwala chihande kuzangoko,Mwomwo mukalinga ngachilihi nge mukwenu mwakakupayisa?+
9 Shimutwila chihande chove namukwenu,+Oloze kanda wambulula vyuma vyakusweka nakulweze mukwenuko,+
10 Mangana uze mwevwako azeneke kukusawisa,Kaha vyuma vyavipi* unambulula navitanda lika.
11 Nge omu jawaha jiapo jaulu mulilonga lyapalataMukiko anapu namazu akuhanjika halwola lwakutamo.+
12 Ngana omu twawaha tupata twaulu twakumatwitwi, navimbilingwa vyaulu wamwaza,Mukiko mwanapu namutu wamangana uze mwahanjikila muka-kwivwilila.+
13 Nge omu awaha meya atuta* hangonde yakwahaMukiko mwanapu nakanganda wakushishika kuli uze namutumu,Mwomwo eji kusuulwisanga mwata wenyi.*+
14 Ngana omu anapu mavwi napeho yakuzeneka kuneha vula,Mukiko mwanapu namutu mwalitukwojola hawana uze kanda ahane.*+
15 Kutalilila chikoki nachikunyula kapitau wajita,Kaha lilimi lyalivwovu nalihokola chifuwa.+
16 Kachi nge unawane uchi, lyako kaha wamweseke,Nge mulya wauvulu, unahase kuusaza.+
17 Kanda nauyanga kuzuvo yamukwenu mwakamwihi mwakamwihiko,Kuchina mwakusekesa nakukuhunga.
18 Chinjiho wamakuli uze mwapayisa mukwavo,+Napu nge mbwechi yakuzungisa kujita, napoko yamukwale, namwivwi wakuvambuka.
19 Nganomu lyapwa lizo lyakupukuka chipwe lihinji lyakutenguka,Mukiko chinapu nakufwelela muka-kutangisa* halwola lwaluyando.
20 Nge omu mutu mwazula uvwalo wenyi okunyi kunatutu,Nomu mutu mwechila vinangele hasotaMukiko mwanapu nayou mwembila mutu uze napihilila.+
21 Nge muka-kole wove* nevu zala, muhane vyakulya alyenga,Nge nevu lipwila, muhane meya anwenga.+
22 Mwomwo uli nakulunjika makala akakahya hamutwe wenyi,*+Kaha Yehova mwakakufweta.
23 Peho yakunote yeji kunehanga vula yayinene,Kaha muka-kuyongola eji kwivwisanga vakwavo kupihya.+
24 Chinawahe kutwama hamulungu wazuvo,Kuhambakana kutwama muzuvo yimwe napwevo wavikokojola.*+
25 Nge omu meya atuta nawahizumuna mutu nazeye,Mukiko unapu namujimbu wamwaza wakufuma kulifuchi lyakwakusuku.+
26 Muka-kwoloka uze mwalyononona kuli muka-kuhukaNapu nge kaselwoke vanapihisa naulova, nalishima lize vanenyeka.
27 Kachapwa chamwaza kulya uchi wauvuluko,+Kaha ulemu wakulitondela mutu ivene kawapwa ulemuko.+
28 Nganomu yinapu nganda yikwechi kembwe yakupuzuka,Mukiko mwanapu namutu uze mwahona kuunjisa matoto enyi.*+
Kwinyikila Chamwishi
^ Chipwe “Kaha puho yayipi.”
^ Hepe., “meya akulikonda.”
^ Chipwe “kusuulwisanga mwono wamwata wenyi.”
^ Hepe., “hawana wakulyonga.”
^ Chipwe pamo, “muka-kumbembejeka.”
^ Hepe., “mutu uze akuhunga.”
^ Kulumbununa, kuvwovuwisa muchima wamutu nakutulisa matoto enyi.
^ Chipwe “wakwivwisa chipekete.”
^ Chipwe “uze mwazeneka kukanyisa shipilitu yenyi.”