VyavaLevi 13:1-59
13 Yehova ahanjikile lika kuli Mose naAlone ngwenyi:
2 “Kachi nge mutu ali nachijimbo, chipwe livanda, chipwe lipenga, vize vinahase kupwa mbumba*+ hachikova chenyi,* mutu kana vakamunehe kuli kapilishitu Alone, chipwe kuli mwanenyi umwe uze apwa kapilishitu.+
3 Kapilishitu akakekese musongo uze uli hachikova chenyi. Nge ungona wahachikova chize chili namusongo unalumuka kupwa utoma, kaha nawa hanafuwuka, musongo kana unapu mbumba. Kapilishitu akakekese uze musongo, kaha akamuvilike ngwenyi napihi.
4 Oloze nge lipenga lyahachikova chenyi linapu litoma, kaha nawa kalyafuwukileko, uze ungona nawa kawalumukile kupwa utomako, kapilishitu amuhandule kuvakwavo hamakumbi 7.+
5 Kapilishitu akamukekese cheka halikumbi lyakusokesa 7. Nge mwamona ngwenyi musongo kana unalengalala, kaha nawa kawatanjile hachikovako, uze kapilishitu akamuhandule hamakumbi akwavo 7.
6 “Kapilishitu akamukekese cheka halikumbi lyakusokesa 7. Nge uze musongo unalengalala, kawatanjile hachikovako, kaha kapilishitu akamuvilike ngwenyi natomo,+ mwomwo lyapwanga kaha livanda. Uze mutu akakose uvwalo wenyi, kaha mwakatoma.
7 Oloze nge lize livanda* nalitotowela omu mwalinga hanafumu lyehi kuli kapilishitu kuze ayanga mangana amone numba nge natomo, kaha akakinduluke cheka* kuli kapilishitu.
8 Uze kapilishitu akakekese lize livanda. Kachi nge mwakamona ngwenyi linatotowela, akamuvilike ngwenyi napihi. Musongo kana unapu mbumba.+
9 “Kachi nge mutu ali namusongo wambumba, kaha vakamutwale kuli kapilishitu.
10 Kapilishitu akamukekese.+ Nge hachikova chenyi hali chijimbo chitoma, kaha chinalumuna ungona kupwa utoma, kaha nawa haze hachijimbo+ hali mbandu,
11 musongo kana unapu mbumba yinashimbula hachikova chenyi. Ngocho uze kapilishitu akamuvilike ngwenyi napihi. Kanda akamuhandula+ kuli vakwavoko mwomwo napihi.
12 Jino nge mbumba yinasoloka hachikova chosena, yinatande mujimba wosena kufuma kumutwe swi nakuvilyachilo kweseka nakumona chakapilishitu,
13 kaha nawa namukekesa nakumona ngwenyi yize mbumba yinatande chikova chosena, akamuvilike ngwenyi natomo kumusongo wenyi. Mwomwo chikova chosena chinalumuka kupwa chitoma, ngocho uze mutu natomo.
14 Oloze nge hachikova chenyi nahapwa mbandu, kaha napihi.
15 Omu kapilishitu mwamona yize mbandu, amuvilike ngwenyi napihi.+ Mbandu yenyi yinapihi, yinapu mbumba.+
16 Mokomoko, nge haze hambandu nahatoma to, uze mutu akaye kuli kapilishitu.
17 Kaha kapilishitu akamukekese.+ Kachi nge mwakamona ngwenyi hambandu yenyi hanatomo, kaha akamuvilike ngwenyi natomo.
18 “Kachi nge mutu mwapwa nalihute, kahomu nalikanguka,
19 haze hapwanga lize lihute hinahapwa chijimbo chitoma chipwe lipenga lichiluluka, mutu kana akaye nakulisolola ivene kuli kapilishitu.
20 Uze kapilishitu akakekeseho,+ kaha nge mwakamona ngwenyi hanafuwuka, ungona uliho nawa unalumuka kupwa utoma, uze kapilishitu akamuvilike ngwenyi napihi. Musongo kana unapu mbumba yize yinalovokela haze hapwanga lihute.
21 Oloze nge uze kapilishitu mwakakekesaho nakumona ngwenyi kaheshi ungona utomako, kahafuwukileko, kaha nawa hanafuvalala, uze kapilishitu akamuhandule kuli vakwavo hamakumbi 7.+
22 Nge hanatotowela lyehi chikova chosena, kaha kapilishitu akamuvilike ngwenyi napihi mwomwo unapu musongo.
23 Oloze nge kahatotoweleleko, kaha chinapu kaha kujimba chalihute. Uze kapilishitu akamuvilike ngwenyi natomo.+
24 “Mokomoko kachi nge mutu ali nahamwe hanatosoka nakakahya, kaha nyama yahaze hanatosoka yinalumuka kupwa lipenga lichiluluka chipwe litoma,
25 uze kapilishitu akakekese lize lipenga. Kachi nge ungona wahaze halipenga unalumuka kupwa utoma, lize lipenga nawa linafuwuka, kaha mbumba yikiko yinalovokela haze hanatosoka. Ngocho uze kapilishitu akamuvilike ngwenyi napihi. Unapu musongo wambumba.
26 Oloze nge uze kapilishitu hakukekesa lize lipenga mwamona ngwenyi ungona uliho kawalumukile kupwa utomako, kaha nawa kalyafuwukileko, oloze linafuvalala, kaha akamuhandule kuli vakwavo hamakumbi 7.+
27 Uze kapilishitu akamukekese halikumbi lyakusokesa 7, kaha nge linatotowela chikova chosena, akamuvilike ngwenyi napihi. Unapu musongo wambumba.
28 Oloze nge lize lipenga kalyatotowelele chikova chosenako, kaha nawa linafuvalala, chinapu kaha kujimba chahaze hanatosoka. Kapilishitu akamuvilike ngwenyi natomo, mwomwo chinapu kaha kujimba chahaze hanatosoka.
29 “Kachi nge lunga chipwe pwevo mwapwa namusongo kumutwe chipwe kumulungu,
30 kapilishitu akakekese uze musongo.+ Nge hachikova haze hali musongo hanafuwuka, kaha nawa jikambu* jinaleluka nakwalumuka kupwa jausela, kapilishitu akamuvilike ngwenyi napihi. Unapu musongo wakumutwe chipwe wakumulungu. Yinapu mbumba yakumutwe chipwe yakumulungu.
31 Oloze nge kapilishitu mwakamona ngwenyi hachikova haze hali musongo kahafuwukileko, kaha nawa kaheshi jikambu jilavako, kapilishitu akamuhandule kuli vakwavo hamakumbi 7.+
32 Kapilishitu akakekese uze musongo halikumbi lyakusokesa 7. Kachi nge uze musongo kawatanjileko, nge haze hali uze musongo kaheshi jikambu jauselako, kaha nawa kahafuwukileko,
33 uze mutu akateule jikambu chipwe wevu wenyi, oloze kanda akateula haze hali musongoko. Kapilishitu akahandule mutu kana kuli vakwavo hamakumbi 7.
34 “Kapilishitu akakekese cheka haze hali musongo halikumbi lyakusokesa 7. Kachi nge uze musongo wakumutwe chipwe wakumulungu kawatanjile chikova chosenako, kaha nawa kahafuwukileko, kapilishitu akamuvilike ngwenyi natomo. Uze mutu akakose uvwalo wenyi, kaha mwakatoma.
35 Oloze nge musongo kana unatande chikova chosena omu mwalinga hivanamutomesa lyehi,
36 kapilishitu akamukekese cheka. Nge uze musongo unatande chikova chosena, kaha kanda akatalatala amone numba nge hali jikambu jauselako, mwomwo uze mutu napihi.
37 Oloze nge hakumukekesa mwawana ngwenyi uze musongo kawatanjileko, haze hachikova nawa hali jikambu jilava, kaha uze musongo unakumu. Mutu kana natomo, kaha kapilishitu akamuvilike ngwenyi natomo.+
38 “Kachi nge lunga chipwe pwevo mwapwa namapenga atoma hachikova chenyi,*
39 kaha kapilishitu akakekese aze mapenga.+ Kachi nge anatomonoka, kaha anapu kaha vimbulu vize vinatumbuka hachikova chenyi. Mutu kana natomo.
40 “Kachi nge jikambu jamutu jinasuchika kumutwe wenyi nakupwa nalwanja, kaha natomo.
41 Kachi nge jikambu jakuluholo lwenyi jinasuchika nakupwa nalwanja, kaha natomo.
42 Oloze nge halwanja lwakumutwe chipwe lwakuluholo lwenyi nahapwa mbandu yichiluluka, kaha yinapu mbumba yize yili nakwiza kumutwe wenyi chipwe kuluholo lwenyi.
43 Kaha kapilishitu akamukekese. Nge mwakamona ngwenyi yize mbandu yahalwanja lwakumutwe chipwe lwakuluholo lwenyi yinachiluluka nakujimba, nakusoloka nge chikova chenyi chili nambumba,
44 mutu kana ali nambumba, kaha napihi. Kapilishitu akamuvilike ngwenyi napihi mwomwo yamusongo uze uli mumutwe wenyi.
45 Mutu uze ali namusongo wambumba, akavwale uvwalo wakupula, kaha akatwame nalipupe kumutwe wenyi. Akafwike nawa wevu wahamuvumbo wenyi wahelu nakutambakana ngwenyi, ‘Ngunapihi, ngunapihi.’
46 Mutu kana mwapihyanga hatando yosena yize mwapwa namusongo. Atwamenga kwauka wenyi mwomwo napihi. Atwamenga lika kusali yachilombo.+
47 “Kachi nge musongo wambumba unakwate kuuvwalo, numba upwa uvwalo wamangona amikoko chipwe wawanda,
48 chipwe nge unakwate kuwanda wakuya muusuku chipwe wakuya muwihi, numba upwa walihina chipwe wamangona amikoko, chipwe nge unakwate kulilambu chipwe kuchuma chakutunga nalilambu,
49 kaha lipenga lyausungwa, chipwe lichiluluka lyamusongo kana nalipihisa uze uvwalo, chipwe lilambu, chipwe wanda wakuya muusuku chipwe wakuya muwihi, chipwe chuma chakutunga nalilambu, vyuma kana vinakwate mbumba, ngocho vavilwekese kapilishitu.
50 Kapilishitu akakekese uze musongo, kaha chuma chize chinakwate musongo akachihandule hamakumbi 7.+
51 Omu mwakakekesa uze musongo halikumbi lyakusokesa 7, nakumona ngwenyi unatande hauvwalo wosena, chipwe hawanda wakuya muusuku chipwe wakuya muwihi, chipwe halilambu (chamokomoko namulimo walyo), musongo kana unapu mbumba yayipi, kaha chuma kana chinapihi.+
52 Kapilishitu akoche uze uvwalo, chipwe uze wanda wakuya muusuku chipwe wakuya muwihi wamangona amikoko chipwe walihina, chipwe chuma chakutunga nalilambu chize chili namusongo, mwomwo chuma kana chinakwate mbumba yayipi. Kaha vakachoche hakakahya.
53 “Oloze nge kapilishitu nakekesa uze musongo nakumona ngwenyi kawatanjile haze hauvwalo chipwe hawanda wakuya muusuku chipwe wakuya muwihi chipwe hachuma chakutunga nalilambuko,
54 avalweze vakose chuma chize chinakwate musongo, kaha akachihandule hamakumbi eka 7.
55 Omu navalinga hivanakoso lyehi kanawa chuma chize chinakwate musongo, uze kapilishitu akachikekese. Nge haze hali musongo kahatomeneko, numba tuhu musongo kawatanjileko, chuma kana chinapihi. Muchoche hakakahya mwomwo chinaliwi mukachi chipwe kuweluka.
56 “Oloze nge kapilishitu hakukekesa chize chuma mwamona ngwenyi haze hakwatanga musongo hanafuvalala omu navalinga hivanachikoso lyehi kanawa, kaha akapule lize lipenga lyamusongo lili hauvwalo chipwe halilambu chipwe hawanda wakuya muusuku chipwe wakuya muwihi.
57 Kachi nge uze musongo unasolokela heka haze hauvwalo chipwe hawanda wakuya muusuku chipwe wakuya muwihi chipwe hachuma chakutunga nalilambu, uze musongo unatande, kaha chuma chize chinakwate musongo muchoche hakakahya.+
58 Oloze nge uze musongo unafumu haze hauvwalo chipwe hawanda wakuya muusuku chipwe wakuya muwihi chipwe hachuma chakutunga nalilambu chize mwakosanga, kaha muchikose kamuchivali, ngocho nachitoma.
59 “Elu lukiko lushimbi lwamusongo wambumba uze naukwata kuuvwalo wamangona amikoko chipwe wawanda chipwe kuwanda wakuya muusuku chipwe wakuya muwihi, chipwe kuchuma chakutunga nalilambu, mangana vakahase kuchivilika ngwavo chinatomo chipwe ngwavo chinapihi.”
Kwinyikila Chamwishi
^ Lizu lyachiHepeleu “mbumba” likwechi ulumbunwiso wauvulu. Linahase kutalisa kumisongo yakulitambwisa yahachikova chipwe misongo yeka yakuuvwalo namujizuvo.
^ Hepe., “muchikova chamujimba wenyi.”
^ Chipwe “uze musongo.”
^ Chipwe “akakinduluke kamuchivali.”
^ Chipwe “wevu.”
^ Hepe., “muchikova chamujimba wavo.”
