VyavaLevi 10:1-20
10 Jino Natave naAvihu,+ vana vaAlone, vambachile mutu himutu kalilonga kakukwachila kakahya nakuhakaho kakahya navyuma vyalivumba lyamwaza.+ Kaha vanehele kakahya kumeso aYehova kaze kavetavishileko,+ chuma chize kavalwezele kulingako.
2 Kuli Yehova kwafumine kakahya nakuvanongesa,+ kaha vafwililile kumeso aYehova.+
3 Jino Mose ambile kuli Alone ngwenyi: “Yehova nambe ngwenyi, ‘Nangupwa nguwajila havatu vaze vanapandama kuli ami,+ kaha navangutohwesa kumeso avatu vosena.’” Ngocho Alone aholele kulu.
4 Jino Mose asanyikile Mishayele naElezafwane vana vaUjiyele+ ise yaAlone wakanyike, kaha ambile kuli vakiko ngwenyi: “Twayenu mufumise mijimba yavandumbwenu kulutwe lwachihela chajila, muvatwale kusali yachilombo.”
5 Kaha vejile, vambachile vaze vivimbi oku vali muvikuto vyavo nakuvatwala kusali yachilombo, ngana muze avalwezele Mose.
6 Jino Mose ambile kuli Alone nakuli vana venyi, vaEleyaza naItamale ngwenyi: “Kanda namutwama nalipupe kumitwe yenu chipwe kupula uvwalo wenuko,+ kuchina namufwa, kuchina Kalunga mwapihilila nalizavu lyosena. Vandumbwenu vakuzuvo yaIsalele vosena navalila vaze najihi Yehova hakuvocha nakakahya.
7 Kanda namufuma kuchikolo chambalaka yakuliwanyinako kuchina namufwa, mwomwo maji aYehova akuwavisa ali hali enu.”+ Ngocho valingile ngana muze avalwezele Mose.
8 Yehova ambile kuli Alone ngwenyi:
9 “Ove navana vove kanda namukanwanga vinyo chipwe wala wausasu omu namukengilanga mumbalaka yakuliwanyinako+ kuchina namukafwa. Elu lukiko lushimbi namukakavangizanga myaka namyaka muvisemunwino vyenu vyosena.
10 Echi nachikamikafwa mukahandunune vyuma vyajila navyevi vyasanga, navyuma vyavipi navyevi vitoma.+
11 Nachikamikafwa nawa kunangula vaIsalele jishimbi josena jize avahanyine Yehova kuhichila muli Mose.”+
12 Kaha Mose ambile kuli Alone nakuli vana venyi vaze vasalileho, vaEleyaza naItamale ngwenyi: “Mbatenu wana wamanona uze unasaleho kuwana waYehova wakwocha hakakahya, muulye wakuzeneka chimbalwila kulijiko lyakulumbila,+ mwomwo unapu wana wajila chikuma.+
13 Muulile muchihela chajila+ mwomwo unapu chazano chove navana vove vamalunga chakuwana waYehova wakwocha hakakahya. Omu mukiko vanangulweze.
14 Pambo yawana wakuhungisa nalihinji lyachazano chajila nawa muvilile muchihela chitoma+ navana venu vamalunga, navava vamapwevo,+ mwomwo vanakuhanevyo kupwa chazano chove navana vove vamalunga chakumawana akusolola kuunda avaIsalele.
15 Kaha lihinji lyachazano chajila, napambo yawana wakuhungisa, vavinehe namawana amaji akwocha hakakahya mangana vavihungise noku noku kupwa wana wakuhungisa kumeso aYehova. Kaha navipwanga chazano chove navana vove vamalunga myaka namyaka+ ngana muze nambe Yehova.”
16 Mose atondeletondele uze pembe wawana wahashili,+ oloze awanyine vanamulumbu lyehi. Ngocho atenukilile Eleyaza naItamale, vana vaAlone vaze vasalileho, ngwenyi:
17 “Ika munahonena kulila wana wahashili muchihela chajila?+ Ou wana unapu wajila chikuma, vamihanangawo mangana mumbate kuhenga chalizavu, muvalingile chakufwika hashili kumeso aYehova.
18 Talenu! Manyinga ayou chimuna kavawengishile muchihela chajilako.+ Mwatelanga kulila chimuna kanou muchihela chajila ngana muze vangulwezanga.”
19 Alone ambile kuli Mose ngwenyi: “Tala! Likumbi lyalelo vananguhane wana wavo wahashili nawana wavo wakulumba kumeso aYehova+ chamokomoko navyumevi vinasoloka kuli ami. Kachi nge lelo ngwalyanga wana wahashili, kutala Yehova kachi nevu kuwaha tahi?”
20 Omu Mose evwile ngocho, asuulukile.
