VyavaLevi 11:1-47
-
Tunyama vatoma navava vavapi (1-47)
11 Jino Yehova ambile kuli Mose naAlone ngwenyi:
2 “Lwezenu vaIsalele ngwenu, ‘Ava vakiko tunyama vahamavu vaze munahase kulya:+
3 Weshowo kanyama wajisende jakuchangunuka jakupula mukachi, uze eji kuukulanga nakutafunya cheka, munahase tuhu kumulya.
4 “‘Kanda namukalya tunyama vaze veji kuukulanga nakutafunya chekako, chipwe vaze vakuchangunuka jisendeko. Tunyama kana shina: ngamela mwomwo eji kuukulanga nakutafunya cheka, oloze katwama najisende jakuchangunukako. Kanyama kana napu wamupi kuli enu.+
5 Naseji-mutumba+ mwomwo eji kuukulanga nakutafunya cheka, oloze katwama najisende jakuchangunukako. Kanyama kana napu wamupi kuli enu.
6 Nambwanda mwomwo eji kuukulanga nakutafunya cheka, oloze katwama najisende jakuchangunukako. Kanyama kana napu wamupi kuli enu.
7 Nangulu+ mwomwo keshi kuukula nakutafunya chekako, numba tuhu atwama najisende jakuchangunuka, jakupula mukachi. Kanyama kana napu wamupi kuli enu.
8 Kanda namukalya nyama yavo chipwe kukwata mijimba yavo yakufwako. Vanapu vavapi kuli enu.+
9 “‘Vino vikiko vyuma vyakuyoya vyamumeya vize munahase kulya: Cheshocho chuma chakuyoya chamumeya chize chili navitendo namavanda, numba chipwa mutulungalwiji chipwe mutulwiji munahase kulya tuhu.+
10 Oloze vyeshovyo vyakutambuka mumayongomena vyamumeya, navyuma vyeka vyakuyoya vyamumeya, numba vipwa mukalungalwiji chipwe mukalwiji, vize kavyeshi navitendo namavandako vinapu vyaunyengwe kuli enu.
11 Vinapu chikupu vyaunyengwe kuli enu. Kanda namukalya nyama yavyoko,+ kaha mijimba yavyo yakufwa nawa kayimonenu kupwa yaunyengwe.
12 Vyeshovyo vyuma vyakuyoya vyamumeya vize kavyeshi navitendo namavandako vinapu vyaunyengwe kuli enu.
13 “‘Evi vikiko vyuma vyakutuka mwilu vize mwatela kumona kupwa vyaunyengwe vize kamwatela kulyako: ngonga,+ nakwaze, nakumumu,+
14 naviselele mwaya miyachi yavo,
15 namakololo mwaya miyachi yavo,
16 nanyamalanda, natule, nakahuluwiji, natumbembe mwaya miyachi yavo,
17 nakapongesa, nakombwe, nachikungulu,
18 nalishishi, nalimbondo, nalikuvi,
19 nandalangimbu, navanyange mwaya miyachi yavo, napepetenu, nachinguzu.
20 Vyeshovyo vyuma vyamavava* vyamahinji awana vize vyeji kutambukanga mumayongomena vinapu vyaunyengwe kuli enu.
21 “‘Kuvyuma vyamavava vyamahinji awana vize vyeji kutambukanga mumayongomena munahase kulyako kaha vize vikwechi mahinji amasuku akumbotokesa nawo hamavu.
22 Evi vikiko vyuma vikwavo munahase kulya: vambimba makumbi mwaya miyachi yavo,+ navasamuyandulu, natuzeze, namavongolo.
23 Oloze vyuma vyeka vyamavava vyamahinji awana vize vyeji kutambukanga mumayongomena vinapu vyaunyengwe kuli enu.
24 Kachi nge namulya vyuma kanevi namupihya. Weshowo mwakwata mijimba yavyo yakufwa mwapihya palanga nakuchingoloshi.+
25 Weshowo mwambata mijimba yavyo yakufwa akose uvwalo wenyi,+ oloze mwapihya palanga nakuchingoloshi.
26 “‘Tunyama vosena vajisende jakuchangunuka, jakuzeneka kupula mukachi, vaze kaveshi kuukula nakutafunya chekako, vanapu vavapi kuli enu. Weshowo mwavakwata mwapihya.+
27 Tunyama vamafumbo vaze veji kutambukilanga hamahinji avo awana vanapu vavapi kuli enu. Weshowo mwakwata mijimba yavo yakufwa mwapihya palanga nakuchingoloshi.
28 Weshowo mwambata mijimba yavo yakufwa akose uvwalo wenyi,+ oloze mwapihya palanga nakuchingoloshi.+ Vanapu vavapi kuli enu.
29 “‘Evi vikiko vyuma vyakuhalala hamavu vize vinapu vyavipi kuli enu: kambamba, natumbi,+ namisulu mwaya miyachi yavo,
30 nandalakatomba, namusevu, nachikwa-chamukala, nachitombwe, nalyongono.
31 Vyuma kanevi vyakuhalala hamavu vinapu vyavipi kuli enu.+ Weshowo mwakwata mijimba yavyo yakufwa mwapihya palanga nakuchingoloshi.+
32 “‘Kachi nge chuma kanechi chakuhalala nachifwa nakuholokela hachinoma chimwe chamutondo, chipwe hauvwalo, chipwe halilambu, chipwe hachikeleyi, chuma kana nachipihya. Cheshocho chinoma veji kuzachisanga milimo kuvanga vachihake mumeya, oloze nachipihya palanga nakuchingoloshi numbanyi chitome.
33 Kachi nge nachiholokela hachitenga chauma, kaha chitenga kana muchichike. Vyeshovyo vyapwanga muze muchitenga navipihya.+
34 Kachi nge meya amuze muchitenga chauma nawamwangilikila havyakulya, vyakulya kana navipihya. Vyeshovyo vyakunwa vili muchitenga kana navipihya.
35 Cheshocho nahaholokela mujimba wachuma chakuhalala chakufwa nachipihya. Kachi nge nauholokela hafwolonyi, chipwe halijiko lyauma lyakutelekela, kaha vavichike chikichiki. Vyuma kana vinapihi, kaha navipwanga lika vyavipi kuli enu.
36 Oloze nge nauholokela mukaselwoke kameya chipwe mulishima lyameya, vikiko navipwa lika vitoma. Oloze weshowo mwakwata mujimba wachuma chakuhalala chakufwa mwapihya.
37 Nge mujimba wachuma kana nauholokela halinona lyambuto lize navasaka kutumba, kaha linona kana nalipwa lika litoma.
38 Oloze nge nauholokela halinona lize linazovo nameya, kaha linona kana linapihi kuli enu.
39 “‘Kachi nge kanyama uze veji kulyanga nafu, weshowo mwamukwata mwapihya palanga nakuchingoloshi.+
40 Weshowo mwalya nyama yenyi akose uvwalo wenyi, oloze mwapihya palanga nakuchingoloshi.+ Weshowo nawa mwambata kanyama kana akose uvwalo wenyi, oloze mwapihya palanga nakuchingoloshi.
41 Vyuma vyakutambuka mumayongomena vyahamavu vinapu vyaunyengwe.+ Kanda namukavilyako.
42 Kanda namukalya vyuma vize vyeji kutambukilanga hamajimo avyoko, navize vyakutambukila hamahinji avyo awana, chipwe vize vyamahinji amavulu vyakuhalala hamavu, mwomwo vinapu vyaunyengwe.+
43 Kanda namukalilingisa kupwa muvaunyengwe navyuma vyakuhalala hamavuko. Kanda namukalijilulula nakulipihisa navyoko.+
44 Mwomwo ami yami Yehova Kalunga kenu.+ Lijilikenu mupwenga mwajila+ mwomwo ami ngwajila.+ Shikaho kanda namulipihisa navyuma vyakuhalala hamavuko.
45 Mwomwo ami yami Yehova uze namilovola mulifuchi lyaEjipitu mangana ngulisolole kupwa nguKalunga kenu.+ Pwenunga mwajila+ mwomwo ami ngwajila.+
46 “‘Eji jikiko jishimbi jakupandama kutunyama, nakuvyuma vyakutuka mwilu, nakuvyuma* vyakuyoya vize vyeji kutambukanga mumeya, nakuvyuma* vyosena vize vyeji kuhalalanga hamavu,
47 mangana jikamikafwe kuhandununa vyuma vyavipi navyevi vitoma, navyuma vyakuyoya vize munahase kulya navize kamwatela kulyako.’”+
