VyavaLevi 1:1-17
-
Wana wakulumba (1-17)
1 Yehova asanyikile Mose nakuhanjika nenyi mumbalaka yakuliwanyina+ ngwenyi:
2 “Hanjika kuli vaIsalele* ngwove, ‘Kachi nge mutu umwe hali enu mwahana wana kuli Yehova wavimuna jenyi, kaha ahane ngombe, chipwe mukoko, chipwe pembe.+
3 “‘Nge mwahana ngombe kupwa wana wakulumba, kaha uze ngombe apwenga walambwe.+ Ahane wana kana namuchima wakusuuluka+ kuli Yehova kuchikolo chambalaka yakuliwanyina.
4 Akanangike mavoko enyi hamutwe wayauze ngombe mwakahana kupwa wana wakulumba, kaha Kalunga mwaketavila uze wana wangombe mangana vakamulingile chakufwika hashili.
5 “‘Uze mwanangombe wakuji vakamujihe kumeso aYehova, kaha vapilishitu+ vana vaAlone, vakambate aze manyinga nakuwasapwila kujihachi josena jalijiko lyakulumbila+ lize lili kuchikolo chambalaka yakuliwanyina.
6 Kaha uze ngombe navakahana kupwa wana wakulumba vakamuve nakumuteta muvipuka.+
7 Kaha vapilishitu vana vaAlone, vakahake kakahya halijiko lyakulumbila+ nakuhakaho jikunyi.
8 Kaha vapilishitu vana vaAlone, vakambate vize vipuka, namutwe, namaji,* nakuvihaka hakakahya kaze kali halijiko lyakulumbila.+
9 Mijingwa namikono yauze chimuna vakayikose nameya, kaha kapilishitu akayoche yosena halijiko lyakulumbila mangana yikakakumuke wishi. Unapu wana wakulumba, wakwocha hakakahya walivumba lyalupengopengo* kuli Yehova.+
10 “‘Kachi nge mwahana wana wakuvimuna jenyi kupwa wana wakulumba,+ numba apwa mwanamukoko wachizamba, chipwe pembe, uze chimuna akapwe walambwe.+
11 Uze chimuna vakamujihile kunote yalijiko lyakulumbila, kumeso aYehova. Kaha vapilishitu vana vaAlone, vakambate aze manyinga nakuwasapwila kujihachi jalijiko lyakulumbila josena.+
12 Uze chimuna vakamutete muvipuka, kaha kapilishitu akambate vize vipuka, namutwe, namaji,* akavihake hakakahya kaze kali halijiko lyakulumbila.
13 Akakose mijingwa namikono yauze chimuna nameya, kaha kapilishitu akayilumbe yosena halijiko lyakulumbila mangana yikakakumuke wishi. Unapu wana wakulumba, wakwocha hakakahya walivumba lyalupengopengo* kuli Yehova.
14 “‘Oloze nge mwakahana tujila kupwa wana wakulumba kuli Yehova, kaha akahane wana wenyi watutela chipwe wavana vatukwilimba.+
15 Kaha kapilishitu akavatule mutwe wayauze kajila nakumulumba halijiko lyakulumbila mangana akakakumuke wishi. Oloze manyinga ayauze kajila akawazuzulwile kusali yalijiko lyakulumbila.
16 Akafumise lishakushaku namangona nakuvimbila kusali yalijiko lyakulumbila kumututuko, kuze kwakumwangila uto.*+
17 Akamupule oku livava, oku livava. Kaha kapilishitu akamulumbe hakakahya kaze kali halijiko lyakulumbila mangana akakakumuke wishi. Unapu wana wakulumba, wakwocha hakakahya walivumba lyalupengopengo* kuli Yehova.
Kwinyikila Chamwishi
^ Hepe., “vana vaIsalele.”
^ Chipwe “namaji akujiso.”
^ Chipwe “lyakusuulwisa; lyakwivwisa kuwaha.”
^ Chipwe “namaji akujiso.”
^ Chipwe “lyakusuulwisa; lyakwivwisa kuwaha.”
^ Chipwe “uto wamaji,” kulumbununa uto uze wazovele namaji avimuna vakuvatula.
^ Chipwe “lyakusuulwisa; lyakwivwisa kuwaha.”
