Vishimo 7:1-27
7 Ove mwanami, lamanga mazu ami,Itavila jishimbi jami.+
2 Lamanga jishimbi jami mangana uyoyenga,+Lamanga jindongi* jami kwijiva nge katutu kahaliso lyove.
3 Vikashilile kuminwe yove,Visoneke mumuchima wove.+
4 Lweza mangana ngwove: “Ove undumbwami.”Vuluka kunangakana ngwove, “kausoko kami,”
5 Mangana vikukinge kuli pwevo wakulumbuka,*+Kuli pwevo muka-ujila* nakuhanjikiso yenyi yakuleleveka.*+
6 Omu ngwatalile munjanena,Omu ngwatalile mumbelo yahazuvo yami,
7 Ngwamwene vakweze vakuzeneka chinyingi,Hakachi kavo nawa ngwamweneho mukweze walunga, wakuzeneka mangana.*+
8 Apwile nakuhita mujila kwakamwihi namakanyiko atwaminenga pwevo muka-ujila,Kaha ayile mujila yize yatala kuzuvo yayauze pwevo,
9 Hakajimbavenyi, omu lyalaukile likumbi,+Omu kwalingile hikunatoko lyehi, muze wi.
10 Jino ngwamwene pwevo uze amuhumanganyine,Avwalile nge omu eji kuvwalanga* muka-ujila,+ kaha apwile namuchima wakutangisa.
11 Ikiye muka-kundonda, muka-kulikanga.+Keshi* kutwamisa hazuvoko.
12 Lelo ali kujijila, hamene ali kuvihela vyasanga,Eji kuswamanga kumakanyiko ajijila.+
13 Kaha akwachile uze mukweze walunga nakumusweswenya.Ahamukile nakumulweza ngwenyi:
14 “Lelo ngunahane mawana akusolola kuunda.+Ngunatesamo jishiko jami.
15 Shikaho ngwejilanga kuno mangana ngukuhumangane,Ngukutondetonde, kaha ngunakuwane.
16 Hakahela kami ngunaleho lyehi mahina amwaza,Mahina aulombo wamwaza akuEjipitu.+
17 Ngunasapwilaho lyehi mila, namalowe, nakinamone.+
18 Tuyenga tuvatule lipwila lyetu nazangi palanga nomu nakucha,Tulivwise kuwaha zangi yetu.
19 Mwomwo lunga lyami keshi hazuvoko.Nayi ungeji wausuku.
20 Nambate nanjeke yenyi yajimbongo,Keshi kukinduluka washiko kuvanga kakweji nalovoka wosena wamuundu.”
21 Kaha ahungumwishile uze mukweze walunga namazu enyi akukunyula.+Amutangishile nahanjikiso yenyi yakuleleveka.
22 Kukasumuka uze lunga himwakava uze pwevo nge ngombe uze navaya nakujiha,Nge chileya uze navatwala mangana vamuzangamise mujikuli,*+
23 Palanga nomu mwivwi nautuva kulisuli lyenyi.Katachikijileko ngwenyi mwatokesamo mwono wenyi,+ nge muze kajila mwalahila mumuheto chakuzeneka kutachikiza.
24 Shikaho enu vana vami, ngwivwililenu,Hakenu mangana kumazu ami nanguhanjika.
25 Michima yenu kanda nayipyapumuka nakukava jijila jenyiko.Kanda namutambuka mujijila jenyiko.+
26 Mwomwo nahichikisamo vatu vavavulu,+Kaha vaze najihisa vanavulu chikuma.+
27 Kwingila muzuvo yenyi nachitwala mutu kuFuka.*Nachitwala kutupete vakufwa.
Kwinyikila Chamwishi
^ Chipwe “jishimbi.”
^ Chipwe “yakuhungumwisa.”
^ Hepe., “wakuzeneka muchima.”
^ Chipwe “Avwalile uvwalo.”
^ Hepe., “Mahinji enyi kaweshi.”
^ Chipwe “mumalenge.”
^ Chipwe “kuSheyole,” kulumbununa fuka yavatu vosena. Tala Mukana waMazu.
